OMAPSALOME 16
16
Omwene Oye aeke eameno lomuyuki
Epsalme laDavid.
1Kalunga, amene nge, osheshi kwoove
oko handi kongo ehondamo.
2Onda tya kuKalunga: “Oove Omwene wange,
nghi na nande ouwa umwe, uhe fi Ove.”
3Nokovayapuki vomoshilongo ohandi ti:
“Ovo tuu ovayapuki,
ohokwe yange aishe omuvo i li.”
4Ava ve likongela kalunga e lili,
ove nomayehamo mahapu.
Oikunwayambo yavo yohonde
itandi ke i yandja;
nomadina avo itandi a pitifa nomilungu dange.
5Omwene Oye oshitukulwa shefyuululo lange
noshoneka yange.
Ove ho diinine oshihoololifo shange.
6Oshihoololifo sha hoololelwa nge
oshitukulwa medu liwa,
efyuululo lange ola wapalela nge.
7Ohandi pandula, Omwene,
eshi wa pukulula nge;
moufiku omutima wange
tau shi dimbulukifa nge.
8Alushe ohandi kwatele Omwene
koshipala shange;
eshi Ye e li kolulyo lange, ihandi tengauka.
9Onghee tuu omutima wange u nehafo,
nomwenyo wange tau nyakukwa,
nolutu lange tali tulumukwa mombili.
10Osheshi omwenyo wange
Ove ito u efele moshovafi
nomuyapuki woye ito mu efa a mone eolelo.
11Ove to shiivifile nge ondjila yomwenyo;
ouyadihafo ou li koshipala shoye,
ouwapalinyenye ou li meke lokolulyo loye fiyo alushe.
Currently Selected:
OMAPSALOME 16: OKYB
Highlight
Copy
Compare
Share
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
