मती 26

ईसु गोज् तआ उपाय लगाव

(मरकुस 14:1–2; लुका 22:1–2; जोहन 11:45–53)

1नोआँ गोटा सिछा चबा कनते ईसु अनेज् चेलाकु कथावा लअय, 2#उठलु 12:1–27“आपे ठुवा यतेअपे चि बारसिञ तयोम पसका परब होयावोः अवला इदानआँ। जोटोः मनवाँ होपोन कुरुस रे ठोकावी तआ सबे अवला इदानकुआ।”

3तब होना बेरा मुध पुरोहितकु जोटोः बबा-तता जहुदी होड़कु रेनकु नेता कायफा ञुमुन मुध पुरोहित रआ ओड़ाः बंगला रआ राच रे जवार लेनाकु, 4जोटोः हुँकू ओका उपाय ते हों ईसु सब् केते गोजे तआ जोजना बनाव याते दोहोलेनाकु। 5सेकरो रे हों हुँकू कथायाते दोहोलेनाकु, “अबुन परब हिला नोंका अलो करावे चही, कोवन दो हो सके होड़कु रे हो-हला होयाव कोओ।”

बयतनियाह रे ईसु रआ अभिसेक

(मरकुस 14:3–9; जोहन 12:1–8)

6जब ईसु सिमोन छेवड़ा रोग रआ ओड़ाः बयतनियाह डीही रे दोहोलेनय। 7#लुका 7:37,38दो मियड् लंञी पुंडी पिलीब् दीरी लेकाना रआ बोतोल रे कीमती सोहों सुनुम अगुकेते वेज्‌लेनय, ईसु मंडी जोमोगोन दोहोनय चि हुँनि रआ बोहोः तेङ रे दुल लअय। 8जब हुँनि रेनकु चेला नोंका ञेल लिदियाकु दो कयरव कनते कथा लआकु, “सोहों सुनुम नोंका चितान तआ नास यते अमः?” 9“नोआँ सोहों सुनुम बढ़ियाँ दाम ते केजा कनाअने जोटोः होना टका गरीब दुखी होड़ तआ हटिञ केदाअने!”

10ईसु नोआँ ठुवा केदय चि हुँकू चितानकु कथायना, जोटोः हुँकू कथावा लिड्कुअय, “आपे मुनी लंञी चितान तआ परेसान यतियपे? नुई दो इञः तआ बढ़ियाँ काम कराव तदय। 11#नियम 15:11चितानतआचि गरीब दुखी होड़ दो रोज आपे तुली दोहोनाकु बकिन इञः आपे तुली सदा हिला एरोइञ दोहोलेना। 12नुई इञः होड़ो रे सोहों सुनुम दुल केते इञः होड़ो हार रआ तेयारी यतेअय। 13आपे सनारी कथावइत पेअइञ चि गोटा दुनियाँ रे जे एडे बढ़ियाँ दुखमा रआ परचार होयावओ, होंडे नुई रआ इयाद रे जे नुई कराव तड्अय, हुँनि रआ चरचा होयावओ।”

जहुदा ईसु एर सबे तआ आँ लअय

(मरकुस 14:10–11; लुका 22:3–6)

14तब जहुदा इस्करियोती हुँकू बराह चेलाकु मे से मिहोंड़ दोहोलेनय, मुध पुरोहित ठँवरे सेनलेनय जोटोः हुँनि कथावा लअय 15#जख 11:12“अगर इञः आपे तआ ईसु एर सबेयाइञ होले आपे इञः तआ चिताना ओवाञापे?” तब हुँकू जहुदा तआ तीस चंदी ठड़रा टका ओवा लिदियाकु। 16हिना बेरा एतेन जहुदा ईसु धोखा ते एर सबी तआ मोकाय ञेल यन दोहोना।

ईसु अनेज् चेलाकु तुली पसका भोज रे

(मरकुस 14:12–21; लुका 22:7–14,21–23; जोहन 13:21–30)

17बेगर जोजो लआ रुटी परब एतेन पहिल दिन ईसु ठँवरे चेलाकु वेज् कनते हुँनि सोधाव लिदियाकु, “अमः ओकारेम चहावओ चि आले सेन कोते पसका परब रआ मंडी तेयारेयाले?”

18“हुँनि कथा रुवाड़ लअय सहार रे हुँनि होड़ एडे सेनपे” “जोटोः हुँनि कथावाइपे, गुरु कथा तड्अय, ‘इञः रआ बेरा ठँवरे सोदोरतना, इञः अपन चेलाकु तुली अमः रआ ओड़ाः रे पसका परब मनाव अवला इदानिञा।’”

19फिन चेलाकु हेनेन लेका कराव लआकु जे लेका ईसु बतलाव दोहोलअय जोटोः हुँकू पसका भोज रआ सरा-जमा लआकु।

20अयुब् जुवार ईसु बरहो चेलाकु तुली जोमोः दुड़ूः दोहोनय। 21जब हुँकू जोमोः गोन दोहोनाकु दो ईसु कथा लआ, “इञः आपे सनारी कथावा यतपेअइञ, आपे मे से मिहोंड़ इञः धोखा ते एर सबे ञपे।”

22हुँकू अगम उदास यनाकु जोटोः मिहोंड़-मिहोंड़ ते सोधव लिदियाकु, “परभु, हुँनि इञः हके चि, बतलावेमी तना हुँनि इञः हके?”

23 # सिरिञ 41:9 ईसु कथा रुवाड़ लअय, “जे इञः तुली थाड़ी रे जोमोः तआ अती दोहो तड्अय हुँनि धोखा ते एर सबे ञाय। 24मनवाँ होपोन दो सेनाय ही, जे लेका धरम पोथी रे हुँनि बारे ओल लआ इदानआँ। बकिन ओह हुँनि होड़ तआ जेकर दोवसते मनवाँ होपोन एर सबे अवलाया। हुँनि होड़ तआ बेस होयाव कनाअने चि हुँनि रआ जनम अलो होयाव दोहोलेन!”

25तब हुँनि एर सब् अवला जहुदा कथा बिरीड् लेनय, “ओय गुरु, तना हुँनि इञः हके?”

ईसु हुँनि कथावा लअय, “आँ, नेंकाआ जे लेका अमः कथायतेअम।”

परभु भोज

(मरकुस 14:22–26; लुका 22:15–20; 1 कोरिन्थी 11:23–25)

26जब हुँकू जोमोः गोन दोहोलेनाकु, ईसु रुटी सब् केते कथालअय, जोटोः परमेसर एतेन आसीस कोय केते केचाः लअय, फिन हुँनि केचाः केते अनेज् चेलाकु ओवा तेञ ते कथालअय, “ने नोआँ जोमेपे,” “नोआँ इञः रआ होड़ो हके।”

27“फिन हुँनि अँगुर रास रआ डुभा सब् लअय जोटोः धनियाबाद लअय जोटोः हुँकू ओवाकु तेङ ते कथालअय, ‘ने आपे गोटे नोआँ ञुवेपे,’ 28#उठलु 24:8; जिर 31:31–34चितानतआचि नोआँ करार लआ इञः रआ होना मयाम हके, जे अगम होड़ रआ पाप माफ तआ तू यतेआ। 29इञः आपे सनारीञ कथावइत पेआ जब परमेसर रआ राइज रे नवाँ अँगुर रास#26:29 नवाँ अँगुर रास झरी लेकन बनाव लआ अँगुर रास। कइञ ञूए, तब रे नोआँ अँगुर रास फिन एरोञ ञू लेए। एरोइञ ञू लेए।”

30फिन भजन सिरिञ केते ईसु जोटोः हुँनि रेनकु चेलाकु जयतुन टोंगरी तेङ रे सेनोः यनाकु।

पतरस रआ कोवाने जोटोः आगमजानी

(मरकुस 14:27–31; लुका 22:31–34; जोहन 13:36–38)

31 # जख 13:7 फिन ईसु हुँकू कथावा लअय, “तीहिञ ञीन्द आपे गोटे इञः रआ बारे रे ठोकोर जोमेअपे, चितानतआचि धरम पोथी रे ओल लआ इदानआँ, ‘इञः चरवाहा गोजेयाइञ जोटोः खुड़हा रेनकु भीडी छिती-छनो अकु।’ 32#मती 28:16बकिन इञः जीवेड्-बिरीड् कोते आपे एतेन मड़ाङ गलील परदेस रे सेनाइञ।”

33तब पतरस ईसु कथा रुवाड़वा लअय, “अगर अमः रआ बारे रे गोटे ठोकोर जोम दो जोमे बकिन इञः ठोकोर एरोइञ जोमलेए!”

34ईसु हुँनि कथावा लअय, “इञः अमः सनारी कथावा यतमिअइञ, तीहिञ ञीन्द ही मुरगा रागे एतेन पहिल अमः पे इसा इञः मी कोवानीञा।”

35तब पतरस ईसु कथावा लअय, “अगर अमः तुली इञः गोजोः हों पड़ावओ सेकरो रे, इञः अमः रआ एरोञ कोवन लेए!”

जोटोः हेंका गोटे चेलाकु कथा लआ।

गतासमनी रे ईसु रआ बिनती

(मरकुस 14:32–42; लुका 22:39–46)

36ईसु जोटोः चेलाकु गतासमनी ञुमुन ठँव रे सेन लेनाकु। तब ईसु अनेज् चेलाकुइ कथावा लआ, “नोंडे दुड़ूः कोपे जबरे इञः बिनती इञोः।” 37ईसु पतरस जोटोः जबदी रेनकिन बनार कोड़ा होपोन अनेज् सुधा इदी केते उदास जोटोः माकुल यनाय, 38फिन हुँनि हुकिन कथावा लअय, “इञः रआ मन अगम माकुल इदानआँ, नोआँ हमाः चि इञः रआ जीवि उडुङोः लेकाआ। अबन नोंडे दोहोकोते चँड़चित दोहोनबन।”

39फिन हुँनि थोड़ेक मड़ाङ रे सेन कनते ओत रे हुमकुरिया कोते बिनती इञोः नाय, हुँनि कथालअय, “ओय इञः रेनि बबा, अगर होयव सकावोओ दो नोआँ डुभा इञः एतेन टलव एंडायमी। तियो इञः रआ हिछा लेका कोवन बकिन अमः रआ हिछा पुरायोः।”

40तब हुँनि अनेज् चेलाकु ठँवरे सेनलेनय जोटोः हुँकू ञीदो ञेल केते पतरस एडे कथालअय पतरस कथावा लअय, “तना आपे इञः सुधा मी घड़ी हों कपे जगल दोहोना? 41जगल दोहोनपे जोटोः बिनती इञोःपे ताकि आपे अलोपे एर परखावकोः। आतमा दो तेयारा बकिन आपे रआ गतार कमजोड़ इदानआँ।”

42फिन हुँनि जोटोः दुसरी खेप सेनलेनय जोटोः नोंका कथा केते बिनती लअय, “ओय इञः रेनि बबा, अगर नोआँ डुभा इञः रआ बेगर ञू ते एरो टलव लेना दो अमः रआ हिछा पुराकोः।” 43हुँनि रुवाड़ कोते ञीदोः ञेल लिड्कुअय। चितानतआचि ञीन्द लहा ते हुँकू रआ मेड् का बोगा गोन दोहोना।

44हुँकू बयअटु केते जोटोः हुँनि पे खेप सेनलेनय जोटोः पहिल लेका हेनेना सबद रे बिनती लेनय। 45तब ईसु अनेज् चेलाकु एडे सेनलेनय जोटोः कथावा लिड्कुअय, “तना आपे नहाः हमाः निरदन्द ञीदोः यनापे? ञेलेपे! अब बेरा वेज्‌यना, जोटोः मनवाँ होपोन पापीकु रआ अती रे एर सबे याकु। 46बिरीड्पे, एला सेनेअबुन। इञः सब्कु ठँवरे सोदोर यनाकु!”

ईसु सब् लिदियाकु

(मरकुस 14:43–50; लुका 22:47–53; जोहन 18:3–12)

47ईसु जब कथा ही यते दोहोनय, जहुदा जे बरहो चेलाकु मे से मिहोंड़ दोहोनय, हुँनि वेज्‌लेनय। जोटोः हुँनि सुधा मुध पुरोहितकु जोटोः जहुदी होड़कु पड़ा एतेन अगम भीड़, तलवर जोटोः हपा अगुकेते वेज्‌लेनाकु। 48जहुदा जे हुँनि एर सबे अवला दोहोलेनय, हुँकू पहिल रे चिन कथावा दोहो लिड्कुअय, “जे ओके हों इञः चोहना याइञ हिनी ही ईसु हके, हिनी पे सब्!”

49तब हुँनि ईसु ठँवरे सेनलेनय जोटोः कथालअय, “ओय गुरु!” जोहार मेनकेते हुँनि चोहना लिदियय।

50ईसु हुँनि कथावा लअय, “ओय गति जे काम तआ अमः वेज् तनाम, होना अमः करावेमी!”

तब होड़कु ठँवरे वेज् कनते हुँनि सब् केते कबजा रे कीदियाकु। 51जोटोः जे होड़ ईसु तुली दोहोलेनाकु, हुँकू मे से मिहोंड़ तलवर ओर उडुङ लअय जोटोः सेंड़ा पुरोहित रेनि बन्धुवा रआ लुतुर रे छेंव चलाव केते हुँनि रआ लुतुर खंडा केदय। 52तब ईसु हुँनि कथावा लअय, “अमः रआ तलवर खोलँगा रे दोहोयमी, जे तलवर चलावाकु हुँकू तलवर ते ही गोज् कुआ। 53तना आपे कपे समझावओ चि इञः अपन परम बबा राअ् बोजा कियाइञ जोटोः हुँनि झटहेले सिरमा दुत रेनकु बराह पलटनकु एतेन बगरा एरोय बिदाकुआ? 54बकिन अगर इञः नोंका यतेअइञ दो परमेसर रआ बचन रे ओल तड्अकु नोआँ चिलका पुरा योओ चि गोटा ने-नेन लेका होयावओ?”

55 # लुका 19:47; 21:37 तब ईसु भीड़ रेनकु कथावा लअय, “तना आपे डकु समझाव कोते इञः सब् तआ तलवर जोटोः हपा अगुकेते वेज्‌तनापे? सेंड़ा बिनती ओड़ाः रआ राच रे इञः रोज हिला आपे सुधा दोहो कोतेञ बतलाव यते दोहोना, दो आपे कपे सब् लीदिञा, 56बकिन गोटा घटना निआँ तआ नोंका होयावलेना चि परमेसर पड़ा एतेन दुखमाय अवला होड़कु रआ ओल लआ बचन पुराकोः।”

तब गोटे चेला हुँनि बय केते ञीर केदाकु।

सेंड़ा सभा ठँवरे ईसु

(मरकुस 14:53–65; लुका 22:54–55,63–71; जोहन 18:13–14,19–24)

57जे होड़ ईसु सब् दोहो लिदियाकु, हुँकू हुँनि कायफा ञुमुन सेंड़ा पुरोहित ठँवरे इदी लिदियाकु, होंडे परमेसर रआ बचन सि-सिखावकु जोटोः बबा-तता जहुदी नेताकु जवार दोहोलेनाकु। 58पतरस हुँनि रआ संगिञ-संगिञ जोटोः हुँनि एतेन तयोम-तयोम सेंड़ा पुरोहित रआ राच भीतार हमाः सेनोः लेनय, जोटोः नतीजा ञेले तआ होंडे सिपाहीकु तुली दुड़ूः यानय। 59मुध पुरोहित जोटोः सेंड़ा सभा रेनकु गोटे ईसु गोज् रआ बिरोद रे झुठा सबुत ञम रआ खोज रे दोहोलेनाकु; 60बकिन ककु ञम लीदिया, भला ही अगम झुठा गोवाही एम तआ वेज्‌लेनाकु। अखरी रे बारहोड़ मड़ाङ रे वेज् लेनाकिन 61#जोह 2:19जोटोः कथा लआकिन, “नुई कथा दोहोलअय चि, ‘इञः परमेसर रआ सेंड़ा बिनती ओड़ाः धसाव ञुर केते होना पे रोज रे बनाव तींगुयाइञ।’”

62तब सेंड़ा पुरोहित तींगु कनते ईसु सोधव लअय, “नुकु होड़ अमः रआ बारे रे चितान गोवाही एम यतेअकु, तना अमः एडे उतारा कोनाआँ?” 63बकिन ईसु मटियाव दोहोनय। फिन सेंड़ा पुरोहित हुँनि सोधव लिदियय, “जीवेड् परमेसर रआ ञुमुन ते अमः हुकुम ओवा यतमिअइञ चि इञः बतलाव वाइञमी, तना अमः परमेसर रेनि होपोन मसी हके।”

64 # दानि 7:13 ईसु कथालअय, “आँ, जे लेका अमः कथायतेअम, बकिन इञः कथावा यतमिअइञ चि आपे मनवाँ होपोन हुँनि परम सकती अवला रआ जोम होरे दुड़ुःगोः जोटोः सिरमा रआ रीमिल एतेन वेजोः ञेलेयापे!”

65 # लेबी 24:16 सेंड़ा पुरोहित नोआँ अयुम केते अनेज् रआ गेंदराः चीराय ते कथालअय, “नुई दो परमेसर रआ निंदा यानय! नहाः दो इञः तआ जोटोः गोवाह रआ दरकार कोनाआँ! आपे गोटे परमेसर रआ सिकाइत रे कथाय अयुम कीदियापे! 66आपे नुई रआ नींदा अयुम लआपे आपे चिलका समझाव लेनापे?”

हुँकू उतारा लआकु, “मुनि दोसिदाराय मुनि गोज् एंडाय चही।”

67 # जसा 50:6 तब हुँकू हुँनि रआ मेड्-अहा रे थूः लआकु, जोटोः घुसा लिदियाकु, थोड़ेः एकेन होड़ थपड़ाव केते कथा लआकु, 68“ओय मसी! अगामजानी केते बतलाव वालेमी चि हुँनि ओके हके जे अमः हुमाः यात मिआँय?”

पतरस ईसु कोवन लअय

(मरकुस 14:66–72; लुका 22:56–62; जोहन 18:15–18,25–27)

69पतरस ओतेत रआ राच रआ बहरा रे दुड़ूः दोहोनय चि मियड् धँगड़ीन हुँनि ठँवरे वेज् कनते कथालअय, “अमः हों दो हुँनि गलील रेनि ईसु सुधा दोहोलेनम।”

70बकिन गोटे ठँवरे पतरस कोवन कीदियय, जोटोः कथालअय, “इञः कइञ समझाव ओना चि अमः चितानम मेन यतेआ।” 71फिन हुँनि हता दुवार ठँवरे सोदोरनय चि एटाः लंञी हुँनि ञेल लिदियय जोटोः जे होंडे दोहोलेनाकु हुँकू कथावा लिड्कुअय, “नुई होड़ नासरत रेनि ईसु तुली दोहोलेनय।”

72पतरस फिन कोवन मेनोअय जोटोः मिसा किरया जोम केते कथालअय, “इञः हुँनि होड़ कइञ ठुवा यातिया।”

73थोड़ेक डिरी रे होंडे तींगु लिनकु पतरस ठँवरे सेन लेनाकु जोटोः हुँनि कथावा लिदियाकु, “अमः रआ दुखमा सफा-सफा बतलाव यतेअय चि अमः सचमुच हेनेनकु मे से मिहोंड़ हके!”

74तब पतरस अपन अप सरपाव लेनय जोटोः “किरया जोमेते कथालअय, इञः हुँनि होड़ कइञ ठुवायतिया मेनोअय।”

चि तुरात मुरगा राअ् केदय, 75तब पतरस तआ ईसु रआ कथा लआ दुखमा पहम लेना चि “मुरगा रागे एतेन पहिल अमः पे इसा इञः मी कोवानीञा।” जोटोः हुँनि बहरा रे उडुङ कनते खोभराव-खोभराव ते इयाम लअय।

Currently Selected:

मती 26: BIX

Highlight

Copy

Compare