2 EEHAMBA 6
6
Elisa ta djuukifa oshivela kombada yomeva
1Novalongwa vomuxunganeki va lombwela Elisa: “Tala, onhele ei tu li po koshipala shoye, oya finana. 2Natu yeni kuJordan, nakeshe umwe womufye na ka tale omuti waye, opo tu dike po onhele tu kale mo.” Ndele ye ta ti: “Indeni!” 3Ndelenee umwe ta ti: “Ila, u ye pamwe novapiya voye.” Nokwa nyamukula: “Handi uya.” 4Nokwa ya pamwe naavo ndele eshi ve uya kuJordan va ka omiti. 5Ndelenee fimbo umwe ta ke omuti, oshivela osha wila momeva; ndele ye ta ingida ta ti: “Akutu, omwene wange. Sho kasha li shange!” 6Nomulumenhu waKalunga ta pula: “Osha wila peni?” Ndele winya eshi e mu ulikila onhele, ye okwa teta oshiti nokwe shi ekela momeva, noshivela sha djuuka mo. 7Ndele ye ta ti: “Shi kufa po!” Nokwa nana eke laye ndele te shi kufa po.
Ovaarami tava laipikwa
8Fimbo ohamba yaAram ya li i noita ya homona naIsrael, oya kundafana novapiya vayo ndele tai ti: “Ohatu ka onga onhanda yange ponhele yonhumba.” 9Ndelenee omulumenhu waKalunga okwa shiivifila ohamba yaIsrael nokutya: “Lungama, uha ende po ponhele oyo, osheshi Ovaarami tava i ko.” 10Opo nee ohamba yaIsrael ya tuma konhele tuu oyo, omulumenhu waKalunga a tonga, nomolwayo e i londwela. Ndele yo oya li ko ya lungama. Halumwe aluke ile luvali. 11Onghee hano omutima wohamba yaAram wa tila ndele yo tai ifana ovapiya vayo ndele tai va pula: “Itamu dulu okushiivifila nge olyelye womufye e li kombinga yohamba yaIsrael?” 12Ndele umwe womovapiya vayo ta nyamukula: “Hasho omwene wange ohamba, ndelenee omuxunganeki Elisa, ou e li muIsrael ta twala eendjovo odo to di lipopile monduda yokunangala kohamba yaIsrael.” 13Ndele yo tai ti: “Indeni mu ka tale apa e li, ndi dule oku mu kwata.” Ndele ve i lombwela: “Ye oku li muDotan.” 14Onghee hano oya tuma ko eenghambe nomatemba oita netanga linene lovakwaita, ndele vo ve uya ko oufiku ndele tava kondekele oshilando.
15Ndele ongula inene eshi omupiya womulumenhu waKalunga a penduka ndele ta piti mo, tala, oshilando sha kondekelwa keenghambe nokomatemba oita. Nomupiya waye ta ti kuye: “Akutu omwene wange, ohatu ka ninga ngahelipi?” 16Ndelenee ye ta nyamukula: “Ino tila. Osheshi ava ve li pufye ovahapu, ve dule venya ve li puvo.” 17Ndele Elisa okwa indila ndele ta ti: “Omwene, pashukifa omesho aye, opo a mone ko.” NOmwene okwa pashukifa omesho omupiya waye, ndele ta mono ko, ndele divadiva, omhunda aishe i yadi eenghambe nomatemba omundilo, a dingilila Elisa. 18Ndele Ovaarami eshi ve uya kuye, Elisa okwa indila kOmwene ndele ta ti: “Denga ovanhu ava noupofi.” Ndele Ye okwe va denga noupofi pandjovo yaElisa. 19Opo nee Elisa ta ti kuvo: “Ondjila oyo hayo, noshilando osho hasho. Shikulei nge, opo ame ohandi mu twala komulumenhu tuu ou tamu mu kongo.” Ndele ye okwe va twala kuSamaria. 20Ndele vo eshi ve uya kuSamaria Elisa ta ti: “Omwene, pashukifa omesho avo, va mone ko.” NOmwene okwa pashukifa omesho avo ndele tava mono ko, ndele va li pokati kaSamaria! 21Nohamba yaIsrael tai pula kuElisa, yo eshi ye va mona: “Tate, ondi noku va dipaa tuu? Ondi noku va dipaa tuu?” 22Ndelenee ye ta nyamukula: “Ahowe, ino va dipaa. Ndishi ito dipaa ovo we va kwata eenghwate neongamukonda loye nouta woye? Tula pomesho yavo omungome nomeva, va lye ndele va nwe, ndele va dule okuya kumwene wavo.” 23Ndele okwe va telekela oitelekela inene. Ndele vo eshi va lya ndele va nwa, okwe va lekela va ye. Ndele va ya komwene wavo. NOvaarami inava ninga vali eemwiila koshilongo shaIsrael.
Ekondekelo laSamaria nexupifo lasho likumwifa
24Ndele konima Benhadad, ohamba yaAram oya ongela omatanga ayo ovakwaita aveshe, ndele tai fikama noya kondekela Samaria. 25Ndele muSamaria mwa li ondjala idjuu, osheshi venya ve shi kondekela efimbo lile fiyo omutwe wondongi tau landifwa neesekeli omilongo hetatu doisiliveli neegrama omafele atatu domatudi eenghuti tadi landwa neesekeli nhano doshisiliveli. 26Ndele fimbo ohamba yaIsrael tai ende kombada yekuma, omukainhu umwe okwe i ingida ta ti: “Kwafa, omwene ohamba!” 27Ndelenee yo oya nyamukula: “Omwene ngeenge ite ku kwafa, ame ohandi ku kwafa ngahelipi? Moshipale ile moshikolelo shomiviinyu?” 28Ohamba ye mu lombwela vali: “Oshike shi ku kwete?” Nokwa nyamukula: “Omukainhu ou okwa lombwela nge: ‘Pe nge omona woye, tu mu lye nena. Opo nee mongula tu lye omona wange.’ 29Onghee hano twa paka po omona wange ndele twe mu lya. Ndelenee efiku la shikula, eshi nde mu lombwela: ‘Pe nge omona woye fye tu mu lye,’ ye okwa holeka omona waye.” 30Ohamba eshi ya uda eendjovo domukainhu, yo oya pombaula oikutu yayo, fimbo tai ende kombada yekuma, ovanhu va mona nhumbi ya djala koshi yoshikutu, oshikutu sheefya kolutu layo. 31Ndele yo tai ti: “Kalunga na ningile nge shonhumba noshongadi, ngeenge omutwe waElisa yaSafat tau ka kala kumwe nofingo nena.”
32Ndele Elisa fimbo ta kala omutumba meumbo laye novakulunhu va kala omutumba puye, ohamba ya tetekelifa omulumenhu. Ndelenee omutumwa fimbo ine uya kuye, Elisa ta ti kovakulunhu: “Mu wete ko tuu nokutya, omona womudipai ta tumine nge a tete nge ofingo? Taleni! Omutumwa ngeenge te uya, idileni po oshivelo, mu mu fengenyene po. Omifindo deemhadi domwene waye itadi mu shikula?” 33Fimbo ye ta popi naavo, ohamba ye uya kuye, ndele ta ti: “Tala, omupya ou tau di kOmwene. Omolwashike ndi teelele vali Omwene?”
Currently Selected:
2 EEHAMBA 6: OKYB
Highlight
Copy
Compare
Share
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
