इब्रानी 2

1निआँ लःअय ची होना बात रे जेके आबु आयुम तदाबु, आउर गी होना रे मन लगायाबु, नोकान आलु हुयाव कोअ ची भटकाव केते एटाअ ते सेन जुनोः बु। 2एता लःअय ची जे बचन सिरमादूत तरअः कंहड़ी लअः ताहिना, होना बि-बिसवास लकान एदनाआ आउर जामा गलती आउर काकु मनाआ हुंकू लःअय ठीक-ठीक बदला भेटाव ताना। 3दो आबु एता लेकन बंचाव दाड़ी कोआबु, जदि आबु बड़े उधार के घिड़ोआबु, जेके पहिल रेगी परभु तरअः घोसना लअः ताहीना। जे होड़ परभु के आयुम लियाकु, हुंकू होना संदेस के आबु लःअय साबित लअकु। 4आउर गाती-गाती चिनहा आउर छकरित कामी आउर रकम-रकम रअः सवांग रअः काम आउर परमेसर होः गी अनेःग आला इकछा रअः मोताबिक पबितर आतमा आला बरदान हहटिङ रअः चलते, नोःआँ रअः गोवाह एम एकाय केनाय।

आबु आली ऊउधारी

5परमेसर, होना हिजोअ वाला दुनिया के, जेके आबु बखनायाबु, सिरमादूत आला हक रे काय लआ। 6#सिरिंग 8:4–6जाहें परमेसर के बेता लियाय,

“आम होना रअः सुधी इदीयाम? चाहे मनवा होपोन ओके हेके,

ची आम हुनी के नजाईरीयाम?

7आम हुनी के सिरमादूत तरअः थोड़हे गी पद रे घटाव तदियाम,

आम हुनी तेंग रे महिमा आउर आदर रअः मुकूट दोहो लआम।

8आउर हुनी के अपन तीः रअः कामी रअः हक एमा लियाम। आम जामा जिनीस के हुनी आला अधीन रे केदाम।”

हिना लःअय ची परमेसर जामा जिनीस के हिनी आला हक रे केदाय, दो हुनी एतान होः नोकान काय बाई लअः जे अनेःग आला हक रे कनोआँ, बकिर आबु नहाअः जगुत जामा कुछ हुनी आला हक रे काबु नेलेआ। 9बकिर आबु नोःआँ नेल दाबु ची परमेसर ईसु के थोड़ेक बेरा लःअय सिरमादूत तरअः पद तेके घटाव ताही लःअय, नहाअः दो हुनी के महिमा आउर आदर रअः मुकूट सोलोंगोअ किदयाय, एता लःअय ची हुनी मराईन रअः दुख सहाव लःअय। जेकर से ची परमेसर आला दया रअः चलते हुनी जामे होड़कु लःअय मराईन के अटकार दाड़ी। 10एता लःअय ची जे परमेसर लःअय जामा कुछ एदानिया आउर जेकर चलते जामा कुछ एदनाआ, परमेसर के बेस आदा लिया ची ढेर बोको-बहिन के महिमा रे आदेर कुआय, दो हुंकू आला उधार वाला के दुख ऊउठाव रअः चलते सिध कियाय।

11एता लःअय ची पपबितर वाला आउर जेके पबितर कुआय जामे मियांड बंसवाईर रिनकु गी हेके हिना लःअय हुनी बोको बोयहा क-कंहड़ी लःअय काय लाजोआ। 12#सिरिंग 22:22हुनी कंहड़ीआय

“ईङ आम आला नुमू अपन बोको बोयहाकु के सुनाव उकूईङ,

आउर सभा रअः तलारे ईङ आम आला भजन सिरींगेईङ।” 13#जसा 8:17; जसा 8:18आउर “ईङ हुनी तेंग रे पूरा भरसा दोहोयिङ”, आउर फिन “नेलेपे, ईङ के आउर नुकू चेंगाकु के जे परमेसर ईङ के सोंपावउ तदिंङाय।”

14एता लःअय ची चेंगाकु मयोम आउर सिकार रिनकु भागी हेके, दो ईसु होः मयोम आउर सिकार रिनी हुयाव नेनाय जेकर से अपन मराईन दोवासते, माने कि सैतान के, जे मराईन रअः हक नाम ताही लःअय नास किदीयाय। 15हुंकू जामा धाँगड़कु के छोड़ाव लिकुआय, जे मराईन रअः बोर रेनअः बंधाउवा रे जिवीडोः केनाकु। 16#जसा 41:8,9हुनी सिरमादूतकु के कोवान बकिर अब्राहम आलकु बंसवाईर के संभड़ाव कुआय। 17हिना लःअय हुनी के जामे बरान तरअः हुनी आलकु बोको लकान बनाअः पड़ाव नेना, जेकर से ची परमेसर आला सेवा-सुसार रे सोगारू आउर बि-बिसवास लेकन महापुरोहित बनाव सकाए आउर होड़कु के हुंकू आला पाप छमा एमोअ लःअय बलिदान एम दाड़ी। 18एता लःअय ची हुनी परखाअ रअः बेरा दुख उठाव लःअय, ची हुनी होड़कु आला परीकछा योअ बेरा, सहाड़ा एम दाड़ी।

Currently Selected:

इब्रानी 2: ASR

Highlight

Copy

Compare