OMAPSALOME 109
109
Oshiponga shefingo nekwafo lOmwene
Epsalome laDavid, la pewa enyakwa lolwiimbo.
1Akutu Kalunga kepandulo lange, ino mwena!
2Osheshi omakanya eemhote novanaipupulu
okwa akamena nge,
ova popifa nge nelaka lekonda;
3ova kondekela nge neendjovo doutondwe,
ova ponokela nge oshimha;
4ohole yange otave i alulile nge ondubo,
fimbo ame ndi li po, handi va indilile.
5Ouwa ove u alulila nge owii,
noutondwe molwohole yange.
6Mu fikamifila yo omukolokoshi, e mu tokole,
nomwaambi waye ne mu ame kolulyo;
7metokolo laye na monike oushima,
neilikano laye nali nyike oulunde.
8Omafiku aye naa xupipale,
umwe na tambule oufitalonga waye.
9Ovana vaye nava ninge eefiye,
nomwalikadi waye omufiyekadi;
10oludalo laye nali tembavauke nokweehelavaela,
okukonga eendja komakulekule
komakuluputu oyuumbo yavo.
11Omunashikolo naye ne mu kufe keshe eshi e kwete,
novayeni nave mu nyeke oikongwa yaye;
12ina mona nande ou, te mu fi eenghoto,
po inapa monika ou ta kenukile eefiye daye.
13Oludalo laye nali kombwe po sheke,
movatekulu edina lavo nali dimwe mo.
14Owii wooxe nau kale,
hau dimbulukiwa kOmwene,
noulunde waina inau kwenywa po;
15oyo nai kale alushe koshipala shOmwene,
opo a dimbwife okushiivika kwavo kombada yedu.
16Molwaashi ye ina yavala okulongifa ohole,
ndelenee okwa taataa epongo newilandjila,
nomunaluhodi a limbililwa, e mu dipae nokuli.
17Ye a kala e hole okufinga, efingo ole mu hanga.
Okwa li ehe hole enangekonoupuna,
hano ole mu kala kokule.
18Okwe lidika efingaelo ngaashi omudjalo waye,
olo le mu ya meni ngaashi omeva
nomomakipa aye ngaashi omaadi.
19Nali ninge oshiliuviko shokuliuvikila
nongaashi ekwamo, e li djale alushe.
20Eshi osho nashi ninge ondjabi
yovashindanhu vange, ve i pewe kOmwene,
noyaava tava popi nge nai.
21Ndelenee Omwene, Kalunga kange,
Ove, ninga omupopili wange molwedina loye;
molwounyenye wonghenda yoye xupife nge!
22Osheshi onda nyika oluhepo noufyoona,
nomutima wange owa tyuulwa monhulo yange.
23Ohandi xulu po ngaashi omudidimbe,
ngeenge tau hovele okutandavela;
ohandi twalwatwalwa komhepo
ngaashi oshipaxu.
24Eengolo dange oda tengaukifwa
kokulidilika eendja,
olutu lange ola kumbala, onda ngona;
25ndele ame mwene onda ninga oshiyolifa shavo;
ngeenge tava mono nge,
otave lipukaapukile nge komitwe.
26Omwene, Kalunga kange, Oove, kwafe nge!
Xupife nge molwouwanghenda woye!
27Va dimbulukifa, nokutya eshi,
oshilonga sheke loye,
Omwene, kutya Oove mwene we shi eta po.
28Vo nava finge ngaho,
ndele Ove, nangeka noupuna.
Ngeenge va fikamena nge, Ove va xutula.
Omupiya woye ame ndi hafe.
29Ovatondi vange nava dikwe elengwa,
ve liuvike odino ngaashi oshidjalomwa.
30Okanya kange naka pandule Omwene mokule,
ame ndi mu tangele meengudu davahapu;
31osheshi Ye oku li ofika kolulyo lomufyoona,
e mu xupife kwaava tave mu tokola.
Currently Selected:
OMAPSALOME 109: OKYB
Highlight
Copy
Compare
Share
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
