HOSEA 7
7
Omanyonauno aEfraim noaSamaria
1Fimbo handi velula Israel, oulunde waEfraim nowii waSamaria tau ka holoka, osheshi hava diinine okukengelela, nomulunga ta panukile mo, nongudu yoimhulu tai vake mepandavanda. 2Ndele ihave lipulapula momitima davo, nokutya Ame ohandi dimbulukwa owii wavo aushe. Paife oilonga yavo tai va dingilile yo, oi li koshipala shange. 3Nowii wavo ohau hafifa ohamba noipupulu yavo ovanenenhu. 4Vo aveshe ovatei vohombo. Vo va fediko la pupyalekwa komuteleki womungome. Ye eshi a lunga olumbololo, iha ehele vali omundilo, fiyo olumbololo alishe la pya. 5Efiku lohamba yetu omalenga a ninga omanhive koupyu womaviinyu. Otava minikafana novasheki. 6Heeno, noumbudi wavo ova ninga omitima davo da fomadiko. Omuteleki wavo womungome ta kofa oufiku aushe, nongula inene ehandu la tema. 7Ovo aveshe va hanya ngaashi ediko, ndele tava xulike po ovatokoli vavo. Eehamba davo adishe da xutuka. Mokati kavo kape na nande umwe ta ifana nge. 8Efraim ta lumbakana noiwana. Efraim a fomungome inau angulwa nande. 9Ovanailongo tava xulike eenghono daye, ndele ye ine shi koneka. Fiyo a ninga eenghwakutoka, ye ine shi koneka. 10Heeno, ounhwa waIsrael tau mu pe oushima, ndele itava alukile kOmwene, Kalunga kavo, ndele itave mu kongo, nande pe li ngaha. 11Efraim a ninga a fonghuti ilai ihe neendunge. Otava ifana Ovaegipiti, ndele tava i kuAsiria. 12Mokuya ko kwavo ohandi yale eendjadja dange kombada yavo, ngaashi eedila dokeulu handi va shilile poshi. Handi va handukile ngaashi eongalo lavo la shiivifilwa. 13Woo oonakuhenuka nge! Ovo ve nokunyonaunwa po, osheshi ova efa nge! Ame nda li nda hala oku va kulila, ndelenee vo ova fufya nge. 14Itava ifana nge komitima davo, ndelenee hava yayaana momitala davo. Ohava ongalele oilya nomaviinyu. Ove nondubo naame. 15Nande nda deula nokupameka omaoko avo, ova diladilila nge owii. 16Ova pilamena nge, ndee tava taalele koikalunga ihe na eenghono dasha. Ove li ngaashi outa wa yululuka. Ovanenenhu vavo otava ka fila keongamukonda omolweendjovo delaka lavo desheko. Onghee tava ka shekelwa medu laEgipiti.
Currently Selected:
HOSEA 7: OKYB
Highlight
Copy
Compare
Share
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
