1TI 3
3
अध्यक्षद योग्यता
1इदी वचन विश्वासयोग्य उंडाद, जर यवानकी अध्यक्ष आय्येद इच्छा उंडाद तर वाड शिंगार फनीद इच्छा फेटताड. 2इदी आवश्यक उंडाद की अध्यक्ष इड निर्दोष, वगा वडती मोगुड, शांत, धीर्याम फट्टेतोड, सभ्य, पाहुनचार शेशेतोड, नेरपेदेंक निपुण उंडाला. 3सराय तागेतोड इंगा मतेतोड (वाईट माटलाद आवड फेट्टेतोड) लेवाराद, तर वाड सौम्य, जगडाम आडेनोड, दुडलाद लालुच फट्टेतोड लेवाराद. 4मना इल्लुन शिंगार नडपीच्चेतोड, पुर्ण गंभीरपणे स्वता बिळ्ळान अधिन फेट्टेतोड इल्ला उंडाला. 5जर यवानकी आना स्वता इल्लुद काळजी तिस्कुना दाद तर वाड परमेश्वर मंडळीद काळजी यल्ला तिस्कुनी? 6वाड वगा कोत्ता शिष्य लेवाराद, इल्ला कावाराद की वाड घमंड शेशी शैतान लेका वानकी दंड शिक्काराद. 7वानदी मंडळीलोन बैटुड मंदीला शिंगार फेर उंडाला. दिनिचांग की वानदी निंदा कावाराद इंगा वाड शैतान जाळीला फसायाराद.
सेवकदी योग्यता
8आल्ले सेवकलाक पण गंभीर कावाबेक, वार रोंड मुतुलावोर इंगा सराय तागेतोर बेकालेद इंगा अनितीता दुडलु कमाशी श्रीमंत आय्येद वारकी आवड लेवाराद. 9पण परमेश्वर येम मनाक प्रकट शेशीनाड आ विश्वासदी रहस्य वार शुद्ध विवेकता सुरक्षित फेट्टाला. 10पहिला वारदी परीक्षा कावाला, आप्पुड जर वार निर्दोष ठरास्ते, वार सेवकदी फनी शेयाला. 11इल्ले आंड्योर पण गंभीर उंडाला, वार चुगली शेशेतोर लेवाराद. तर सभ्य इंगा प्रत्येक बाबतीला विश्वासयोग्य उंडाला. 12प्रत्येक सेवक वगा वडती मोगुड उंडाला इंगा वान बिळ्ळाद इंगा परिवारदी शिंगार काळजी तिस्कुनाला. 13येनटीक की यवार सेवकदी फनी शिंगार शेशी शकास्तार, वार स्वता इचांग शिंगार पदवी इंगा ख्रिस्त येशुन मिंदुड विश्वासला शेंगेम हिम्मत प्राप्त शेस्तार.
14नाक आशा उंडाद की निन लग्गाने नी तीकुड वच्या, तरी पण निन निक इदी पत्र दिनिचांग रास्तुनान की, 15जर नाक वच्चेदेंक वेळ आय्या, तर परमेश्वरदी भवन आंटे जिवंत परमेश्वरदी मंडळी याद सत्यद खंबा इंगा जोता उंडाद, आ परमेश्वर भवनला नीक यल्ला वागायाबेक, इदी निक तेल्वाला.
16सुभक्तीद रहस्य निर्विवाद फेद्दाद उंडाद
वाड यवाड शरीर रुपला प्रकट आय्या,
वाड आत्माता नितीमान ठराशा,
इंगा वाड परमेश्वर दुतलाक कमशा,
यहुदी लेनोरला वानदी घोषणा शेशीर,
दुन्याम वान मिंदा विश्वास फेट्या,
इंगा वान गौरवला फैनिक तिस्कुनेदेंक वच्या.
Currently Selected:
1TI 3: WNT
Highlight
Copy
Compare
Share
Want to have your highlights saved across all your devices? Sign up or sign in
