OMAPSALOME 17
17
Omutwikwatimba te liameke kOmwene
Eilikano laDavid.
1Omwene, uda ondjovo ya yuka!
Pwilikina okweehela kwange,
Ove u tambule eindilo lange,
inali dja komilungu di noipupulu!
2Kwoove naku dje oshitokolifo
shokutokola nge;
omesho oye taa tale eshi sha yukilila.
3Ove ho tale omutima wange,
moufiku to u shipaashipa,
Ove ho konakona nge,
ndele ito mono sha.
Keshe eshi handi diladila yo
itashi piti mokanya kange.
4Keshe osho ovanhu tave shi longo,
ame handi kanyatele kondjovo yomilungu doye,
nohandi kukuma omalila ovahanauni.
5Omanha ange onde a diinina
momufinda woye,
neenghatu dange inadi pumha mo nande.
6Ohandi ifana kwoove,
osheshi Kalunga Ove to udu nge,
ehenifa okutwi kwoye kwaame,
u pwilikine ondaka yange.
7Monifa onghenda yoye ikumwifa,
Oove omuxupifi waava tava kongo okuhondama
kolulyo loye molwovashindi vavo.
8Diinine nge ngaashi omuni yeisho loye,
u holeke nge momudidimbe womavava oye,
9molwovakolokoshi, hava nhukile nge,
nomolwovatondadi vange, hava dingilile nge.
10Omitima davo dihe na eudito ve di idila po
nomakanya avo taa popi nelitumbaleko.
11Mokweenda kwetu ve tu dingilila paife;
ohave tu tele opo ve tu shate poshi.
12Ovo va fa onghoshi ya hala oshihondjauninwa,
ngaashi onghoshona tai hondjaunine mehondamo.
13Omwene, fikama, u va lomhokele
ndele to va shate po!
Xupife nge kovahenakalunga
neongamukonda loye
14neke loye kovanhu, heeno Omwene,
kovanhu vounyuni ou,
ve noshitukulwa shavo
shi li mokukalamwenyo omu,
omadimo avo ho a yadifa noipewa yoye,
ovana ovamati vavo tava kuta,
ndele tava fiile oludalo lavo oupuna wavo.
15Ndelenee ame handi ka tala
oshipala shoye mouyuki;
ame ohandi ka mona ekuta
mokutala ondjelo yoye
ngeenge handi penduka.
Currently Selected:
OMAPSALOME 17: OKYB
Highlight
Copy
Compare
Share
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
