संत.मत्‍ती 25

दस कुंवारीकु आला गाम

1 # सं.लुका 12:35 “हिमीन बेरा सिरमा राईज हुंकू दस डिंड़ा कुड़ीकु लकान हुयाव कोआ, जे अपन मुर ईदी केते बार-बाबु लोः भेंटोः लःअय उडुंग नेनाकु। 2हुंकू मेसे पाँच झन मुर्खकु, आउर पाँच झन हुसियार ताहिनाकु। 3मुर्खकु अपन मुर लोः सुनूम काकु आगु लअः, 4हुसियारकु अपन मुर लोः कुप्पा रे सुनूम होः आगु लअकु। 5बार-बाबु के हिजोअ रे दिरीअ ना, आउर जामा दुड़ुंम दाकु, आउर गितीःग नाकु।

6“आधा निदा हहाकाव रअः सबद आयुम नेना, ‘आयुमेपे, बार-बाबु दराईया, हुनी लोः भेंटोः लःअय एला।’ 7हेने घड़ी हुंकू जामा डिंड़ा कुड़ीकु बिरिःड नाकु, आउर अपन-अपन मुर के तेयार दाकु। 8मुर्ख कुंवारीकु, हुसियार कुंवारीकु के बेता लिकुआकु, ‘आपे आला सुनूम मेसे थोड़ेक आले के एम पे, एता लःअय ची आले आला मुर ताले इड़िगोः ताना।’ 9हुसियार कुंवारीकु कंहड़ी रूवाड़ लअकु, ‘कोवान, जहान दुबाःड़े आले आउर आपे लःअय सुनूम का-पुराव ना होले, होना तरअः बेसा ची आपे दोकान सेन केते किरिङेपे।’ 10हुंकू सुनूम किरिङ सेन ताहिनाकु गी ची बार-बाबु हीःग सोदोर नाय, जे तेयार ताहिनाकु, हुंकू, हुंकू लोः बिहा ओड़ाअ रे बोलोअ नाकु। आउर दुवार के जापुःड केदाकु।

11 # सं.लुका 13:25 “तयोम आधा बंचाव उनकु डिंड़ा कुड़ीकु होः हीःग केते कंहड़ी तनाकु ‘परभु, परभु, दुवार के आले लःअय उघड़ायमे, आले के भीतरी हीःग चलेमे।’ 12बकिर हुनी कंहड़ी रूवाड़ लःअय ‘ईङ आपे के सचे कंहड़ी तानिङ, ची ईङ आपे के काईंग पड़ीआ।’

13“हिना लःअय चौंचित ताहिन पे, एता लःअय ची ना दो आपे होना दिन के पाड़ी आपे, आउर ना होना घड़ी के।

पे-होड़ धाँगड़ रअः गाम

(संत.लुकास 19:11–27)

14 # सं.लुका 19:11–27 “सिरमा राईज हुनी होड़ लकाना। जे परदेस सेनोः बेरा अपन बंधाउवाकु के राअः केते, हुनी अपन धन-खुरजी के देखा-तखा लःअय एमा लिकुआय। 15हुनी जामाकु के, जे लकान सवांग मोताबिक बंधाउवा के, मियांड के पाँच बोरा ठर्ड़रा, एटाःई के बार बोरा ठर्ड़रा, आउर आखरी रिनी के मि बोरा ठर्ड़रा एमा लिकुआय। होना तयोम हुनी परदेस सेनोः नाय। 16जेके पाँच बोरा ठर्ड़रा भेटाव ताहिना, हुनी तुरते सेन केते होना ठर्ड़रा रे कार-बार लःअय आउर होना तरअः आउर पाँच बोरा कामी लःअय। 17हिना लकान जेके बार बोरा ठर्ड़रा भेटाव ताहिना, हुनी आउर बार बोरा कामी लःअय। 18बकिर जेके मि बोरा ठर्ड़रा भेटाव ताहिना, हुनी सेन केते हुनी ओत के ला केते, अपन गोमके आला धन-खुरजी के उकु केदाय।

19“हुंकू बंधाउवाकु आली गोमके ढेर दिन तयोम रूवाड़ केते, हुंकू तरअः लेखा-जोखा इदी लःअय। 20जेके पाँच बोरा ठर्ड़रा भेटाव ताहिना, हुनी आउर पाँच बोरा आगु केते बेता लियाय, ए गोमके आम पाँच बोरा ठर्ड़रा एम ताही लआम। ‘नेलेमे, ईङ आउर पाँच बोरा कामी लाईङ।’ 21हुनी आली गोमके हुनी के बेता लियाय, ‘सबास, बेस आउर ईमानदार बंधाउवा, आम थोड़ेः केन रे ईमानदाराम। ईङ आम के ढेर रअः जिमा एमा मीईंग, आम ईङ आला रिझ रे गतियोः मे।’ 22होना तयोम हुनी हीःग नेनाय, जेके बार बोरा ठर्ड़रा भेटाव ताहिना, हुनी हीःग केते बेता लियाय, ‘गोमके, आम ईङ के बार बोरा ठर्ड़रा एम ताही लआम। नेलेमे, ईङ आउर बार बोरा कामी लाईङ।’ 23हुनी आली गोमके हुनी के बेता लियाय, ‘सबास, बेस आउर ईमानदार बंधाउवा, आम थोड़ेः केन रे ईमानदाराम। ईङ आम के ढेर रअः जिमा एमा मीईंग, आम ईङ आला रिझ रे गतियोः में।’ 24आखरी रे हुनी हीःग नेनाय, जेके मि बोरा ठर्ड़रा भेटाव ताहिना, हुनी कंहड़ी लःअय, ‘गोमके, ईङ के पता ताहिना ची आम कठोर एदान मेआ, जे दुबाःड़े काम बिःड तअः होनाःड़े ईरेआम, आउर जे दुबाःड़े काम छिटाव तअः होनाःड़े जवारेआम। 25हिना लःअय ईङ बोरो निनिंग आउर ईङ सेन केते आम आला ठर्ड़रा के ओत रे उकु लाईङ। नेलेमे, नोःआँ आम आला हेके नोःआँ के आम के रूवाड़ओ दिमीईंग।’ 26गोमके हुनी के उतारा एमा लियाय, ‘खपतान, आउर आलसी बंधाउवा आम के पता ताहिना, ची ईङ जे दुबाःड़े काईंग बिःड तअः होनाःड़े ईरेईंग, आउर जे एड़े काईंग छिटाव तअः होनाःड़े जवारेईंग? 27दो आम ईङ आला धन के महाजनकु दुबाःड़े जिमा ताकेआम, तब ईङ रूवाड़ोः रे होना के सुध ईदी केते तईसलाव ताकेईङ। 28हिना लःअय होना मि बोरा ठर्ड़रा एदनाअ नोःआँ के ईदी केते, जेकर दुबाःड़े दस बोरा ठर्ड़रा एदनाअ हुनी के एमाईमे। 29#सं.मत्‍ती 13:12; सं.मर 4:25; सं.लुका 8:18एता लःअय ची जेकर दुबाःड़े जे एदनाअ, हुनी के आउर एमाअ चिकियाय आउर हुनी दुबाःड़े ढेर कोआ, बकिर जेकर दुबाःड़े एतान होः कनोआँ, हुनी दुबाःड़े जे एदनाअ होना केहोः इदी केआकु। 30#सं.मत्‍ती 8:12; 22:13; सं.लुका 13:28आउर नुई बेगारी बंधाउवा के बाहरी अंधार रे गिड़ी गोअ ताईपे, होनाःड़े हुंकू ईयाम केआकु आउर डाटा रिड़िःग केआकु।’

न्याय रअः दिन

31 # सं.मत्‍ती 16:27; सं.मत्‍ती 19:28 “जब मनवा होपोन जामा सिरमादूतकु लोः अपन महिमा लोः हीःग केते, हुनी अपन महिमा रेनअः राईज गदी रे दुड़ूः कोआय, 32आउर जामा जाईतकु के हुनी दुबाःड़े जवार किकुआकु, जे लकान चरवाहा भेंड़ा के मेरोम तरअः आलगे कुआकु। हिना लकान हुनी होड़कु के, हुनी-नुई तरअः आलगे-आलगे किकुआय। 33हुनी भेंड़ा के अपन जोम पखी आउर मेरोम के आनेःग आला कोंजरा पखी तिंगु किकुआय। 34तब राजा आनेःग तरअः जोम पखी तनकु होड़कु के बेता किकुआय, ‘ईङ आली बाबा तरअः आसीस नाम लिनकु होड़ एला, आउर होना राईज रेनअः अधिकारी बनाआपे, जे दुनिया रअः सुरू तरअः आपे लःअय तेयार लअः एदनाअ। 35एता लःअय ची ईङ रांगेःग ताहिनिंग, आउर आपे ईङ के खियाव लिङापे, ईङ तेतांग ताही निङ आउर आपे ईङ के पियाव लिङापे, ईङ परदेसी ताही निङ आउर आपे ईङ के अपन दुबाःड़े गुतिया दोहो लिङापे, 36ईङ एसेन होड़ो ताही निङ, आउर आपे ईङ के गेन्दरअ सोलोंग उ-लिङापे, ईङ बेमार ताही निङ आउर आपे ईङ लोः भेंटोः लःअय हीःग नेनापे, ईङ जेहेल उनी ताही निङ आउर आपे ईङ लोः भेंटोः हीःग नेनापे।’ 37नोःआँ चलते धरमीकु हुनी के बेता कियाकु, ‘परभु, आले आम के ओका हिला रांगेःग नेल लेमेआले आउर खियाव लेमेआले, ओका हिला तेतांग नेल लेमेआले आउर पियाव लेमेआले? 38आले आम के ओका हिला परदेसिया नेल लेमेआले, आउर आम के अपन दुबाःड़े दोहो लेमेआले, ओका हिला एसेन होड़ो ताहिनाम आउर गेन्दरअ सोलोंग उ-लेमेआले? 39ओका हिला आम के बेमार चाहे जेहेल रे नेल लेमेआले, आउर आम लोः भेंटोः हीःग नेनाले?’ 40राजा हुंकू के नोःआँ उतारा एमा किकुआय, ‘ईङ आपे के सचे बेताः दिपीईंग, जब आपे ईङ आलकु छोटे-बड़े बोकोकु मेसे जाहें लःअय जे कुछ कामी लअपे, दो होना के आपे ईङ लःअय गी कामी लअपे।’

41“फिन हुनी राजा आनेःग कोंजरा पखी तानकु के बेता किकुआय, ‘अभागा होड़कु, ईङ तरअः लंका ओचोः जुनोः पे। आउर होना का-इड़िगोअ सेंगेल रे जू, जे सैतान आउर हुनी आलकु दूतकु लःअय तेयार लअः एदनाअ। 42निआँ आपे आला डांड़ हेके एता लःअय ची ईङ रांगेःग ताही निङ आउर आपे ईङ के कापे खियाव लिङा, ईङ तेतांग ताही निङ आउर आपे ईङ के कापे पियाव लिङा, 43ईङ परदेसी ताही निङ आउर आपे ईङ के अपन दुबाःड़े कापे दोहो लिङा, ईङ एसेन होड़ो ताही निङ आउर आपे ईङ के कापे सोलोंगअ लिङा, ईङ बेमार आउर जेहेल रे ताही निङ आउर आपे ईङ लोः भेंटोः कापे हीःग नेना।’ 44नोःआँ चलते हुंकू होः हुनी के कुली कियाकु, ‘परभु, आले आम के ओका हिला रांगेःग, तेतांग, परदेसी, एसेन होड़ो, बेमार चाहे जेहेल उनी नेल लेमे आले, आउर आम के काले सेवा लेमेआ?’ 45तब राजा हुंकू के उतारा एमा किकुआय, ‘ईङ आपे के सचे बेताः दिपीईंग, ची जे कुछ आपे ईङ आलकु छोटे से छोटे बोकोकु मेसे जाहें मिहोंड़ लःअय कापे लअः, होना के आपे ईङ लःअय होः कापे लअः।’ 46#दानि 12:2आउर नुकू का-अन्तोः डांड़ भो-भोगाव सेन कोआकु, बकिर धरमीकु का-अन्तोः जिनगी रे बोलो कोआकु।”

Currently Selected:

संत.मत्‍ती 25: ASR

Highlight

Compare

Copy