2 EEHAMBA 11
11
Atalia ohamba onghainu yaJuda nefyo layo
1Atalia, ina yaAhasia, eshi a mona nokutya omona waye omumati okwa dipawa, okwa yandja elombwelo ovakwahamba aveshe vomuJuda va dipawe. 2Ndelenee Joseba, omona okakadona kohamba Jehoram, omumwaina waAhasia, okwa kufa Joas, okaana okamati kaAhasia nokwe ka kufa mo movana ovamati vohamba, ava va li ve nokudipawa, nokwe ka twala nomunyamifi wako mondjuwo yokunangala. Osho ngaha ve ka holeka Atalia, onghee ko inaka dipawa. 3Ndele oko ka li ka holekwa mongulu yOmwene omido hamano, fimbo Atalia a pangela oshilongo. 4Ndelenee momudo omutiheyali Jehoiada okwa ifana kuye mongulu yOmwene ovanefele vOvakari naavo vovakwaita ovananhapo, ndele ta ningi ehangano navo pakwaana mongulu yOmwene, nokwe va ulikila okaana okamati kohamba. 5Opo nee te va lombwele, ta ti: “Mu nokuninga ngaha: Oshitukulwangudu shimwe shomoitukulwangudu itatu shomunye ava mu nolufo okunangela mEshabata, shi nokunangela pongulu yohamba, 6noshitukulwangudu oshitivali shomoitukulwangudu itatu poshivelo shaSur, noshitukulwangudu oshititatu 7Ndele eengudu mbali dimwe deni nokutya, aveshe ovo va dimbuka okunangela mefiku lEshabata, nava nangele ongulu yOmwene pohamba. 8Ndele mu nokukala ofika mwa dingilila ohamba, keshe umwe e noiti yaye meke laye, ndele keshe umwe ta pumine mo momhola na dipawe. Ndele mu nokukala pohamba, yo ngeenge tai di mo ile tai uya mo.”
9Ovanefele va ninga ngaashi omupristeli Jehoiada e va lombwela, ndele keshe umwe okwa kufa ovalumenhu vaye, ava ve nolufo okunangela navenya va dimbuka okunangela mefiku lEshabata, ndele ve uya komupristeli Jehoiada. 10Nomupristeli okwa yandja kovanefele omaonga noikelelifo yohamba David, oyo ya li mongulu yOmwene. 11Novakwaita ovananhapo, keshe umwe noiti meke laye, va kala ofika okudja kombinga yokoumbuwanhu wongulu, fiyo okombinga yokoumbangalanhu wongulu koaltari nokongulu, va dingilila ohamba. 12Opo nee Jehoiada okwa eta Joas pondje, nde te mu dike oshishani nokwe mu pa embo lomhango youhamba. Ndele ve mu vaeka, nove mu ninga ohamba. Ndele ovanhu ova pandula nomake avo ndele tava ti: “Ohamba nai kale nomwenyo!” 13Atalia eshi a uda ondaka yovakwaita ovananhapo noyovanhu, okwe uya kongulu yOmwene. 14Ye eshi a mona ohamba tai kala ofika pongudi panghedi yoshilongo, pamwe novakulunhu novashiki vomanghuma pohamba, fimbo ovanhu aveshe vomoshilongo va hafa ndele va shika ouxumba, Atalia okwa pombaula oikutu yaye ndele ta ti: “Ekengelelo! Ekengelelo!” 15Ndelenee omupristeli Jehoiada okwa li ina hala Atalia a dipaelwe popepi notembeli. Onghee a ifana eendjai doita, nde ta ti: “Mu kwateni, mu mu pitifeni mo a upatwa kovaameni vomikweyo mbali. Ndele dipaeni keshe ou ta kendabala oku mu xupifa.” 16Opo nee ove mu kwata, ndele eshi va fika pomhito yOshivelo Sheenghambe mombala, ove mu dipaa.
17Ndele Jehoiada okwa ninga ehangano pokati kOmwene nohamba novanhu, vo va ninge oshiwana shOmwene. Nosho yo pokati kohamba noshiwana. 18Ovanhu aveshe va ya motembeli yaBaal, ndele tave i ngumauna po, nova tataula po oaltari noiyelekelafano, nova dipaela Mattan, omupristeli waBaal, komesho yoaltari. Omupristeli Jehoiada okwa tula vali ovanangeli pongulu yOmwene. 19Opo nee a kufa ovanefele novakulunhu vOvakari novakwaita ovananhapo novanhu aveshe vomoshilongo. Ndele va kufa ohamba mongulu yOmwene ndele mokupita moshivelo shovakwaita ovananhapo ve i twala mongulu yohamba ndele ve i kaleka omutumba kolukalwapangelo. 20Novanhu aveshe vomoshilongo va hafa, noshilando sha tulumukwa. Ndelenee va dipaa neongamukonda Atalia meumbo lohamba. 21Omido daJoas da li heyali, ye eshi a ninga ohamba.
Currently Selected:
2 EEHAMBA 11: OKYB
Highlight
Copy
Compare
Share
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
