OMAYELETUMBULO 23
23
Omapukululo ovanongo
1Ove ngeenge ho kala omutumba okulya pamwe nomupangeli, didilika nawa ou e li koshipala shoye, 2ndele tula ombele pofingo yoye, ngeenge wa hala okuhakana. 3Ino haluka eendja daye dinyenye, osheshi odo eendja dekengelelo. 4Ino lipyakidikila u ninge oshipuna, efa okulongifa eendunge doye moshinima eshi. 5Omesho oye eshi a wile ko, oupuna uhe po, osheshi divadiva wa mona omavava ndele tau tuka ngaashi onhwa keulu. 6Ino lya omungome waau e ku yele, ndele ino haluka eendja daye dinyenye. 7Osheshi ngaashi ta diladila momwenyo waye, osho e li. Osho te ku lombwele: “Lya, nwa,” ndelenee omutima waye kau li pamwe naave. 8Oshipambu we shi lya, u noku shi kunga mo; neendjovo doye doukaume we di hepifa ashike.
9Ino popya momatwi elai, osheshi eendunge domeendjovo doye otali di dini. 10Ino lundulula omufinda wongaba, ndele ino ya komapya eefiye. 11Osheshi Omukulili wado e neenghono, Ye ota ka popila eendjovo dado kwoove. 12Omutima woye, u eta moutekuduliko nokutwi kwoye keendjovo deshiivo. 13Omona woye omumati ino mu fila onghenda oku mu handukila. Ngeenge to mu dengifa oshimwati, ye ita ka fya. 14Ove to denge tuu oshimwati, ndelenee ove to xupifa omwenyo waye moshovafi. 15Omumwange, omutima woye ngeenge tau mono ounongo, opo nee omutima wange yo otau hafe. 16Neefiyo dange tadi kuwilile, omilungu doye ngeenge tadi popi odo da yuka.
17Omutima woye uha fye efupa molwovahenakalunga, ndelenee kala efiku alishe mokutila Omwene. 18Osheshi oshili oku nefimbo lokomesho, neteelelo loye itali ka hepa ngaho.
19Omumwange, uda, u mone eendunge, yukifa omutima woye u yukilile mondjila. 20Ino kala mokati kaava hava finyuna omaviinyu, hamokati kaava va duka okulya ombelela. 21Osheshi omufinyuni nomufukedi otava ka ninga eehepele, nomukumuki ta ka djala oikutu yoinyanyu.
22Pwilikina xo, ou e ku dala, ndele ino dina nyoko, eshi a kulupa. 23Landa oshili, ino i landifa po; nosho yo ounongo, noutekuduliko neendunge. 24Xe yomuyuki ota hafe pombada; naau a dala omunongo, ye ote mu nyakukilwa 25Hafifa xo nanyoko, naau e ku dala, mu nyakukifa pombada. 26Omumwange, pe nge omutima woye, omesho oye naa hokwe eendjila dange. 27Osheshi ombwada oyo elambo lile, nomukainhu omuhaelwa oye ondungu ya finana. 28Ye ota nangala ndele ta holamene ngaashi omulunga ndele ta hapupalifa ovaliteeki mokati kovanhu.
29Umwe ta ti: “Akutu!” Nomukwao: “Woo ame!” Umwe e neemhata. Umwe vali ta keme. Umwe e noipute nande ina nyona sha. Umwe vali e nomesho a wiwika. 30Ovo ava hava kala efimbo lile pomaviinyu, ovo hava i mo va ka makele oikunwa ya lumbakanifwa. 31Ino tala omaviinyu nhumbi a tilyana, nhumbi taa wapala meholo, ndele taa fenungutile mo. 32Pexulilo otaa lumata ngaashi eyoka, ndele taa fiile mo oudiyo ngaashi ongolonyoka. 33Omesho oye otaa ka mona oinima yoikumwifa, nomutima woye tau ka popya oinima inai yuka, 34ndele to ka kala ngaashi ou ta nangala meni lefuta mwi, ile ngaashi ou ta nangala koxulo yombodje yoskepa. 35Ye ta ti: “Vo ova denga nge, ndelenee inandi uda ouyehame, Vo ova denga nge poshi, ame inandi shi dimbulukwa! Onaini handi ka papuduka? Opo nee handi ke a konga vali.”
Currently Selected:
OMAYELETUMBULO 23: OKYB
Highlight
Copy
Compare
Share
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
