JOB 3
3
Efiku lokudalwa kwaye Job te li tula omutima
1Opo nee Job a makula okanya kaye ndele ta tula omutima efiku lokudalwa kwaye. 2Ndele Job okwa hovela ndele ta ti:
3Efiku nda dalwa, nali kane, noufiku winya kwa tiwa: “Okaana okamati ka dalwa!” 4Efiku olo nali ninge omulaulu. Kalunga kokombada ehe li pule, nouyelele uhe li minikile. 5Nau kwetiwe komilaulu nokomudidimbe wefyo. Oshilemo shilaula nashi ke li uvike. Aishe oyo tai laulike efiku, nai li tilife. 6Oufiku winya nau hakanwe po komilaulu. Liha hafe pamwe momafiku omomudo. Li ha valulwe momafiku eehani. 7Heeno, oufiku winya nau kale ongadji. Mwaau muha udike ekuwililo. 8Ovo hava tula omutima omutenya, naavo yo ve u tule omutima, ovo tava pendula Leviatan. 9Eenyofi dongula dalo nadi laulikwe, lo li teelele ouyelele itau uya. Lo liha mone eefeleisho deluwa, 10osheshi lo inali idilila nge po oivelo yoshidalelo ndele inali holeka oudjuu momesho ange. 11Omolwashike inandi fila mo mekolo lameme? Omolwashike inandi fuda mo omhepo yange mokudja kwange medimo? 12Omolwashike eengolo da tambula nge, nomolwashike omavele ndi a nyame? 13Osheshi ame ngeno paife handi nangala ndele handi kala nombili ngeno nda kofa ndele nda mona etulumuko 14pamwe neehamba nomalenga ounyuni, oo e litungila eeshungongulu, 15ile pamwe novakulunhu voshilongo va kala ve noshingoldo, ovo va yadifa eengulu davo oisiliveli; 16ile ngaashi edimo la wa mo, la pakwa ngaashi ovana inava mona ouyelele. 17Oko ovahenakalunga tava efa okukolokosha, ndele ovo va loloka ohava tulumukilwa ko. 18Eenghwate adishe di nombili, ihava udu ondaka yomufininiki. 19Omufyoona nomunenenhu ove li ko va faafana. Nomupika a efiwa, ehe fi vali womwene waye.
Omolwashike Kalunga ta hapupalifa omafiku aavenya hava djuulukwa efyo
20Omolwashike Ye ota pe omufininikwa ouyelele, nomwenyo kwaava ve u nyikila oluhodi? 21Ovo hava teelele efyo ndelenee itali uya, vo have li teelele unene komesho yemona la holekwa. 22Ovo tava hafe nokushambukwa nokunyakukwa ngeenge tava mono ombila. 23Omolwashike ta yandje ouyelele komulumenhu e nondjila ya holekwa, komulumenhu ou Kalunga e mu kondeka keembinga adishe? 24Osheshi okukema kwange kwa ninga omungome wange. Okulila kwange taku kunguluka ngaashi omeva. 25Osheshi osho nde shi haluka, sha hanga nge naasho nde shi tila, sha ningilwa nge, 26fimbo inandi mona efudo nombili netulumuko, ouyehame we uya vali.
Currently Selected:
JOB 3: OKYB
Highlight
Copy
Compare
Share
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
