JOB 4
4
Job omuhekeleki ta kanifa eyombamo
1Opo nee Elifas, Omuteman, ta nyamukula, ta ti: 2“Ino ninga omwenyo mwii ngeenge ope na ou ta hetekele oku ku popifa. Ndelenee olyelye ta dulu okumwena? 3Tala, ove wa yukifa vahapu ndele wa pameka omake a tyololoka. 4Eendjovo doye oda yambula ou ta punduka, neengolo da tengauka we di pameka. 5Ndelenee paife oudjuu eshi we ku hanga, ove wa kanifa eyombamo loye. Paife eshi tau ku tu, ove wa limbililwa. 6Etilokalunga loye kali fi elineekelo loye, nokweenda kwoye mouyuki kaku fi eteelelo loye? 7Dimbulukwa, olyelye a nyonauka po, ngeenge ehe noshipo, nonaini ovayuki va nyonwa po? 8Osho nde shi tala, nokutya ovo hava pulula osho inashi yuka, ndele hava kunu ehanauno, ovo tave li teya yo. 9Vo otava nyonauka po komufudo waKalunga nokomhepo yehandu laye otava kombwa po.
10“Ekumbo longhoshi nondaka yonghoshi inene tai mwenekwa, heeno, omayoo eenghoshi deenyasha taa teyaulwa po. 11Onghoshi tai fi, osheshi ihe noshihakanwa, nounghoshona vonghoshi onghadi tave lihane.
12“Meholeko ondjovo imwe ye uya kwaame, nokutwi kwange kwa uda enongofolo layo, 13omadiladilo eshi tae linyenge momamoniko omoufiku, eemhofi didjuu eshi da wila ovanhu. 14Ehaluko nekakamo la hanga nge, nomakipa ange aeshe a dekweta. 15Opo nee omhepo ya koya nge po, eexwiki domolutu lange da handala. 16Oya kala ofika moipafi yange, ndelenee olupe layo inandi li dimbulukwa. Nda uda ondaka tai nongofola, tai ti: 17‘Omunhu ta dulu tuu okukala omuyuki koshipala shaKalunga? Omulumenhu ta dulu tuu okukala omukoshoki koshipala shOmushiti waye? 18Tala, Ye ite lineekele ovapiya vaye, nomovaengeli vaye ota mono ombedi. 19Unene hano mwaava hava kala momatwali edu, neefina dokukala kwavo odi li mondwi! Vo otava teyaulwa po ngaashi eenhwishi, 20opokati kongula nonguloshi tava teyaulwa po. Vo otava hanaunwa po fiyo alushe ndele kape na ou te va dimbulukwa. 21Ndishi: eengodi dofaila yavo tadi mangululwa, ndele tava fi vehe nounongo.’
Currently Selected:
JOB 4: OKYB
Highlight
Copy
Compare
Share
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
