Ovaefeso 3
3
Paulus omuteethi wondaka ombwa mokati kovapaani
1Ame Paulus ndjinkwatwa mena lyokutya n̯e ovapaani ndji mu teethela Kristus Jesus, 2ngahi mu tji i okutya mba pewa otjilinga hehi ket̯ilonkenda lyaKalunga ndji tji undape mena lyen̯i. 3Otjiholekwa hehi mbe tji holololelwa, ngahi mbe tji soneka lukulu pauthupi. 4Iya amwa tanga omukanda hembu, mamu koneke okutya ame ndji yuvite vi otjiholekwa tjaKristus,#Kol. 1:26-27 5katji heelelwe ovantu womakula amo, iya napano Kalunga we tji holololela ovayapostoli ve ovadhilikwa novaprofeti mOmbepo Ondhilikwa. 6Otjiholekwa hootjohi okutya, ovapaani ve na oumpinga umo nOvajuda. Wo ovin̯ipo vyolutu lumo, ve na oumpinga weudhiko muKristus Jesus okupitila mondaka ombwa.
7Mba ninga omuteethi wondaka ombwa motjali tjet̯ilonkenda lyaKalunga, ndyaa mpa movilinga vyodhonkono dhe. 8Ame ngundji li omununu kovantu ovadhilikwa avehe, mba pewa et̯ilonkenda hendi, ndji teethele ovapaani ouhona waKristus, mbuhau tjiiwa okuthongononwa, 9nokuholololela ovantu avehe otjiholekwa hitja li atja holekwa okudha lukulu, tja li atja holekwa muKalunga, Omuuti wovipuka avihe, 10opo ovatumini novanene wovyomeulu va heelwe keongalo ounongo owingi waKalunga, 11montanto yaapehe ndjaa tanta muKristus Jesus, Muhona wetu. 12Muye tu na ouvandhi noluvedhe okuya kuKalunga neliun̯iko meitavelo, okwiitavela muKristus Jesus. 13Iya me mu heele okutya hámu poyola hime ningilwa omaudheu mena lyen̯i, ngoka ngae li etumbalo lyen̯i.
Ohole yaKristus
14Iya mena lyotjipuka hehi me twike odhongolo kotjipala tjaIhe yaMuhona wetu Jesus Kristus. 15Eanda alihe meulu, nokombanda yohi lya lukilwa muye. 16Me kumbu Kalunga, opo e mu pe hitji lithike pouhona wetumbalo lye, a koleke omuntu womomutima nodhonkono dhOmbepo ye, 17Kristus opo a kale momitima vyen̯i mena lyeitavelo, mwa twikwa, n̯e mwa twama mohole, 18opo mu kale nodhonkono pamo novantu ovadhilikwa avehe okutyaa omutamo noule wopeulu noule wopohi, 19mu iwe ohole onene yaKristus, opo mu hwithilwe po mehwilopo alihe lyaKalunga. 20Kalunga hima undapa ovipuka avihe nodhonkono ndhii li munt̯e kodhonkono ndhoka, ma ulu okuundapa otjingi okupon̯a pusoka himatu kumbu nahimatu lipula. 21Kalunga nga tumbalekwe meongalo nomuKristus Jesus komaluyumuko aehe katee apehe! Amen.
Dhimba New Testament © Bible Society in Namibia, 2010.