OMAYELETUMBULO 20
20
1Omaviinyu, oo omusheki, noikolwifa, oyo omuweeleli, ndele kaku na ou ta kolwa kuo, e neendunge. 2Etilifo lohamba, olo la fa okukumba kwonghoshi yonyasha, ou te i handukifa, ota nyono po omwenyo waye. 3Efimano lomunhu olo okukukuma eemhata, ndelenee elai keshe tali pendula eemhata. 4Omundede ita pulula mokulombo; ndele mokufu ngeenge ta hadahada mefimbo leteyo, kaku na sha. 5Eemhangela domutima womunhu di li ngaashi omeva malemale, ndelenee omulumenhu omunaendunge te ke di teka mo. 6Ovanhu vahapu tave litangele ouwa wavo, ndelenee olyelye ta mono omulumenhu e shii kulineekelwa? 7Omuyuki ha ende ehe noshipo, ovana vaye tave mu shikula vo ovanelao. 8Ohamba tai kala omutumba kolukalwa letokolo, otai tokolifa omesho ayo nokutongola mo owii. 9Olyelye ta dulu okutya: “Omutima wange nde u kosha, ame nda koshwa, ndihe nomatimba?” 10Oiyelekifo i lili nai lili noiyelekifombale i lili nai lili oyo oixuna koshipala shOmwene. 11Nokamati take liholola nokuli pakukala kwako, oilonga yako ngeenge ya yela noya yuka. 12Okutwi haku udu ko, neisho tali mono ko, oyo aishe ivali Omwene e i ninga. 13Ino kala u hole eemhofi, uha ninge ohepele; pashuka, opo u likutife nomungome. 14Omulandi ta ti: “Shii, shii!” Ndelenee omulandifi eshi a dja po, ote litange. 15Oku noshingoldo neekorali, ndelenee ewapeko li nondilo, olo omilungu di neshiivo. 16Kufa oshikutu shaye, osheshi ye a ninga omuponhele woifuta, ndele u mu kufe ngaashi ombabyona molwavakwao. 17Omungome womokunyeka omunyenye komunhu, ndelenee komesho okanya kaye ka yada omawe. 18Eenghundafana tadi pameke eemhangela; hano mokushiva oita, diladila shili nawa. 19Ou ta endaenda nomalundilo, ota holola oshiholekwa, hano ino litula pwaau e nomilungu da makuka. 20Ou ta tulomutima xe naina, olamba yaye otai dimi momulaulu fokofoko. 21Oinima tai hakanwa unene pehovelo, oxuuninwa itai eta enangeko noupuna. 22Ino tya: “Nda hala okukwatela owii onghone!” Teelela Omwene, Ye ote ku yakula! 23Oiyelekifo yomaludi avali, oyo oixuna koshipala shOmwene, noshiyelekifo inashi yuka ke shiwa. 24Eenghatu domulumenhu tadi endifwa kOmwene; omunhu ta dulu ngahelipi okuuda eendjila daye? 25Omunhu te litele omwiyo mokuhadiladila kwaye, ta udanekele Omuyapuki oshali ndelenee komesho ta ka diladila eudaneko. 26Ohamba i neendunge otai duda mo ovahenakalunga, ndele tai alangatifa oshilei shokuxwa kombada yavo. 27Omhepo yomunhu oyo olamba yOmwene, tai konakona oukololo aveshe vomutima. 28Ohole noudiinini tai amene ohamba, nomolwohole yo otai yambidida olukalwapangelo layo. 29Ewapeko lovamati, olo eenghono davo. Newapeko lovaxungu olo eenghwakutoka. 30Omatoshaulo e nohonde taa yelifa omunawii, nomadengo taa yelifa oukololo vomutima.
Currently Selected:
OMAYELETUMBULO 20: OKYB
Highlight
Copy
Compare
Share
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
