मती 12

रुड़ुयोः हिला रेनि हों परभु

(मरकुस 2:23–28; लुका 6:1–5)

1 # नियम 23:25 ईसु रुड़ुयोः हिला गोहोम ओत सोज परोमोन दोहोनय, हुँनि रेनकु चेलाकु रंगिज् दोहोलेनाकु, जोटोः हुँकू गोहोम गेले होड्-होड् ते जोम यते दोहोलेनाकु। 2दो फरीसीकु नोआँ ञेल केते ईसु कथावा लिदियाकु, “ञेलेमी, जे काम रुड़ुयोः हिला उचित कोनाआँ, हेनेना काम अमः रेनकु चेला कराव यतेअकु!”

3 # 1 समु 21:1–6 ईसु हुँकू कथावा लअय, “तना आपे नोंका कपे पढ़ावतना, जब दाऊद जोटोः हुँनि रेनकु गति रंगिज् दोहोलेनाकु दो दाऊद चितानय पड़ी लआ? 4#लेबी 24:9हुँनि परमेसर रआ ओड़ाः रे सेन कनते भेंट राकब् लआ रुटी जोम लअय होना जोम तआ पुरोहितकु छोड़ाय ओके तआ हों उचित का दोहोलेना जोटोः गतिकुतय तआ हों ओवा दोहोलिड्कुअय। 5-6#लेखा 28:9,10जोटोः तना आपे मुसा रआ नियम रे कपे पढ़ावतना चि पुरोहितकु रुड़ुयोः हिला रआ नियम तोड़ाव वेआकु बकिन हुँकू दोसी ककु ठहरावओ। इञः आपेइञ कथावा यना नोंडे जे इदानिञा, जे सेंड़ा बिनती ओड़ाः एतेन हों सेंड़ाअय। 7#मती 9:13; होसे 6:6इञः बलिदान कोवन, बकिन माया चहाव ओइञ अगर आपे नोआँ रआ माने समझाव लेन दो बे गुनाही गुनाहगार एरोपे ठहराव लेदियाअने; 8चितानतआचि मनवाँ होपोन रुड़ुयोः हिला रेनि परभु हके।”

रोहोड़ अती अवला नपाय लिदियय

(मरकुस 3:1–6; लुका 6:6–11)

9होंडे एतेन मड़ाङ रे सेन कनते ईसु हुँकू रआ बिनती ओड़ाः रे सेनलेनय, 10होनाअडे मियड् होड़ दोहोलेना, हुँनि रआ अती रोहोड़ दोहोलेना। ईसु तेङ रे दोस लगावी तआ हुँकू ईसु नोंका सोधव लिदियाकु, “तना रुड़ुयोः हिला हों नपाये तआ उचित इदानआँ?”

11 # लुका 14:5 बकिन ईसु हुँकू कथावा लअय, “अगर आपे एडे मियड् ठउका भीडी इदानियाँ हुँनि रुड़ुयोः हिला डोडहा रे ञुर यानय दो आपे मे से ओके नोंका इदानपेआ, जे होंडे एतेन हुँनि सब् केते एरोपे उडुङ लिया? 12फिन मनवाँ दो मियड् भीडी एतेन अगम कीमती इदानियाँ, हिना तआ रुड़ुयोः हिला भलाई करावे तआ उचित इदानआँ।” 13ईसु हुँनि होड़ कथावा लअय, “अतीतम सोजेमी।”

हुँनि अती ताय सोज लअय जोटोः होना अती एटाः होर रआ अती लेका नपाय यना। 14तब फरीसीकु बहरा रे उडुङ कनते ईसु रआ बिरोद रे नोंका बिचार लआकु चि अबुन नुई चिलका ते गोजे यबुन।

परमेसर रींबड़ लेदी सेवक

15ईसु नोआँ ठुवा केते होंडे एतेन सेनोः यानय। सेंड़ा भीड़ हुँनि रआ तयोम सेन लेनाकु, जोटोः हुँनि गोटे होड़कु नपाय लिड्कुअय 16बकिन ईसु गोटे चेताव यतकु दोहोलेनय, आपे इञः रआ ञुमुन अलोपे फयलाव के। 17नोंका परमेसर पड़ा एतेन दुखमाय अवला होड़ जसायाह रआ दुखमा पुराव लेना

18 # जसा 42:1–4 “नुई इञः रींबड़ तदिया,

नुई इञः रेनि धँगड़ हके।

इञः नुई तुली अगम खुस तनाइञ, इञः रेनि दुलारा हके,

नुई तआ इञः अपन ‘आतमा’ ओवायाइञ

जोटोः नुई गैर-जहुदीकु एडे नेयय रआ परचारेए।

19नुई न दोय झगड़ाकोः जोटोः नय घोल के

जोटोः न बाजार रे ओके हुँनि रआ घोल अयुम केएकु।

20नुई न दो लीवेड् लेना ढोड़ही बीर हों एरोय हुचाःलेए,

जोटोः न इड़ीजोः अवला सेड़ता हों एरोय इड़ीज् के।

जबरे नेयय रआ जीत का होयावओ,

21जोटोः हुँनि रआ ञुमुन ते गैर-जहुदीकु असरा दोहोयकु।”

ईसु जोटोः सयतान

(मरकुस 3:20–30; लुका 11:14–23)

22होड़कु मुसिञ अन्धरा-बहिरा जोटोः मुवाँ आतमा ते झपाव लेनी मियड् होड़ ईसु ठँवरे अगु लिदियाकु। ईसु हुँनि नपाय लिदियय जोटोः हुँनि दुखमा लेनय जोटोः ञे-ञेल लेनय। 23तजूक कनते गोटे होड़ नोंका कथा लआकु, “हो सके नेनेनी दो दाऊद रेनि जयपुइ न लगे?”

24 # मती 9:34; 10:25 बकिन फरीसीकु नोआँ अयुम केते कथा लआकु, “नुई दो बालजबुल नेता मुवाँ आतमा रआ सहाड़ा ते मुवाँ आतमा उडुङ कुआय।”

25ईसु हुँकू रआ बिचार ठुवा केते कथालअय, “जे राइज रे फुट दोहोनाकु, होना उजाड़ एंडायोओ। जोटोः जे सहार चहे ओड़ाः रेनकु रेगेड़ोअकु होना ओड़ाः चिलका चलाव कोओ। 26अगर सयतान ही सयतान उडुङ गियय दो हुँनि अनेज् रेनि बयरी पड़ी यानय। तब हुँनि रआ राइज चिलका बनाल दोहोकोओ? 27जोटोः अगर इञः बालजबुल रआ सहाड़ा ते मुवाँ आतमाकु उडुङाइञ दो आपे रेनकु चेलाकु ओकेरआ सहाड़ा ते हुँकू उडुङ कुआकु? हिनाते हुँकू ही आपे रआ नेयय कराव वेआकु! 28बकिन जब इञः परमेसर रआ आतमा रआ सहाड़ा ते मुवाँ आतमा उडुङ गियाइञ। दो निधड़क परमेसर रआ राइज आपे तला रे वेज्‌कना। 29जबरे मियड् सावाँगिया रआ ओड़ाः रे बोलो कोते हुँनि काय तोले तब रे हुँनि ओड़ाः रआ चीज-बतुस एरोय रेज् बेजालेए, हिना तयोम ही हुँनि ओड़ाः रेज् बुजा याय।”

30 # मर 9:40 “जे इञः तुली कुनीयाँ, हुँनि इञः रआ बिरोद रिया। जोटोः जे इञः तुली काय समटावेए हुँनि छितरावेए। 31हिना तआ इञः आपेइञ कथावा यना मनवाँकु रआ गोटा लेकन पाप जोटोः परमेसर रआ निंदा माफोआ बकिन पबितर आतमा रआ जे सिकाइतेअकु माफ एरो ञमलेना। 32#लुका 12:10जे मनवाँ होपोन रआ बिरोद रे चितानहों कथाय, हुँनि रआ माफ होयावओ, बकिन जे पबितर आतमा रआ बिरोद रे कथायय हुँनि तआ माफ एरो ञमलेना, न दो नोआँ जुग रे जोटोः न वेजोः अवला जुग रे।”

काट जोओ ते चिनहा योओ

(लुका 6:43–45)

33 # मती 7:20; लुका 6:44 “अगर बढ़ियाँ काट रोहेयापे दो जोओ हों बढ़ियाँ जोओ योओ। जोटोः बढ़ियाँ काट कोनाआँ दो जोओ हों बढ़ियाँ एरो जोओ लेना चितानतआचि काट अपन जोओ ते चिनहा योओ। 34#मती 3:7; 23:33; लुका 3:7; मती 15:18; लुका 6:45ओय बिञ रेनकु होपोन! आपे बुरा आपे चिलका आपे बढ़ियाँ दुखमा कथा सकाव वेएपे? चितानतआचि जे मन रे पेरेज् तना हेनेना ही अहा एतेन उडुङोओ। 35बढ़ियाँ होड़ मन रआ बढ़ियाँ भन्डार एतेन बढ़ियाँ दुखमा उडुङ ङेअय, जोटोः बुरा होड़ मन रआ बुरा भन्डार एतेन बुरा दुखमा उडुङ ङेअय।

36“इञः आपेइञ कथावा यना नेयय रआ बेरा रे मनवाँ अनेज् रआ गोटा बेकार दुखमा रआ लेखा ए-एम पड़ाव वोओ। 37चितानतआचि आपे अपन दुखमा रआ चलते बेकासुर चहे गुनाहगार ठहराव वोओपे।”

सिरमा रआ चिन कोय

(मरकुस 8:11,12; लुका 11:29–32)

38 # मती 16:1; मर 8:11; लुका 11:16 होना बेरा थोड़ेः एकेन परमेसर रआ बचन सि-सिखावकु जोटोः फरीसीकु कथा लआ, “ओय गुरु,” “आले अमः एतेन मियड् तजूक चिन ञेल तआ अराव तनाले।”

39 # मती 16:4; मर 8:12 ईसु हुँकू उतारावा लिड्कुअय, “नोआँ जुग रेनकु बुरा जोटोः बे-लाज काम करेक अवला होड़ मियड् चिन कोय यतेअकु!” बकिन परमेसर पड़ा एतेन दुखमाय अवला होड़ जोना रआ चिन छोड़ाय, एटाः चिन एरो ञमलेना। 40#जोना 1:17जे लेका जोना पे रोज ञीन्द न सीञ सेंड़ा हाकु रआ पोटा रे दोहोलेनय, हेनेन लेका मनवाँ होपोन हों पे रोज ञीन्द न सीञ धरती रआ भीतारे दोहोनय। 41#जोना 3:5नीनवे रेनकु होड़ हों नेयय रआ बेरा रे नोआँ पीढ़ी रेनकु होड़ बिरीड् कोते हुँकू दोसी ठहराव कुआकु। चितानतआचि हुँकू जोना रआ परचार अयुम केते मन रुवाड़ दोहोलआकु। जोटोः ञेलेपे नोंडे हुँनि इदानियाँ जे जोना एतेन हों सेंड़ाआय!

42 # 1 राजा 10:1–10; 2 इति 9:1–12 नेयय रआ दिन दखिन रेनि सिबा रानी नोआँ बेरा रेनकु होड़ सुधा तींगु कोते नोआँ जुग रेनकु होड़ रे दोसी ठहरावियय, चितानतआचि सुलेमान रआ गेयान अयुमे तआ ओत रआ अखरी छोर एतेनय वेज्‌तना, जोटोः ञेलेपे नोंडे हुँनि हके जे सुलेमान एतेन हों सेंड़ा इदानियाँ।

मुवाँ आतमा रआ दोबारा रुवाङोः

(लुका 11:24–26)

43“जब छुत आतमा होड़ एतेन उडुङ एंडायोओय दो झीत-झीताव ठँव रे सथावओ तआ ठाँव ञम बेढ़ायाय, बकिन हुँनि तआ ओकारे हों सथावोः तआ ठँव काय ञमोआ दो। 44तब हुँनि कथायय, ‘इञः जे ठँव एतेन उडुङ तनाइञ हेनेना ओड़ाः रे सेनाइञ,’ जे एडे एतेनाइञ उडुङ दोहोना रुवाड़ एंडायोओञ। जोटोः रुवाड़ कोते होना चिकन मकन हेनते सींगराव लआ ञमेअय। 45तब हुँनि सेन कोते अनेज् एतेन बगरा खपतान सात गोट मुवाँ आतमाकु गति अगुकेते वेजोअय जोटोः हुँकू हेनेन ओड़ाः रे बोलो कोते हेनेना रे दोहोनाकु। नोंका हुँनि होड़ रआ अखरी दसा पहिल एतेन हों अगम बडगाव एंडायोओ, हेनेन लेका नोआँ बडगाव पीढ़ी रेनकु रआ दसा होयावओ।”

ईसु रेनि एंगाते जोटोः बोकोड्तिकु

(मरकुस 3:31–35; लुका 8:19–21)

46ईसु भीड़ तआ सिछा बतलाव ही यते दोहोनय चि हुँनि एंगाते जोटोः बोयहातेतिकु ओड़ाः बहरा रे वेज् तींगु दोहोलेनाकु, जोटोः हुँनि तुली दुखमायोः अराव दोहोलेनाकु। 47ओकेकुन ईसु कथावा लआकु, “ञेल कुमी अमः एंगाम जोटोः बोयहाम तिकु अमः सुधा ञेपेलोः तआ अराव तनाकु हुँकू बहरा रेकुआ।”

48ईसु हुँनि कथा रुवाड़वा लअय, “ओके हके इञः एंगाइञ जोटोः ओके हके इञः रेनकु बोयहाइञकु?” 49अती ते चुयुँड़ केते अनेज् चेलाकुइ कथावा लआ, “ञेलेपे! नीकु हके इञः रेनि एंगाइञ जोटोः बोयहाइञ! 50चितानतआचि जे सिरमा रेनि इञः बबा रआ हिछा पुरा याकु, हिनी ही इञः रेनि कोड़ा बोको इञः रेनि कुड़ी बोको जोटोः इञः रेनि एंगाइञ हके।”

Currently Selected:

मती 12: BIX

Highlight

Copy

Compare