HEB 2
2
तारण तीकुड दुर्लक्ष शेशे बद्दल चेतावनी
1दिनिचांग या सत्य बद्दल मनाम आंदार इंटीम दान तीकुड मनाम जास्त लक्ष इयाला. दिनिचांग की, मनाम दान तीकेल भटकाशी धुराम यल्ली फोवाराद. 2येनटीक की वचनला येम स्वर्गदुतला तीकेल शप्पेदेंक वच्या आदी इंता प्रभावी उंड्या इंगा जर प्रत्येक आज्ञा तेम्पेदेंक इंगा प्रत्येक वाईट फनुलाक योग्य आदी शिक्षा शिक्या. 3तर मनाम जर इल्ला महान तारण तीकुड दुर्लक्ष शेस्तीम, तर मनाम शिक्षा तीकेल यल्ला इड्याम? इदी तारणदी पहिला घोषणा प्रभु येशु ख्रिस्तड शेशा. यवार वानदी इनीर वार तीकेल मनाक इदी माटा यरका आय्या 4दिन बद्दल परमेश्वर पण चिन्हलाता, अद्भुत फनुलाता इंगा अलग-अलग चमत्कारलाता, वान साक्षलान जोडशा इंगा वान इच्छा लेका पवित्र आत्माय दानलु फंचीगास इच्या. 5मनाम या भविष्यलोन दुन्याम बद्दल माटलाडतुनाम, दान मिंदा राज्य शेशेदेंक परमेश्वर स्वर्गदुतलान फेट्टालेद. 6पवित्र शास्त्रला वगा जागाला इल्ला राशीनेद उंडाद,
“मनशी यवाड उंडाड की वानदी नु चिंता शेस्ताव?
लेकाते मनशी कोडकु यवाड उंडाड की वानदी नु विचार शेयाला?
7काही वेळ इचांग नु वान स्वर्गदुतला काना किंदीक शेस्ती
नु वानकी गौरव इंगा सन्मानदी मुकुट फेट्टीनाव
8नु आंताच वान काळा किंदा फेटती.”#स्तोत्रसंहिता 8:6; १करिंथ 15:27.
यप्पुड परमेश्वर आंताच वान काळा किंदा फेट्या इंगा यादुच माटा वान अधिन फेट्टेद इडवालेद. पण इप्पुड नंताक आंताच वान अधिन आयनेद मना कंडलाक कमसाद. 9पण मनाम येशुन सुस्ताम, यवान परमेश्वर काही वेळ नंताक स्वर्गदुतला काना पण किंदीक शेशीन्या. वाड मना इचांग साव सहन शेशा आंका इप्पुड मनाम वान, गौरव इंगा सन्मानदी मुकुट फेटकुन्योड सुस्ताम येनटीक की परमेश्वर कृपाता येशुड आंता मानवजाती इचांग सच्ची फोया. 10परमेश्वर यवाड आन्नी माटलु बनायमत्या इंगा यवान गौरव इचांग आन्नी माटलु उंडाय, वानकी इद्दे शिंगार वाटाशा की यप्पुड वाड शेंगेम कोडकुलान इंगा कुतुरलान गौरवला सहभागी शेशे इचांग येशुन मंदीद तारण शेशेतोड बनाय मतेदेंक वान दुख सहन शेशे माध्यमता परिपुर्ण शेशा. 11वाड यवाड मंदीन पवित्र शेस्ताड इंगा यवार पवित्र आयनार, वार आंदार आब्बाड वक्काडे उंडाड आंका वानकी वारनी तम्मुड इंगा शेल्याल आंका आनेदेंक शिग्गु काद. 12वाड आंटाड,
निन नीद फेर ना आक्का-तम्मुळ्ळाक शप्यान
निन आंदार मुंदार नीद स्तुती शेशान.#स्तोत्रसंहिता 22:22.
13वाड मुंदारकी आंटाड,
“निन नाद विश्वास वान मिंदा फेट्यान.”
इंगा वाड वापस आंटाड,
सुड, निन इंदु उंडान आ विश्वासी आक्का-तम्मुळ्ळा जताक यवारनी परमेश्वर नाक इच्चीनाड.#यशया 8:17; 12:2.
14येनटीक की परमेश्वर बिळ्ळु रक्ताम इंगा कंडाता बनाशीनार आंका येशुड पण वार लेका रक्ताम इंगा कंडाटोड आय्यी वच्या, वाड इदी दिनिचांग शेशा की, यवान देगार सावदी अधिकार उंडाद, आ शैतानदी सावता नाश शेयाला. 15इंगा या मंदी आयुष्यभर सच्चेद यरपु फेटकेन वान दासत्व बंधनला जगास्तुनीर वारनी स्वतंत्र शेयाला. 16येनटीक की इदी खरेम उंडाद, प्रभु येशुड स्वर्गदुतलाद मदत शेयाड, पण यवार अब्राहाम वंश लोन्टोर उंडार वारदी वाड मदत शेस्ताड, 17दिनिचांग परमेश्वर सेवाला दयाळु इंगा विश्वासयोग्य इल्ला महायाजक आयेदेंक इंगा मंदी पापला इचांग प्रायश्चित शेशेदेंक येशुनकी आन्नी माटलाला वान आक्का-तम्मुळ्ळा लेका आय्येद शेंगेम आवश्यक उंड्या. 18येनटीक की येशुड स्वता परीक्षाल इंगा दुखलान सहन शेशा, यवारदी इप्पुड परीक्षा आयतुनाद वारकी मदत शेशेदेंक वाड समर्थ उंडाड.
Currently Selected:
HEB 2: WNT
Highlight
Copy
Compare
Share
Want to have your highlights saved across all your devices? Sign up or sign in
