2 कुरिन्थी 8
8
आबु आला दान
1 #
रोमी 15:26
ए बोकोकु, आले आपे के परमेसर आला होना महान दया रेनअः बारे उदूः देपेआले, जे मकिदुनिया पहटा रेनअः कलीसिया रे हुयाव ताना। 2हुंकू जामा बरन रेनअः कठिन सताव परीकछा रे होः हुंकू मुरुक खुस थिनाकु, आउर मुरुक लंगा-तंगा ताहिनोअ रे होः हुंकू मा-मदाईत रे मुरुक मड़ांग बढ़ाव नेनाकु। 3ईङ हुंकू बारे गोवाही एमेईंङ ची हुंकू जेतना एम सकाय केनाकु हुमिन एम लआकु। निमने कोवान, बकिर अपन सवांग तरअः होः जादे एम थिलाअकु आउर मन तरअः एम लआकु। 4नोःआँ दान रे आउर पबितर होड़कु आला सेवा रे भागीदार पाड़ीयोअ लःअय मोका भेटाअः लःअय, हुंकू घड़ी-घड़ी ईङ तरअः गोहराव नेनाकु। 5हुंकू अपन इमान रे आले आला आसरा तरअः जादे, हुंकू पहिल परभु रे अपने आप सोंपाव नेनाकु, तयोम परमेसर आला मरजी तरअः आले प्रति अपन के सोंपाव लआकु। 6हिना लःअय आले तीतुस के समझाव लियाले ची जे लकान हुनी अपने पहिल सुरू थिलाआय, हिना लकान आपे ताला रे नोःआँ दान जा-जवार रअः काम के पुरा होः पुराय। 7आउर आपे जामा बात रे माने कि बिसवास रे, कंहड़ी-गथा रे, बुधी रे, जामा लकान मेहनाईत रे आउर आले प्रति दुलार रे बढ़ाव तोरापेआ, हिना लकान दान जा-जवार रअः काम रे होः बढ़ाव सेनपे।
8नोःआँ ईङ हुकूम रेनअः भेस रे काईङ कंहड़ीः दा बकिर एटाअ होड़ उतसाह ते होना रअः बखनाव केते ईङ आपे आला दुलार रेनअः सचाई के जाँचाव दाईङ। 9एता लःअय ची आपे आबु आली परभु ईसु ख्रीस्त आला दया तरअः जान-चिनहार एदान पेआ, ची गीरहत हुयाअः तुली रे होः आपे लःअय हुनी रांगेःग तेंताङी बनाव नेनाय। जेकर से ची हुनी आला रांगेःग-तेंताङ तरअः धनगार जुनोअपे।
10नोःआँ बात रे ईङ आपे के नोःआँ सलाह एमाअ देपेईङ, नोःआँ रे आपे के फयदा एदनाआ। आपे बिताव ना बरीस रे ना सिरीफ दान एमोअ रे भाईर मड़ांग थिनापे, बकिर दान एमोअ रअः ईकछा रे होः जामा तरअः मड़ांग थिनापे। 11नहाअः दो होना काम के पुराय पे जे लकान आपे चहाआपे, हिना लकान पुपुरा लःअय इकछायपे। जेतना आपे दुबाःड़े एदनाआ हिना तरअः पुराय पे। 12एता लःअय ची जदि जाहें दान एमोअ लःअय इकछा दोहोयाय, दो हुनी के अपन आला पाया मोताबिक एमोअ ढेर एदनाआ। अपन पाया तरअः जादे एमोअ रअः दरकार कनोआँ, होना दान के परमेसर गरहन केआय।
13आले नोःआँ काले चहाआ ची एटाअकु के छुट एमाकुले, आउर आपे के बिपाईत भेटाअः। आले दो बराबईर चहाआले। 14नोःआँ बेरा आपे आला बढ़ती तरअः हुंकू आला दरकार पुरा कोआ, जेकर से ची हिजोअ बेरा आपे आला हुंकू आला बढ़ती तरअः आपे आला दरकार पुरा योअ जेकर से बराबईर हुयाव जुनोः। 15#उइठ 16:18जे लकान ची परमेसर आला वचन रे लिखा लअः एदनाआ ची, “जे बगरा जवार लआकु हुंकू दुबाःड़े जादे बगरा का बंचाव नेना, आउर जे थोड़हे जवार थिलाअकु हुंकू लःअय घट-कमी का हुयाव नेना।”
16ईङ परमेसर के धन्यवाद एमायींग जे लकान ईङ आपे आला उतसाह, ठीक हिना लकान तीतुस आला मन रे होः एदनाआ। 17एता लःअय ची हुनी आले आला गोहराव के गरहन लःअय आउर हिमने कोवान हुनी के अपन इकछा होओ दोहो लःअय, हिना लःअय हुनी अपन मरजी रे आपे दुबाःड़े हिजोअ लःअय लालायित एदानिङा। 18आउर आले तीतुस लोः, मिहोंड़ बोको के होः कुलगोःडियाले जेकर नुमू बेस खभाईर प-परचार रे जामा कलीसिया रे फैलाव ताना। 19नोःआँ आलावा नोःआँ काम रे कलीसिया रे आले लोः चलाअ लःअय ठहराव लियाकु नोःआँ सेवा काम के निआँ लःअय कामी याले ची परभु के महिमा भेटाअः आउर एटाअकु लःअय भलाई हुयाअः।
20आले निआँ लःअय नोकान लआले, ची अपन इकछा बरदान होड़कु जगुत सोदोरोअ रे चौंवचित ताहिन, जेकर आले सेवा याले आउर आले रे ओके होः दोस आलकु लगाव के। 21#बेव 3:4एता लःअय ची आले परभु दुबाःड़े आला नजाईर भाईर रे कोवान, बकिर होड़कु आला नजाईर रे होः बेस चाईल-चाकर रे धेयान दोहो याले।
22आउर हुनी लोः आले अपन बोको के होः कुलगोःड तदियाले, जेके आले घड़ी-घड़ी परखाव लियाले, आउर ढेर उतसुक इदानियाँ नहाअः आपे रे पुरा भरसा दो-दोहो रअः चलते हुनी आला उतसह होः बढ़ाव ना। 23जदि जाहें तीतुस रअः बारे आपे के कु-कुली कु दो हुनी आले आली गाती आउर आपे लःअय ईङ आली सझेदार साँघे ककामी वाला हेके। आउर जदि आले आलकु बोकोकु बारे कु-कुली कु दो, हुंकू कलीसिया रिनकु प्रेरित आउर ख्रीस्त आलकु मरजाईद हेके। 24हिना लःअय हुंकू के अपन पेरेम देखायपे जेकर से ची कलीसिया कु के नोःआँ बात रेनअः साबुत भेटाअः ची जे लकान आले आपे बारे घमन्डेआले होना सच हेके।
Currently Selected:
2 कुरिन्थी 8: ASR
Highlight
Copy
Compare
Share
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
