HEB 4
4
विश्रामलोंग प्रवेश
1दिनिचांग परमेश्वर विश्राम स्थानलोंग फोयेदेंक वान तीकेल शिक्कीनेद अभिवचन इप्पुड पण उंडाद इंगा दिनिचांग मी दिंटल्योन्टोड यवाडाना भटकाशी फोवाराद आंका काळजी तिस्कोंडा. 2येनटीक की मनाक पण येशु ख्रिस्तन बद्दल सुवार्ता शप्पेदेंक वच्चीनाद यल्ला आदी इस्राएल मंदीक शप्पेदेंक वच्चीन्या. पण याद वचन वार इनीर दानता वारकी येमीच फायदा काक फो येनटीक की वार आदी वचन इनीर पण दान मिंदा विश्वास फेट्टालेद.
3दिनिचांग मनाम यवार विश्वास फेटनाम वार विश्राम स्थानलोंग फोयेतोर उंडाम. पण यवार विश्वास फेट्टार वार बद्दल परमेश्वर इल्ला आनीनाड,
“निन ना कोफामला वट्टु येस्केन इल्ला आंटीन,
वार ना विश्राम स्थानलोंग यप्पुडुच फोई शकायाक फोयार”
दुन्याम बनाय मतीनेंका वानी फनुल आय फोयन्या तरी वाड इल्ला आन्या. 4येनटीक की वाड सातवा दिनमु बद्दल आनीनाड की:
“सातवा दिनमुनाड परमेश्वर वानी आन्नी फनुल शेशी विश्राम शेशा.”
5इंगा वापस वाड आंटाड,
“वार ना विश्राम स्थानलोंग यप्पुडुच फोई शकायाक फोयार.”
6या इस्राएली मंदीक पहिलाने सुवार्ता शप्पेदेंक वच्चीन्या वारदी वार अविश्वास इचांग दांटल्या प्रवेश काक फोया, पण इदी खरेम उंडाद की, काही मंदी आ विश्राम स्थानलोंग फोयार. 7वार इचांग परमेश्वर इंगा वगा वेळ ठराय मतीनाड वाड दान “इबदोडदी दिनमु” आंका आंटाड इंगा पहिला शप्पीनलेका इन्नी नाळा बाद वाड दाविद तीकेल इल्ला आंटाड,
“इबद, जर मीर वानदी आवाज इन्यार,
तर मी मनलु बिरसु शेयाकुंडा.”#स्तोत्रसंहिता 95:7-8.
8येनटीक की जर यहोशवाड वारनी परमेश्वर इच्चीने विश्राम स्थानलोंग येका फोइंटे, तर परमेश्वर इंगोगो नाड बद्दल वापस माटलाडा कुंटुन्या. 9दिनिचांग तेल्चकोंडा की परमेश्वर मंदी इचांग इप्पुड पण शब्बाथ दिनमु बाकी उंडाद. 10येनटीक की यवाड पण परमेश्वर विश्राम स्थानलोंग फोयताड, वाड वान स्वता फनुलाकेल विश्राम शेस्ताड. यल्ला परमेश्वर वान फनुलाकेल विश्राम शेशा.
11दिनिचांग आ विश्राम स्थानलोंग फोयेदेंक मनाम आय्यी आंता प्रयत्न शेयाला. दिनिचांग की, यवारुच इस्राएल मंदी यल्ला आज्ञा तेम्पीर वार लेका शेशी फडी फोवाराद.
12येनटीक की परमेश्वरदी वचन सजीव, सक्रीय इंगा यादु पण दुधारी तलवार काना जास्त धारदार उंडी जेम इंगा आत्मा, सांधे इंगा मजा इरनी अलग शेशी आरपार आयताद इंगा मनलोन विचारलाद इंगा भावनालदी पारख शेस्ताद. 13इंगा परमेश्वरकी दुन्यामलोन आंता मंदी बद्दल आंताच यरका उंडाद, वान देगाटेल दागालेद इंगा यवान देगार मनाक आन्नी माटलाद हिशोब इच्चेद उंडाद, आ परमेश्वर मुंदार आन्नी माटलु उघड इंगा स्पष्ट उंडाय.
प्रभु येशुड आंदार काना महान महायाजक
14दिनिचांग, यप्पुड मना येशुड परमेश्वर कोडकु इल्लोन महान महायाजक मनाक शिक्कीनाड इंगा यवाड स्वर्गलोंग फोयनाड, इल्ला जे विश्वासदी कबुली मनाम शेशीनाम आदी मजबुत फट्टी फेटना. 15येनटीक की मनाक शिक्कीनोड महायाजक इल्ला लेड, यवाड मना कमजोरी मिंदा दया सुपीयाक फोई. पण मनाक इल्ला महायाजक शिक्कीनाड की, यवाड मना लेकाने आन्नी प्रकारलोन मोहला अनुभवला लोन्केल फोया. तरी पण वाड पुर्णपने पाप लेन्दे निलच्या. 16तर दांडा मनाम परमेश्वर कृपा सिंहासन देगार हिम्मतता फदाम. दिनिचांग की, मनाक गरज उंडी आप्पुड मनाक मदत शिक्काला आंका मनाक दया इंगा कृपा शिक्काला.
Currently Selected:
HEB 4: WNT
Highlight
Copy
Compare
Share
Want to have your highlights saved across all your devices? Sign up or sign in
