JESAJA 3
3
Edundakano muJerusalem
1Osheshi tala, Omwene, Omwene womatanga ovakwaita, ota kufa muJerusalem nomuJuda oilineekelwa keshe, oshilineekelwa okulineekela oilya noshilineekelwa okulineekela omeva, 2omuladi nomukwaita, omutokoli nomuxunganeki, omuxunganeki nomukulunhu; 3omukulunhu womilongoitano nelenga, omupukululi, onghulungu yeendunge dihapu nomunongo mokupopya. 4Ndele Ame ohandi va pe ovanyasha va ninge eehamba davo, novapwidi otave ke va pangela. 5Ndele ovanhu otava ka hepekafana, omunhu nomunhu, omukwao nomukwao; okaana otaka tu ondubo nomukulunhu weenghwakutoka, omufyoona ota tu ondubo nomutumbalekwa. 6Omumwaina ngeenge ta kwata omukwao meumbo laxe ndele ta ti: “Ove ou na oshikutu natango, ninga hano omupangeli wetu, nonduba yomakuma ei i tambula moshisho shoye.” 7Opo nee winya ote mu nyamukula mefiku olo: “Haame omuhakuli woipute; meumbo lange kamu na nande oilya ile oikutu; inamu ninga nge omukulunhu woshiwana.”
8Osheshi Jerusalem otashi ngumunwa po, naJuda otashi teka po, osheshi elaka lavo noilonga yavo i nondubo nOmwene, nova shinda oshipala shoshinge shaye. 9Ehololo lomoipala yavo tali va pe oushima, nomanyono avo otave a popi movanhu ngaashi Ovasodom, ihava holeke nande osha. Woo kuvo shaashi tave liningile voovene owii. 10Tongeni omuyuki nokutya, oye ota ka kala nawa, shaashi vo otava ka lya oiimati yoilonga yavo. 11Woo omudinikalunga! Ota mono oixuna, osheshi ota ka ningilwa pailonga yomake aye. 12Ovakwateli komesho voshiwana shange ovo ounona, ndele tava pangelwa kovakainhu. Akutu ovanhu vange, ovaulikili veni ovo ovapukifi, va nyona po ondjila yelila leni. 13Omwene ota fikama okutokola, ta fikama a tokole oiwana 14Omwene ote uya ketokolo ndele ta tokola ovakulunhu novapangeli vovanhu vaye: “Nye omwa likifa oikunino yomiviinyu, neliko mwe li nyeka ohepele oli li momaumbo eni. 15Oshike shi mu kwete, eshi tamu lyata ovanhu vange ndele tamu nyanyaula oipala yovafyoona?” Omwene, Omwene womatanga ovakwaita ta ti.
16Omwene okwa popya ndele ta ti: “Osheshi ovana oukadona vaSion otava shishimana, hava ende neefingo da endekwa ndele tava keuka nomesho avo, hava ende tava ngungula, ndele tava kwelengedjifa eengodo dokomaulu avo, 17opo nee Omwene ota menifa omakoko koluwewe lovana oukadona vaSion ndele te va monikifa epenge lavo.” 18Mefiku tuu olo Omwene ota ka dula ko oulenga weengodo komaulu noulenga voutango novouhani, 19nomangola omomatwi nomalyenge okomaoko noukaiwa vokulituvika oshipala, 20noumbale nomalyenge okomaulu, omakwamo oulenga neeshanga domaadi noiketi youlenga, 21oulinga vokominwe noulinga vomomayulu, 22oikutu yoivilo, omalwakani, oiliuviko nokakutu koimaliwa, 23outengelelo noikutu yoliina, omashulu noituviko youlenga.
24Ponhele yedimba liwa otapa kala otwila, ndele ponhele yomwiya tapa kala omufuwa; ponhele yeexwiki epalu; ponhele yoshikutu shoshivilo oshako; ponhele youwa wolutu okuxwika noshilimbo. 25Ovalumenhu voye otava ka fya keongamukonda novaladi voye otava file moita. 26Ndele oivelo yoye otai ka kala nokupopya nokutakuma, ndele tashi tinhwa po filu, ndele tashi kala omutumba pedu.
Currently Selected:
JESAJA 3: OKYB
Highlight
Share
Copy
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.