फिलमोन 1

सुरू रअः बचन

1पौलुस पखी तरअः जे ख्रीस्त ईसु आली कैदी हेके, आउर आबु आली बोको तिमुथियुस पखी तरअः आबु आली साँघे का-कामी वाला दुलार गाती फिलमोन, 2#कोलो 4:17आउर बहिन अप्पिया, आउर आबु आली गाती जोधा अरखिप्पुस, आउर फिलमोन आला ओड़ाअ रे जवारोआकु कलीसिया रेनअः नुमू। 3आबु आली बाबा परमेसर आउर परभु ईसु ख्रीस्त पखी तरअः आपे के दया आउर सानती भेटाव एकानोअ।

फिलमोन आला पेरेम आउर बिसवास

4-5जामा पबितर होड़कु बारे रे आउर परभु ईसु रअः बारे रे आम आला दुलार आउर बिसवास रेनअः चरचा आयुम केते, ईङ आला बिनती रे आम के उईहार मीईंग जामा बेरा परमेसर के धन्यवाद एमाअ दियींग। 6आले आउर आम आला बिसवास भागीयोअ, ईङ आला बिनती एदनाआ ची ख्रीस्त रे जे भलाई आबु लःअय गी एदनअ, होना भलाई रअः गेयान तरअः आम आला होना बिसवास रअः मि-जामुक आम रे असारोअः। 7एता लःअय ची ए बोको, ईङ के आम आला दुलार रअः चलते मुरुक खुस आउर ढाढ़स भेटाव नेना! हिना लःअय ची आपे तरअः पबितर होड़कु आला मन हरियार ना।

उनेसिमुस लःअय बिनती

8हिना लःअय ईङ के ख्रीस्त रे बेस कामी लःअय आम के हुकूम एमोः रेनअः होः हाक एदनाआ। 9बकिर पेरेम रेनअः खातिर ईङ आपे तरअः गोहराअ ठीक आदायिंग। ईङ पौलुस जे नहाअः दो सेंयाड़ निंग आउर ख्रीस्त ईसु लःअय नहाअः जेहेल रे एदानिङा। 10#कोलो 4:9उनेसिमुस लःअय आपे तरअः गोहराअ तनिङ, हुनी ईङ आली होपोन हेके, एता लःअय ची ईङ जेहेल हाथकड़ी रे हुनी आली आध्यात्मिक बाबा पाड़ीः निंग। 11मि बेरा ताही नेना, जब हुनी आपे आला एतान काम रिनी होः काय ताही नेना, बकिर नहाअः आपे भाईर लःअय कोवान बकिर ईङ लःअय होः हुनी मुरुक काम रिनी हेके।

12ईङ हुनी के फिन आम दुबाःड़े कुलगोःड दियींग, नोकान मनाअ पे ची ईङ अपन हिरदाय के गी कुलगोःड दिंग। 13ईङ जे बेस खभाईर रअः चलते हाथकड़ी रे एदानिङा, नुई के अपन दुबाःड़े दो-दोहो नाम किनिङ, जेकर से नुई आपे बदली रे ईङ के सेवा सुसारीङाय 14बकिर आपे आला बेगार मंजुर बिना, ईङ ए-एतान होः काईंग चहाव नेना, जेकर से आपे नोःआँ भलाई दबाव तरअः कोवान बकिर अपन मरजी रे कराय कु। 15एता लःअय ची ओकोम पाड़ी, हुनी आम तरअः थोड़ेक दिन जगुत लःअय, निआँ चलते आलगे नेनाय, ची हुनी जुग-जुग आम लोः साँघे ताहिन। 16नहाअः दो बंधाउवा रअः भेस रे कोवान, बकिर बंधाउवा तरअः बाईढ़ केते, आगम दुलार बोको रेनअः भेस रे। नुई आम के होः होड़ रअः खतिर आउर परभु आली चेला रअः खतिर होः मुरुक दुलार हुयाअः। 17जदि आम ईङ के अपन सझेदारी रेनअः भेस रे समझाआम, दो हुनी के नोकान स्वागतिमे, जे लकान ईङ के सोवागतिंगम। 18आउर जदि हुनी आम आला जहान कसुर तदाय, चाहे हुनी के आम आला जहनाअ रिंड़ एदनअ, दो ईङ आला खाता रे लगाय मे। 19ईङ पौलुस खुदे अपन तीः तरअः लिखाः दिंग, ईङ होना के चुकायिङ। ईङ के नोःआँ उ-ऊदुअ रेनअः दरकार कनोआँ ची आम दो अपन जिनगी जगुत लःअय ईङ आली रिंड़ जोम लिनी हेके। 20हाँ बोको, ईङ के आम तरअः परभु रे नोःआँ फयदा भेटाअः, ची ख्रीस्त रे ईङ आला हिरदाय के हरियारेमे! 21आम रे बिसवास दोहो यअते नोःआँ चिठी के, ईङ आम लःअय लिखाः दिंग। ईङ पाड़ीईंग ची आम तरअः जे कंहड़ीः दिंग, आम होना तरअः जादे केआम। 22मि बात आउर, आम ईङ लःअय ताहीनोः लःअय जोगाड़ेमे, एता लःअय ची ईङ के आसरा एदनअ, आपे आला बिनती रेनअः दोवासते ईङ फिन आपे लोः भेंटोः हिजोईंग।

आखरी क

23 # कोलो 1:7; 4:12 इपफ्रास, जे ख्रीस्त ईसु रेनअः चलते ईङ लोः जेहेलाय। 24#प्रे.कामी 12:12,25; 13:13; 15:37–39; कोलो 4:10; प्रे.कामी 19:29; 27:2; कोलो 4:10; कोलो 4:14; 2 तिमु 4:10; कोलो 4:14; 2 तिमु 4:11आउर ईङ लोः साँघे ककामी वाला मरकुस, अरिस्तर्खुस, देमास आउर लुकास पखी तरअः आम के जोहार। 25परभु ईसु ख्रीस्त आला दया, आपे आला आतमा रे हुयाव एकाना।

Currently Selected:

फिलमोन 1: ASR

Highlight

Copy

Compare