JOB 22
22
1Opo nee Elifas, Omuteman, a nyamukula ndele ta ti: 2“Omunhu ota dulu tuu okukwafa Kalunga? Ahowe, Omunaendunge ote likwafa Ye mwene. 3Omunaenghono adishe ote lilikolele tuu sha, ove ngeenge omuyuki? Ile ta mono tuu sha, ove ngeenge to ende uhe noshipo? 4Ye ote ku handukile vati molwetilokalunga loye nomolwaasho mbela te ku hokololifa? 5Owii woye muhapu, noilonga yoye ii tai nyenge okuvalwa. 6Ove wa tambula ongaho ombabyona yovakweni, ndele vo va li hamunghele, we va dula oikutu yavo. 7Omunotelwa ino mu pa omeva okunwa, naau kwa li e udite ondjala, we mu anyena omungome. 8Ndelenee oshilongo sha ninga shomulumenhu mudjuu, nomunamadina aeke a itavelelwa okukala musho. 9Ovafiyekadi we va lekela va dje po hamakasha pwoove, nomaoko eefiye a teyaulwa po. 10Onghee hano to dingililwa keendjadja dokuyula, netilifo ole ku halukifa unene. 11Ile ku wete omulaulu? Efundja lomeva tali ku tuvike. 12Kalunga ke fi mulemule ngaashi eulu? Ndele tala eembado deenyofi, nhumbi di li moule wopombada. 13Ndelenee to ti: ‘Kalunga a shiiva shike? Ta dulu tuu okutokola e li konima yoilemo ilaula fokofoko? 14Oilemo oyo oiuviko yaye, ita mono ko, ndele ha ende kombada yevalelwa leulu.’ 15Wa hala okweenda nelila laalushe olo la endwa kovakolokoshi, 16vo va hanaunwa po efimbo lavo fimbo inali fika, ekanghameno lavo la kombwa po komeva, 17ovo va lombwela Kalunga: ‘Kala kokule nafye!’ Navali: ‘Omunaenghono adishe ta dulu oku tu ningila shike?’ 18Nande ngaha Ye okwa yadifa omaumbo avo nouwa. Ndelenee omhangela yovahenakalunga i li kokule naame. 19Ovayuki otave shi mono ndele tava hafe, nomunashipo te va sheke, ta ti: 20‘Oshili, omunandubo nafye a hanaunwa po. Ndele oyo ve i efa, oya lika komundilo.’
21“Ninga oukaume naye, u mone ombili, opo nee to ka mona ouwa. 22Tambula elongo lokanya kaye neendjovo daye di tuvikila momutima woye. 23Ove ngeenge to aluka kOmunaenghono adishe, ove to ka tungala, ngeenge to taataele kokule owii meumbo loye, 24noingoldo yoye to i ekele mondwi noshingoldo shokuOfir mokati komamanya omomulonga. 25Opo nee Omunaenghono adishe ta ningi oshingoldo shoye nonduba yoye yoshisiliveli, 26nehafo loye tali ka kala mOmunaenghono adishe, noshipala shoye to shi yelula kuKalunga. 27Ove ngeenge to mu indile, Ye ote ku udu, nomaudaneko oye to ke a wanifa. 28Keshe osho to shi diladila, u shi ninge, oto ke shi shakenifa yo, eendjila doye tadi minikilwa. 29Ondjila ngee tai filukile to ti: ‘Okulonda!’ Nomulininipiki ote mu kwafa. 30Ota xupifa yo ou e nombedi, omolwoukoshoki womake aye Ye ote mu xupifa.”
Currently Selected:
JOB 22: OKYB
Highlight
Copy
Compare
Share
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
