मती 13

बिहन बेरो-ई रआ कथनी

(मरकुस 4:1–9; लुका 8:4–8)

1हेनेन हिला ईसु ओड़ाः एतेन उडुङ कनते सेंड़ा डहा डुरी रे सेन कनते दुड़ूः दोहोलेनय। 2#लुका 5:1–3हुँनि ठँवरे अगम बगरा होड़ जवार यनाकु, जोटोः ईसु डोंगा रे देज् कनते दुड़ूः यानय, जोटोः जवार लेनकु गोटे भीड़ डुरी रे तींगु दोहोलेनाकु। 3हुँनि हुडिञ गाम दोवसते हुँकू तआ अगम दुखमा रआ सिछा ओवा लिड्कुअय।

हुँनि हुँकू कथावा लिड्कुअय, अयुमेपे, “मियड् बेरो-ई बिहन बेर उडुङनय। 4बिहन बेर-बेर ते थोड़ेः एकेन बिहन होरा डुरी रे ञुरलेना। जोटोः अगास रेनकु ओड़े वेज् कनते होना हलङ जोम केदाकु। 5थोड़ेः एकेन बिहन रेगड़ेज् ओत रे ञुरलेना, होंडे बगरा हास का दोहोना चलते झटहेले उमुन लेना चितानतआचि होंडे हास गडा हमाः का दोहोलेना, 6बोंगा तुरलेना दो सितोङ ते झोला यना, हेनते रेहेड् का सब् दोहोलेना चलते रोहोड़यना। 7थोड़ेः एकेन बिहन जनुम झुँड़ रे ञुरलेना जोटोः जनुम हरा कनते होनाय दबाव केदा। 8थोड़ेः एकेन बिहन बढ़ियाँ ओत रे ञुरलेना, जोटोः होना हरा कनते गेले लेना साव गुना, साठ गुना तीस गुना जोटोः पयदा होयावना। 9अगर जेकर एडे, आ-अयुम तआ लुतुर इदानआँ हुँकू अयुमेपे!”

कथनी बतलावेए रआ कारन

(मरकुस 4:10–12)

10ईसु रेनकु चेलाकु वेज् कनते हुँनि कथावा लिदियाकु, “अमः होड़कु हुडिञ गाम रे चितान तआ सिछा बतलाव वाकुअम?”

11हुँनि कथा रुवाड़ लअय, “आपे सिरमा राइज रआ भेद रआ समझावओ तआ ओवा तड्पेआ, बकिन हुँकू तआ कोवन। 12#मती 25:29; मर 4:25; लुका 8:18; 19:26चितानतआचि जेकर एडे थोड़ेः एकेन इदानआँ, हुँनि तआ जोटोः ओवाया जोटोः हुँनि तआ अगम होयव एंडायोओ बकिन जेकर एडे कोनाआँ हुँनि एतेन होना हों अँगाव एंडाया जे हुँनि एडे इदानआँ। 13इञः हुँकू तआ हुडिञ गाम रे सिछा ओवा कुअइञ। चितानतआचि हुँकू ञेल केते हों ककु ञेल बेजाया, जोटोः अयुम केते हों ककु समझावओ 14#जसा 6:9,10नोंका हुँकू तआ परमेसर पड़ा एतेन दुखमाय अवला होड़ जसायाह रआ दुखमा पुराव लेना,

“‘आपे अयुमेंएपे जोटोः अयुम एञोःअपे

बकिन एरोपे समझाव बेजालेना,

आपे ञेल इञोगेअपे,

बकिन आपे चितानहों एरोपे समझाव बेजालेना।

15चितानतआचि नुकु होड़ रआ मन मोटव यना।

जोटोः हुँकू लुतुर ते आ-अयुम ककु चहावओ

जोटोः नुकु अपन मेड् जपिड् केदाकु

कोवन दो हुँकू अपन मेड् ते ञेल केते,

लुतुर ते अयुम केते,

जोटोः हिरदाय एतेन समझाव कोते पस्चातप लेड्,

जोटोः इञः हुँकूञ नपाय किड्कुआ अने।’

16 # लुका 10:23,24 “बकिन आपे रआ मेड् धन्य इदानआँ चितानतआचि हुँकू ञेले जोटोः आपे रआ लुतुर धन्य इदानआँ चितानतआचि हुँकू अयुमेआ। 17इञः आपे सनारी कथावा यतपेअइञ, जे दुखमा आपे ञेल यतेअपे होना ञे-ञेल तआ अगम परमेसर पड़ा एतेन दुखमाय अवलाकु जोटोः धरमी होड़कु चहावओन दोहोनाकु, बकिन हुँकू ककु ञेल बेजालआ, जे दुखमा आपे अयुम यतेअपे हुँकू होना अयुमे चहावओन दोहोनाकु बकिन ककु अयुम बेजालआ।”

बिहन बेरो-ई रआ हुडिञ गाम रआ माने

(मरकुस 4:13–20; लुका 8:11–15)

18“अब आपे बेरोई रआ हुडिञ गाम रआ माने अयुमेपे 19अगर ओकेकुन राइज रआ बचन अयुमेअय, बकिन काय समझावओ, तब हुँनि रआ मन रे जे बेर दोहोलआ होंडे दुस्ट सयतान वेज् कोते, इदी ओचोः एंडाय, नुई हुँनि हके जे होरा डुरी रे बेर दोहोलआ। 20जे सेरेङ तेङ रे बिहन बेर दोहोलआ होना नोआँ हके, जे बचन अयुमेते ही झटहेले खुस ते मनाव एंडायोओय, 21बकिन अपन रे रेहेड् रआ मजगुत का दोहोन चलते थोड़ेः दिन हमाः टिकाव बेजा योओय, जोटोः जब बचन रआ चलते संकट जोटोः बिपाइत वेजोआ दो झटहेले डगमगाव एंडायोओय। 22जे जनुम झुँड़ रे बेर लआ होना नोआँ हके, जे बचन अयुमेअकु, बकिन दुनियाँ रआ चिंता जोटोः धनखुरजी रआ मोह ते बचन दबावेअकु हुँकू जोओ ककु अगु बेजाया। 23जे बढ़ियाँ ओत रे बेर लआ बिहन हुँकू निकु हके, जे बचन अयुमेअकु जोटोः समझावओकु, जोटोः होना रआ फयदा साव गुना, साठ गुना जोटोः तीस गुना होयावओ।”

पहार बीर दना रआ हुडिञ गाम

24ईसु हुँकू ठँवरे जोटोः मियड् हुडिञ गाम कथालअय; “सिरमा राइज हुँनि होड़ लेका इदानआँ जे अनेज् खेत रे बढ़ियाँ बिहन बेर लअय। 25बकिन जब होड़कु ञीदो गोन दोहोनाकु, दो हुँनि रेनि बयरी वेज्‌लेनय जोटोः गोहोम ओत रे पहार बीर दना बेर कोते सेनोः यानय। 26जब बुटुः कनते गेले लेना दो पहार बीर दना उमुन लेना ञेल लेना। 27जब गिरहात रेनकु बन्धुवा वेज् कनते गिरहात कथावा लिदियाकु, ‘ओय मुवार, तना अमः रआ ओत रे बढ़ियाँ बिहन कम बेर दोहोलआ? होना रे पहार बीर दना ओका एतेन वेज्‌तना?’ 28‘गिरहात हुँकूइ कथावा लआ,’ नोआँ ओके बयरी रआ काम कुन हके। बन्धुवाकु गिरहातकु सोधाव लआ, ‘तना अमः चहावओम चि आले सेन कोते होना पहार बीर ले रचागेए?’

29“गिरहात कथा रुवाड़ लअय, ‘कोवन, कहीं नोंका अलो होयावकोः चि पहार दना रआ बीर रचागे बेरा गोहोम हों पे रचा मेसा के। 30ईरोः घनी हमाः बनार इकाएर हरावापे, इञः ईरोः कुइञ कथावआ, पहिल पहार बीर दना रचागेपे जोटोः जवारेपे रोंगोय तआ मुठा तोलेपे जोटोः गोहोम इञः रआ गरना रे जवारेपे।’”

राय दना रआ हुडिञ गाम

(मरकुस 4:30–32; लुका 13:18,19)

31ईसु मियड् जोटोः हुडिञ गाम कथालअय, “सिरमा रआ राइज राय दना लेका इदानआँ, होना मिहोंड़ ओकेकुन इदी केते अनेज् रआ खेत रे बेर लअय। 32होना दो गोटा बिहन एतेन हुँडिञा, बकिन हरा कोते बगान रआ गोटा साग-पत एतेन उसूलोओ जोटोः नोंका काट पड़ीयोओ चि आकास रेनकु ओड़ेकु वेज् कोते होना डाँड़ रे डेरा योओकु।”

खमीर रआ हुडिञ गाम

(लुका 13:20,21)

33ईसु हुँकू तआ मियड् जोटोः हुडिञ गाम कथालअय, “सिरमा रआ राइज होना खमीर#13:33 खमीर खमीर - रुटी एर ओवे अवला जीनिस लेकाआ, जेके मियड् लंञी पे पसरी होलोंग रे मेसा लअय हेनते ले लअय दो गोटा होलोंग ओ कोते खमीर पड़ीयना।”

हुडिञ गाम रआ प्रयोग

34ईसु हुडिञ गाम रआ दुखमा ते ही गोटे होड़कुइ समझाव यातकु दोहोलेना। हुँनि बेगर हुडिञ गाम ते चितानहों हुँकू तआ काय कथायते दोहोलेना। 35#सिरिञ 78:2ताकि जे बचन परमेसर पड़ा एतेन दुखमाय अवला होड़ एतेन कथा दोहोलआ होना पुरायोः चि

“इञः हुडिञ गाम रे कथाय तआ अपन अहा तिञ खुलाव वेअइञ;

इञः होना दुखमा निआँ जे दुनियाँ सिरजाव लेना घनी एतेन उकु दोहोलेना दिसतारेएञ।”

पहार बीर दना रआ हुडिञ गाम रआ माने

36ईसु होड़कु बिदा केते ओड़ाः रे वेज्‌लेनय। हुँनि रेनकु चेला वेज् कनते हुँनि कथावा लआकु, “ओत रे पहार बीर दना रआ हुडिञ गाम रआ माने आले समझावले।”

37ईसु हुँकूइ कथा रुवाड़वा लआ, “बढ़ियाँ बिहन बेर अवला मनवाँ होपोन हके; 38जोटोः खेत दुनियाँ हके। बढ़ियाँ बिहन राइज रेनकु होड़ हके, जोटोः पहार बीर दना दुस्ट होपोन हके; 39जे बयरी पहार बीर बेर लआ हुँनि सयतान हके, ई-ईर दुनियाँ रआ अखरी हके, जोटोः ईरोःकु सिरमा दुत हके। 40जे लेका होड़कु पहार बीर दना समटाव केते सेंगेल रे रोंगो याकु, हेंका दुनियाँ रआ अखरी रे होयावओ। 41मनवाँ होपोन अनेज् रेनकु सिरमा दुत बिदा कुआय जोटोः हुँनि रआ राइज रेनकु हुँकू गोटे ठोकोर एर जोमकु जोटोः नियम रआ बिरोद रे काम करावकु समटाव कुअय, 42जोटोः पापीकु धदकाव सेंगेल भठी रे जोड़ाव कुआ हुँकू होंडे इयामेआकु जोटोः डटा रेडेजेआकु।” 43धरमी होड़कु अपन बबा रआ राइज रे सीञ बोंगा लेका लवकाव वोआकु। जेकर एडे लुतुर इदानआँ, हुँकू अयुमेपे!

उकु लआ खजाना रआ कथनी

44“सिरमा रआ राइज ओत रे उकु लआ धनखुरजी लेकाआ। होना ओके होड़ ञम लअय जोटोः दोबारा हेनेन रे हार लअय। तब हुँनि खुस लेनय जोटोः अनेज् एडे जे दोहोलेना होना, गोटा केजा केते होना ते ओत किरिञ लअय।”

कीमती मोती रआ कथनी

45“फिन, सिरमा रआ राइज बढ़ियाँ मोती ञमे, अवला बेयापरी लेकाआ, 46जब हुँनि मियड् अगम कीमती मोती ञमोआ दो हुँनि सेन कोते अनेज् रआ गोटा केजा केते होना मोती किरिञ लअय।”

जाल रआ कथनी

47“फिन सिरमा रआ राइज समुदार रे जोड़ाव लआ जाल लेकाआ। जे गोटे लेकान हाकुकु समटाव केते अगु कुआय। 48जब जाल हाकु ते पेरेज् लेना दो केंवटा होना डुरी पड़ा रे ओर इदीयय, तब ही हुँनि दुड़ूः कोते बढ़ियाँ हाकुकु रींबड़-रींबड़ ते ढुन्टी रे जवार कुआय जोटोः बेकार-बेकार गिडी एंडा कुआय। 49दुनियाँ रआ अखरी रे नेंका होयावओ। सिरमा दुत वेज् कोते धरमीकु मे से पापीकु छीनगाव कुआकू 50जोटोः पापीकु धदकाव सेंगेल भठी रे जोड़ाव कुआ हुँकू होंडे इयामेआकु जोटोः डटा रेडेजेआकु।”

मारी जोटोः नवाँ सिछा रआ दरकार

51“ईसु अनेज् चेलाकु सोधाव लअय तना आपे नोआँ गोटा दुखमा समझाव लेनापे?” चेलाकु कथा रुवाड़ लआ, “आँ,” 52ईसु हुँकूइ कथावा लआ, “गोटे परमेसर रआ बचन सि-सिखावकु, जे सिरमा राइज रआ बारे रे सिछा ञम चुकाव तड्अकु, हुँनि गिरहात लेकाअय, जे अनेज् रआ भन्डार एतेन मारी जोटोः नवाँ जीनिस उडुङेअय।”

नासरत रे ईसु ककु जुवाब लिदिया

(मरकुस 6:1–6; लुका 4:16–30)

53जब नोआँ गोटा हुडिञ गाम चबालेना तब ईसु होंडे एतेन सेनोः लेनय। 54हुँनि अनेज् सहार रे वेज्‌लेनय, होंडे जहुदीकु रआ बिनती ओड़ाः रे हुँनि नोंका सिछा दुखमा सिखाव यतकु दोहोलेनय, हेनते हुँकू सकती रआ काम कोते कथायते दोहोलेनाकु, “नुई तआ नोंकन गेयान जोटोः सकती रआ काम करावे तआ सकती ओका एतेन ञमतना? 55तना नुई बढ़ई होपोन नालगे जे? तना नुई एंगाते मरियम नालगे? तना जाकुब, जोसेफ, सिमोन जोटोः जहुदा नेनेनी रेनकु बोयहा ना लागे? 56तना नुई रेनकु कुड़ी बोकोतेतिकु अबुन तुली ककु दोहोना? दो फिन नोआँ गोटा ओका एतेन ञमतना?” 57#जोह 4:44हिना तआ हुँकू ईसु रआ चलते ठोकोर जोम लआकु, दो ईसु हुँकूइ कथावा लआ, “परमेसर पड़ा एतेन दुखमाय अवला होड़ रआ अपन ओड़ाः जोटोः सहार बाय केते गोटाते इजात ञमेआँ।” 58हुँकू रआ का सारीयोः ञेल केते हुँनि होंडे अगम सकती रआ काम काय कराव बेजालआ।

Currently Selected:

मती 13: BIX

Highlight

Copy

Compare