OMAYELETUMBULO 22
22
1Edina li nondilo li dule oupuna uhapu, nohokwe i dule oshisiliveli noshingoldo. 2Oshipuna nohepele otava pumhakana. Omwene e va shita vo aveshe. 3Omunaendunge ota tale oshiponga ndele ta hondama, ndelenee ovashima tava ehene ko ndele tava hangika koshiponga. 4Ondjabi yelininipiko noyokutila Omwene oyo oupuna nefimano nomwenyo. 5Omakiya neemwiyo di li mondjila yomunaipupulu, ou ta kala kokule nayo, ota amene omwenyo waye. 6Omona woye omumati, mu ikifa ondjila yaye ya yuka, opo nee ita ka yapuka muyo, eshi a kula. 7Oshipuna tashi pangele eehepele. Naau e noikolo ta ningi omupika waau e mu pa eengele. 8Ou ta kunu owii, ota ka teya omupya, noshiti shoupyuhandu waye otashi nyonauka po. 9Ou e nehalo liwa ota ka nangekwa noupuna, osheshi ota yandje komukwanaluhepo omungome waye. 10Taataa omusheki, opo nee eemhata tadi xulu po; neshilafano nesheko tali pu po. 11Ou e hole oukoshoki womutima, ndele e nomilungu da wapala, ohamba otai ningi kaume kaye. 12Omesho Omwene taa amene eshiivo. Onghee hano ta pengifa eendjovo dovaliteeki. 13Omundede ta ti: “Pondje ope nonghoshi. Fiku limwe tai dipaa nge mokati komapandavanda!” 14Okanya komukainhu wovanhu oko elambo lile. Ou ta hangika kehandu lOmwene, ota wile mo mulo. 15Oulai owa kanyatela momutima wokaana, ndelenee outekushiti tau u taataa mo. 16Ou ta fininike ohepele, ote i kwafa. Ou ta pe oshipuna, ye ote shi ningi ohepele.
Eendjovo dovanongo
17Pakaleka omatwi u pwilikine eendjovo dovalumenhu ovanongo, u koneke eshiivo lange. 18Osheshi sha wapala ngeenge to di tuvikile momwenyo woye. Do adishe nadi kale da longekidilwa omilungu doye. 19Opo u kale nokulineekela Omwene, onghee handi ku longo nena eli, heeno, ove ho longwa. 20Inandi ku shangela omayeletumbulo, nde ku pa nomapukululo neshiivo. 21Opo ndi ku longe oshili, eendjovo di shii kulineekelwa, u shiive neendjovo odo doshili okunyamukula omutumi woye. 22Ino hepeka omukwanaluhepo, shaashi ye omukwanaluhepo; ndele ino lyata ohepele moshivelo. 23Osheshi Omwene ta popile eendjovo davo, ndele ta kufa omwenyo wovahepeki vavo. 24Ino ninga kaume komuhandunhu ndele ino endafana naau e hole eemhata, 25opo uha ike eendjila daye ndele uha twale omwenyo woye momwiyo. 26Ino kala mokati kaava hava paafana eke, ava tava ningi ovaponhele yoifuta. 27Ngeenge uhe na sha okufuta, ombete tave i kufa koshi yoye. 28Ongaba ikulweelela ino i lundulula, yo oya tulwa po kooxe. 29Ngeenge to mono omulumenhu e nomayele mokulonga kwaye; ye ota dulu okukala ofika moipafi yeehamba, hamokulongela ovafyoona.
Currently Selected:
OMAYELETUMBULO 22: OKYB
Highlight
Copy
Compare
Share
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
