2 EEHAMBA 12
12
Epangelo laJoas
1Momudo omutiheyali waJehu, Joas okwa ninga ohamba, nokwa pangela muJerusalem omido omilongo nhee. Nedina la ina la li Sibja wokuBerseba. 2Ndele Joas okwa ninga osho sha yuka momesho Omwene omafiku aye aeshe osheshi omupristeli Jehoiada e mu pukulula. 3Ashike, oikulundu yokuyambela inai hanaunwa po. Ovanhu va yamba natango ndele va twimina koikulundu.
4Ndele Joas okwa lombwela ovapristeli: “Oimaliwa aishe tai etwa kongulu yOmwene ngaashi eeshali diyapuki, oimaliwa i noshilonga, noiyandjiwa yovanhu pakuyandja kwomudo, noimaliwa aishe oyo omunhu te i eta kehalo laye liwa kongulu yOmwene, 5ovapristeli ve i tambule, keshe umwe, kwaava ve shaafane, ndele vo ve nokuvandeka eenhele domongulu da nyonauka, keshe apa onhele ya nyonauka tai monika.” 6Ndelenee momudo omutimilongo mbali nomutitatu dohamba Joas ovapristeli inava vandeka natango eenhele da nyonauka domongulu, 7ohamba ya ifana omupristeli Jehoiada novapristeli, ndele tai ti kuvo: “Omolwashike inamu vandeka eenhele da nyonauka mongulu? Hano paife, inamu tambula vali oimaliwa kwaava mu va shii, ndelenee i nokuyandjelwa okuvandeka eenhele da nyonauka domongulu.”
8Ndele ovapristeli ve shi itavela nokutya, itava tambula vali oimaliwa kovanhu, ndelenee itava ka vandeka yo eenhele da nyonauka mongulu. 9Opo nee omupristeli Jehoiada a kufa oshikefa ndele ta tyuula ombululu moshituviko shasho nokwe shi tula poaltari kombinga yokolulyo layo, omunhu ngeenge te uya mongulu yOmwene. Novapristeli ava va nangela oshivelo va tula muyo oimaliwa aishe ya etwa kongulu yOmwene.
10Ndele eshi va mona nokutya, moshikefa mwa li oimaliwa ihapu, omushangi wohamba e uya pamwe nomupristeli omukulunhu, ndele va tula kumwe ndele va vala oimaliwa oyo ya monika mongulu yOmwene. 11Opo nee oimaliwa ei ya valwa ve i yandja kovalongi voilonga ava va tulwa po va pashukile oshilonga shomongulu yOmwene, ndele vo ve i yandja ngefuto kovapangeli nokovatungi ava va longa mongulu yOmwene, 12nokovatungi vomakuma novahongi vomamanya, nokulanda oipilangi nomamanya a hongwa, opo va vandeke eenhele da nyonauka mongulu yOmwene, heeno, ashishe osho shi nokuyandjwa omolwongulu i vandekwe. 13Ndelenee noimaliwa oyo ya etwa kongulu yOmwene, inava ningila ongulu yOmwene oiyaxa yoisiliveli nomikonda nomaholo nomanghuma, nosho yo oinima yoingoldo ile yoisiliveli inai ningwa, 14ndelenee ve i yandja kovalongi voshilonga ve i longife mokuvandeka ongulu yOmwene. 15Novalumenhu va pewa oimaliwa, ve i pe ovalongi voilonga, inave i valifwa, osheshi vo ova li ve shi kulineekelwa, ovadiinini. 16Oimaliwa yokuvelombediyambo noimaliwa yetimbayambo inai etwa kongulu yOmwene, osheshi oyo ya ninga yovapristeli.
Hasael a hala okuhomona Jerusalem Okufya kwaJoas
17Pomafiku enya Hasael, ohamba yaAram, ya fikama tai lwifa Gat ndele tai shi nangala. Opo nee Hasael a hovela okuhomona Jerusalem. 18Opo nee Joas, ohamba yaJuda, ya kufa eeshali adishe diyapuki odo da yapulwa kooxe Josafat naJehoram naAhasia, eehamba daJuda, pamwe neeshali daye mwene noshingoldo ashishe osho sha monika momalimba emona lohamba ndele te di tumine Hasael, ohamba yaAram. Opo nee winya a dja po puJerusalem. 19Noinima imwe oyo tai hepaulula Joas naaishe e i ninga, inai shangelwa mbela membo lomafimbo eehamba daJuda? 20Novapiya vaye va fikama ndele ve mu hangakena ndele va dipaa Joas mongulu yaMillo, yo i li oko haku iwa kuSilla. 21Josakar yaSimeat naJosabad yaSomer, ovapiya vaye, ve mu dipaa. Nokwa pakwa pooxe moshilando shaDavid, nomona waye omumati Amasia a ninga ohamba ponhele yaye.
Currently Selected:
2 EEHAMBA 12: OKYB
Highlight
Copy
Compare
Share
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
