JOB 39
39
Omwene ta twikile okupopya
1“Efiku oupundja tava dala u li shii, ho nangele okufetwa kwoholongo? 2To vale tuu eehani dado doufimba, nefiku tadi dala u li shii? 3Odo tadi litonyene poshi ndele tadi pitifa mo oludalo, nokufetwa kwado kwa xula po. 4Oludalo lado tali pame ndele tali kulile momufitu, tali i nokwiililila ndele itali aluka vali.
5“Okafino komofuka, olyelye e ka pitifa mokalilifa? Olyelye a mangulula oimangifo yongolo? 6Oyo nde i pa ombuwa onhele yokukala mo nekango lomongwa i kale mulo. 7Yo otai yolo epulukuto loshilando; eingido lomushingi itai li udu. 8Ominghulo deemhunda da li oulifilo wayo, ndele tai kongo keshe eshi sha hapa.
9“Omhuulu tai ka dulika tuu kwoove i ku longele? Ile tai ka nangala tuu oufiku petemba loye lokulila? 10Omhuulu, to dulu tuu oku i manga noku i fininika noshitomo i ende momufinda woshipululo? Ile tai ku shikula mefilu loku li helela? 11To dulu tuu oku i lineekela molweenghono dayo dinene? To dulu tuu oku i fiila eliko lepya loye? 12To i lineekele tuu nokutya, tai aluka ndele tai ongele oilya yoye moshipale shoye?
13“Evava lomho ohali papama nokudana, ndelenee ohole yexuwashi otai kala mo tuu momavava nomomalwenya ayo? 14Osheshi omai ayo tai a fii po medu ndele hai a tendulifa oupyu womedu. 15Itai diladila nokutya, omhadi tai dulu oku a lyataula noifitukuti tai dulu oku a tataula. 16Oyo hai hepeke oludalo layo, la fa lo kali fi layo. Ihai lipula sha, oshilonga shayo ngeenge ye shi longa epwanga. 17Osheshi Kalunga okwe i lumbula ounongo ndele ine i pa oshitukulwa sheendunge. 18Yo eshi tai tondoka nokweendelela otai yolo onghambe nomulondi wayo.
19“Ove mbela to pe onghambe eenghono, ove mbela to djaleke ofingo yayo omulenge? 20Ove mbela to i nhukifa ngaashi oshipaxu? Okulipemba kwayo kwa tilika. 21Tai fundu mefilu ndele tai nyakukilwa eenghono dayo. 22Tai yolo oumbada ndele itai haluka, itai i onhapo eongamukonda. 23Kombada yayo onywa tai xwalakata neonga neongamukonda tali taima. 24Nokukolokota nokupulukuta ya mana mo ndele itai ka kotolwa enghuma ngeenge tali shikwa. 25Keshiko keshe lenghuma yo tai ti: Hiah! Ndele kokule nokuli tai fimbula olwoodi, nondaka inene yovakulunhu vovakwaita neingido loita!
26“Molweendunge doye mbela ekodi tali liyelula pombada pee ndele tali ingaana langhele yokoumbuwanhu? 27Ile okelombwelo loye onhwa tai ingaana pombada ndele tai tungu oshihadi shayo pombada? 28Yo otai kala keemhunda oko tai nangala, okoxulo yemanya, mohotemhunda. 29Oko tai kala nokunangela eendja dayo, omesho ayo taa tale kokule. 30Ovana vayo tava xupaele ohonde, ndele apa pe novadipawa, oyo oi li ko yo.”
Currently Selected:
JOB 39: OKYB
Highlight
Copy
Compare
Share
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
