OMAYELETUMBULO 19
19
1Omukwanaluhepo ta ende ehe noshipo e dule ou e nomilungu inadi yuka ndele natango ye elai. 2Ouladi uhe neshiivo inau wapala, naau ta endelele mokweenda ta lyata pomunghulo. 3Oulai womunhu tau nyono po ondjila yaye, ndelenee omutima waye tau handukile Omwene. 4Emona tali eta ookaume vahapu, ndelenee ohepele tai kanifa ookaume kaye. 5Ondobwedi yoipupulu itai kala itai handukilwa. Naau ta kunu oipupulu, ita ka xupifwa. 6Vahapu have likongele ohokwe yovanamadina, nomulumenhu ha yandje eeshali, e nookaume vahapu. 7Ovamwaina aveshe ovalumenhu vohepele tave i tondo; unene ookaume vayo tava kala kokule nayo. Yo otai va shikula neendjovo, vo vehe po! 8Ou ta hapupalifa eendunge, e hole okukalamwenyo kwaye. Ou ha diinine omayele, ota ka mona ouwa. 9Ondobwedi yoipupulu itai kala itai handukilwa. Naau ta kunu oipupulu, ta nyonwa po. 10Ehepuluko itali wapalele elai, unene ngahelipi okupangela omalenga taku wapalele omupiya! 11Eendunge domunhu tadi mu pe outalanheni, nefimano laye olo okudima po etauluko. 12Oupyuhandu wohamba u li ngaashi okukumba kwonghoshi yonyasha, ndelenee ohokwe yayo ngaashi omume kombada yoimeno. 13Omona omushima oye oupyakadi waxe, nokungongota kwomwalikadi okwo ngaashi onhongo tai ndoda efimbo alishe. 14Eumbo nemona olo efyuululifo looxe, ndelenee omwalikadi e neendunge ota di kOmwene. 15Oundede tau kofifa eemhofi didjuu. Omwoongaongi ota ka fya ondjala. 16Ou ta diinine oshipango, ota amene okukalamwenyo kwaye. Ou ita pashukile eendjila daye, ota ka fya. 17Ou ta filonghenda eehepele, ota tulike kOmwene. Ndele Ye ote ke mu alulila oshilonga shaye shiwa. 18Hanyena omona woye omumati fimbo pe neteelelo. Osheshi ino hala ndishi, ye a fye. 19Omuhandunhu ota ka humbata ehandukilo. Osheshi ngeenge wa hala oku mu yakula, oto mu xwameke ashike unene. 20Pwilikina epukululo u itavele outekuduliko, opo u mone eendunge dokomesho. 21Eemhangela dihapu di li momutima womulumenhu, ndelenee epukululo lOmwene tali ka kala po. 22Emona lomunhu la wapala li nondilo olo olune laye. Ohepele i dule omulumenhu omunaipupulu. 23Okutila Omwene taku eta omwenyo: omunhu ta dulu okutulumukwa nawa oufiku, ndele ita hangika nande koshiponga. 24Omundede ta velelifa eke laye, ta nyengwa oku li alulila kokanya kaye. 25Denga omusheki, opo nee omushima ta mono eendunge, nomunandunge ngeenge ta hanyenwa, ota ka mona eshiivo. 26Ou ta hepeke xe ndele ta taataa mo ina, oye omumati oshimhulu nomufifihoni. 27Omumwange, ngeenge to efa okupwilikina outekuduliko, opo nee to puka mo meendjovo deshiivo! 28Oshimhulu osho tashi hepaulula moihokolola, otashi sheke ouyuki, nokanya komuhenakalunga taka pona po ouhenouyuki. 29Omatokolohandukilo a longekidilwa ovasheki nosho yo omadengo ombuda yovasheki.
Currently Selected:
OMAYELETUMBULO 19: OKYB
Highlight
Copy
Compare
Share
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
