OMAYELETUMBULO 4
4
Lihapupalifila ounongo u kukume ouhenakalunga
1Ovamati nye udeni outekuduliko waxo, ndele pwilikineni mu longwe omayele. 2Osheshi ame ohandi mu pukulula nawa, inamu xutwifa elongo lange. 3Osheshi ame eshi nda li omona watate wokashendjelutu newifa lameme, 4ye okwa longa nge ndele a lombwela nge: “Omutima woye nau dame keendjovo dange. Diinina oipango yange, opo u kale nomwenyo. 5Lihapupalifila ounongo, likongela omayele! Ino dimbwa ndele ino kanduka mo meendjila dokanya kange. 6Ino u xutwifa, opo u ku amene. U hola, opo nee tau ku popile.
7“Efina lounongo oleli: Likongela ounongo, ndele likongela omayele noinima aishe u i kwete. 8U fimaneka, opo otau ku lenge. Ngeenge to u papatele, otau ku fimanekifa. 9Otau ku pe oshidingo sha wapala komutwe woye; tau ku etele oshishani sha wapalelela.”
10Omumwange, uda eendjovo dange, di tambula, opo nee omido dokukalamwenyo kwoye tadi hapupala. 11Ame ohandi ku longo ondjila younongo, ame ohandi ku twala meendjila da yukilila. 12Mokweenda kwoye eenghatu itadi finana, ndele ngeenge to tondoka, ito ka punduka. 13Likwatelela outekuduliko, ino u xutwifa, u diinina, osheshi owo okukalamwenyo kwoye. 14Ino ya kelila lovahenakalunga ndele ino lyata ondjila yovanawii. 15I efa, ino ya ko, kanduka mo muyo ndele i koya po. 16Osheshi vo hava nyengwa okukofa ngeenge itava longo owii. Ndele itava kumuka, fimbo inava pundukifa omunhu. 17Osheshi vo ohava li omungome wouhenakalunga, ndele hava nu omaviinyu oukolokoshi. 18Fimbo elila lovayuki li li ngaashi eluwa tali tende, lo tali eta ouyelele tau hapupala fiyo omutenya tau tu, 19ondjila yovahenakalunga oyo ngaashi omulaulu; vo inava shiiva apa tava ka pundukila.
20Omumwange, pwilikina edi handi ku lombwele, endekela okutwi kwoye keendjovo dange. 21Ino di kandula po koshipala shoye, di diinina meni lomutima woye. 22Osheshi odo omwenyo kwaava tave di mono, omuti wokuvelula olutu lavo alishe. 23Omutima woye u amena komesho yoinima aishe oyo i nokwaamenwa, osheshi muwo otamu di omwenyo. 24Kandula po pwoove oipupulu yokanya koye, oipupulu yomilungu doye i kaleka kokule naave. 25Omesho oye naa tale a yukilila, neemhafu doye nadi yukilile. 26Elila lomhadi yoye li yelakanifa neendjila doye adishe nadi kale da pama. 27Ino kanduka ko kolulyo ile kolumosho. Omhadi yoye i kaleka kokule nowii.
Currently Selected:
OMAYELETUMBULO 4: OKYB
Highlight
Copy
Compare
Share
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
