یوحنا 4
4
عیسی و ژَنِ سامِری
1وخدی که عیسی خداوند زِناستی که شیخَلِ فرقَه فریسی شِنَفتِنَ عیسی بیشتِرَژ یحیی شاگرد دیری و غسل تعمیدِنَ مِ 2- هرچَن شاگردَلِ عیسی تعمیدَ ماتِن نَه گُوژی - 3منطقَه یهودیَه وِل کِردی و دُوارَه گِلَهاردی چیَ منطقَه جلیل. 4و اَژ منطقَه سامِرَه با ردَ میا. 5اِیندا رَسیَ شهری اَژ سامِرَه وَنُومِ سوخار، نزیک تیکه زمینی که یعقوب داتیتَ کُرِ گُوژ یوسف. 6چاه یعقوب اُورَ بی و عیسی که اَژ سفر خسته بی، نیشتَ کنار چاه. نزیکِ سات دُوازَه نیمَرو بی.
7نُمِ اِئی وخدَ، یِ ژَنی اَژ مردمُونِ سامِرَه یاهات تا آاُو بیکیشی. عیسی فِتیَه بینی: «قِری آاُو بیئَه بینِم» 8چیکِ شاگردَلی چینَ شهر تا خوراک بِخِرِن. 9ژَن سامِری فِتیَه عیسی: «چُطِرَ، تو که یهودیکین، اَژ مِ که ژَنی سامِریکِم آاُواِتَ مِ؟» چیکِ یهودیَل وَگَردِ سامِریَل اصلاً آمدِرفت نِمَن. 10عیسی جواُو داتی: «اَگَر اَژ چیئِی که خدا بیتلافتی پیشکَشَ مِ، خَوَر داشتین و مَزِناستین کیَه که موشیَ بینِت ”آاُو بیئَه بینِم“، تو گُوژِت اَبینی مَگِستین، تا آاُواِ زِنی ماتیَ بینِت.» 11ژَنَ فِتیَه بینی: «آقا، سطل نِرین و چاهیژ گودَ، پس آاُواِ زِنی اَژ کواَ مارین؟ 12مَر تو اَژ بُاواَجدِ هیمَ یعقوب کَلِنگتِرین که اِئی چاهَ وَبینِمُون داسی، و گُوژی و کُرَلی و گَلَلی اَژِنی آاُواَ مُهاردِن؟» 13عیسی فِتیَه بینی: «هر که اَژ اِئی آاُواَ میری، اَدُوارَه تینیَ مُاوتی. 14امّا هر که اَژ اَ آاُواَ که مِ مِمَ بینی بیری، هرگِس دُوارَه تینی نِمُاوتی، بلکم آاُواِئی که مِ مَم نُمی مُاواَ کِنی که تا زندَگونی ابدی قُلَ مِ.» 15ژَنَ فِتیَه بینی: «آقا، اَژی آاُواَ بیئَه بینِم، تا دَ تینیم نُاو و نامَ اِیرَ تا آاُو بیکیشِم.» 16عیسی فِتیَه بینی: «بِچو، میردَتَ هَنا کَ و گِلَبیر.» 17ژَنَ جواُو داتی: «میردَ نِرِم.» عیسی فِتیَه بینی: «یَ که موشین: ”میردَ نِرِم“ راسَ موشین، 18چیکِ پنج میردَ داشتین و اَوَ که اِسگَ دیرین، میردَت نییَه. اَچیکِ فِتینَ راسَ!» 19ژَنَ فِتی: «آقا، مِإینِم که پیغمبریکین. 20بُاواَجدِمُون ری اِئی کواُیَ عبادتَ مَکِردِن، امّا هُمَ یهودیَل موشینُون جائی که مردم با اَنُمی خدااَ بِپَرَسِن، شهر اورشلیمَ.» 21عیسی فِتیَه بینی: «اِ ژَن، بُااُور کَ، زمُونی مَرَسی که بُاواَ آسِمُونی نَه نُمِ اِئی کواُیَ مَپَرَسینُون، نَه نُمِ اورشلیم. 22هُمَ اَچیکِ نِمَشناسینُون مَپَرَسینُون، امّا هیمَ اَچیکِ مَشناسیمُون مَپَرَسیمُون، چیکِ نجات وَسُمدِ یهودیَلَ مای. 23امّا زمُونی مَرَسی، و هر اَلُونیژ رَسیَ که خداپَرَسَلِ حقیقی، بُاواَ نُمِ روح و حقیقتَ مَپَرَسِن، چیکِ بُاواَ هُنَ آیمَلی مِتی که بِپَرَسِنی. 24خدا روحَ و آیمَلی که مَپَرَسِنی با اَوَ نُمِ روح و حقیقت بِپَرَسِنی.» 25ژَنَ فِتیَه بینی: «مَزانِم وخدی ماشیَح هرَ مسیحی که با بای، مای؛ وخدی اَوَ بای، گِشتِ چی اَرِنِمُون آشکارَ مِ.» 26عیسی فِتیَه ژَنَ: «مِ که اَگَردِت قِصَ مَم، هر اَوِمَ.»
27هرَلَزَ، شاگردَلِ عیسی اَژ ری رَسین و بِلِإیژِنِن یاهات که دیری اَگَردِ ژَنی قِصَ مِ. امّا هیشکُم نَپِرسین «چَتَ مِ» یا «اَراچَ اَگَردِ اَوَ قِصَ مِإین؟» 28اِیندا ژَنَ، کُویزَه گُوژی هیشتیَ جا و چیَ شهر و فِتیَه مردم: 29«بورِن کسی بینِن که هر چی که تا اَلُون کِردِمَ، وَبینِم فِتی. یعنی مُاو اَوَ مسیحی بو که با بای؟» 30آنَ اَژ شهر یاهاتِنَ دَشت، کَتِنَ ری چِنَ لا عیسی.
31هرَ مِقَ، شاگردَلَ لالِکانَ بینی، فِتِن: «استاد، چیئِی بیر.» 32امّا عیسی فِتیَه آنَ: «مِ خوراکی اَرا هاردِن دیرِم که هُمَ اَژ اَوَ چیئِی نِمَزانینُون.» 33اَرا اِیخاطِر شاگردَلِ فِتِنَ یَکتِرِک: «مَر کسی اَرا اَوَ خوراک آاُوردِسی؟» 34عیسی فِتیَه بینِن: «خوراک مِ یَسَ که خواسِ اَوَ که مِ رِ کِردِسی، انجوم بیَم و کارِ اَوَ وَسرانجوم بِرَسِنِم. 35مَر هُمَ اِئی قِصَ نَشنَفتینُونَ که ”چُوار مُاو بیشتِر تا وخد دِرِ نَمَنیَ“؟ امّا مِ وَهُمَ موشِم، کَمَلِتُونَ وا کَن و بینِن که هر اَلُون کِشتَل اَرا دِرِ حاضرَ. 36اِسگَ، آیمی که دِرِاَ مِ، مِزدِ گُوژیَ مَسَنی و ثمری اَرا زندَگونی ابدی جمَع مِ، تا اَ آیمی که مَکاری و اَوَ که دِرِاَ مِ اَگَردِ یَک خوشی کَن. 37اَژ اِیرَ اِئی قِصَ دُرُسَ که ”یَکی مَکاری و یَکی تِرِك دِرِاَ مِ“. 38مِ هُمَلَ رِ کِردِم تا محصولی دِرِ کِإینُون که اَژ زحمت کِردیِ گُوژِتُون نییَه. کسَلی تِرِك زحمتی کیشانَ و هُمَ اَژ زحمت کِردیِ آنَ بیَرَ میَرینُون.»
39پس آیمَلِ فِرِاِئی اَژ سامِریَلی که نُمِ اَ شهرَ بین وَعیسی ایمُون آاُوردِن اَراخاطرِ شاهادَتِ اَ ژَنَ که فِتیتی «هرچی که تا اَلُون کِردِمَ، وَبینِم فِتی». 40وخدی اَ سامِریَلَ یاهاتِنَ لا عیسی، اَژ اَوَ گِستِن بِمینیَ لان. پس دو روژ اُورَ مَنت. 41و آیمَلِ فِرِ تِرِکی اَراخاطرِ شِنَفتِنِ قِصَلِ عیسی ایمُون آاُوردِن. 42آنَ وَاَ ژَنَ مِتِن: «اِسگَ دَ فَقَد اَراخاطرِ قِصَ تو ایمُون نِماریمُون، چیکِ گُوژِمُون قِصَلِ اَوَ شِنَفتیمُون و مَزانیمُون که اِئی پییا حقیقتاً نجاتدهندَه دینیااَ.»
عیسی نُمِ منطقَه جلیل
43بعدِ دو روژ، عیسی اَژ اُورَ چیَ جلیل، 44چیکِ گُوژی فِتیتی که «پیغمبر نُمِ شهر گُوژ حرمتی نِری.» 45وخدی رَسیَ جلیل، جلیلیئَل وَریِ خوش یاهاتِنَ پیشوازی، چیکِ آنِإیژَ اَرا عِد چینَ شهر اورشلیم و اَچیکِ عیسی اُورَ کِردیتی، دین.
شفا کُرِ یِ دَرباری
46اِسگَ عیسی یِگِلِ تِرِك چیَ وِلِتِ قانا نُمِ جلیل، هرَ جائیکه آاُواَ شِراُو کِردیتی. اُورَ یَکی اَژ دَرباریَل بی که کُرِ مریضی نُمِ شهر کَفَرناحوم داشتی. 47وخدی شِنَفتی عیسی اَژ یهودیَه یاهاتییَسَ جلیل، چیَ لا اَوَ و لالِکاتَ بینی که بایَ میل هار تا کُری شفا بِ، چیکِ کُری داشتی مَمِرد. 48عیسی فِتیَه بینی: «تا نیشُونَل و معجزَلِ بِلِإیژِنی نِإینُون، ایمُون نِمارینُون.» 49اَ پییا فِتی: «آقا، وَرِ یَ که اُویلِم بِمِری، بو.» 50عیسی فِتیَه بینی: «بِچو؛ کُرِت زِنیَ مَمینی.» اَ پییا کلومِ عیسااَ بُااُور کِردی و کَتَ ری، چی. 51هَنو نُمِ ری بی که خذمتکارَلی چِنَ پیشوازی و فِتِن: « حال کِرِت دیری خواَ مُاو.» 52اَژ آنَ پِرسیتی: «اَژ چِ ساتی وِیرِ خواِئی چی؟» فِتِن: «دُینَ، سات یَک نیمَرو تبی قطع بی.» 53اِیندا بُاواَ زِناستی که یَ هرَ ساتی بی که عیسی وَبینی فِتیتی: «کُرِت زِنیَ مَمینی.» پس گُوژی و گِشتِ عَتِعیالی ایمُون آاُوردِن. 54یَ دوّمین نیشُونَه و معجزِاِئی بی که عیسی مِقِاِئیکه اَژ یهودیَه یاهاتَ جلیل، انجوم داتی.
Currently Selected:
یوحنا 4: NLV
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
