OMAYELETUMBULO 3
3
Mokutila Omwene tamu di enangekonoupuna
1Omumwange, ino dimbwa elongo lange, nomutima woye nau diinine oipango yange; 2osheshi lo otali ku hapupalifile omafiku nomido dokukalamwenyo nombili. 3Olune noudiinini wouyuki inau ku efa. I mangela mofingo yoye, i shangela moshipelende shomutima woye, 4opo nee to ka mona onghenda nomayele mawa moipafi yaKalunga noyovanhu.
5Nomutima woye aushe lineekela Omwene, ino liameka keendunge doye mwene. 6Mu shiiva meendjila doye adishe, opo nee Ye ota ka lalakanifa omalila oye. 7Ino kala omunongo momesho oye mwene. Tila Omwene, ndele kanduka mo mowii; 8osho tashi pameke olutu loye ndele tashi koleke omakipa oye. 9Omwene mu fimaneka neliko loye noshipe shoye shomukeshe to shi likola, 10opo nee omaanda oye taa ka yada pombada noikolelo yoye tai ka xunga omaviinyu. 11Omumwange, ino dina outekuduliko wOmwene, ino loloka Ye eshi te ku hanyene. 12Osheshi ou Omwene e mu hole Ye ote mu hanyene, heeno, ngaashi xe ta hanyene omona waye e mu hole.
13Omunelao omulumenhu ou a mona ounongo, nomulumenhu ou te likongele eendunge. 14Osheshi oku di konga oku dule oshisiliveli, noku di mona oku dule oshingoldo; 15Ondilo yado i dule okorali, noinima yoye aishe i nondilo itai yelekwa nado. 16Meke lado lokolulyo omu noule womafiku, nomeke lado lokolumosho omu noupuna nefimano. 17Eendjila dado odo eendjila da wapala, nomalila ado aeshe ombili. 18Odo omuti womwenyo kukeshe ou te u kwata, nomunelao keshe oyou ta kanyatele kuo.
19Edu Omwene e li dika nounongo, nokwa pameka omaulu neendunge; 20omolweshiivo omakungulukilo omokule a panuka mo noilemo ya ndoda omume.
21Omumwange, oinima ei iha dje mo momesho oye, diinina eshiivo neendunge, 22opo nee yo tai ka ninga oukali womomwenyo woye noulenga womofingo yoye, 23opo nee ho ende nawa nondjila yoye, ndele ito likwayula omhadi yoye. 24Ngeenge to ka nangala, ito ka haluka, ndele ngeenge to nangala, eemhofi doye tadi ka kala ditalala. 25Ove, ito pumbwa okukala u noumbada molwehaluko tali uya divadiva, ile ehanauno tali kolokele ovahenakalunga. 26Osheshi Omwene ota ka kala omulineekelwa woye ndele Ye ota ka amena omhadi yoye komwiyo. 27Ino anya okumonifila omukwanaluhepo ouwa, ngeenge ho dulu oku shi ninga. 28Ino lombwela omukweni: “Inda, u lialuke, opo mongula handi ku pe,” nande ove u shi kwete. 29Ino diladilila omukweni owii, fimbo ye ta kala pwoove te ku lineekele. 30Ino twa eemhata nomunhu ye ine ku ningila sha shii. 31Ino kala u nefupandubo nomukolokoshi, neendjila daye ino di lihoololela. 32Osheshi omupukifi oye oixuna kOmwene, ndelenee Ye omushiiviki wovayuki. 33Etulomutima lOmwene li li meumbo lomuhenakalunga, ndelenee eumbo lovayuki tali nangekwa noupuna kuye. 34Ava hava sheke, Kalunga yo te va sheke. Ndelenee ovalininipiki tava filwa onghenda kuye. 35Ovanongo tava ka fyuulula efimano, ndelenee oshipewa shomalai osho ohoni.
Currently Selected:
OMAYELETUMBULO 3: OKYB
Highlight
Copy
Compare
Share
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
