2 कुरिन्थी 7
7
1ए दुलार कु, आबु लःअय नोकान जामा वादा भेटाव ताना, हिना लःअय आबु होड़ो आउर मन के जामा बरन रेनअः खदार तरअः आपने-आप सुध जुनोः बु। आबु परमेसर आला बोर दोहो यअते पबितरता पखी बढ़ाव एकान बु।
पौलुस आला रिझ
2आपे अपन मन रे आले के ठाँव एमेपे, आले ओके आला होः काले हराकाईत तदा, ना जाहें आला बगड़ाव तदाले। आउर जाहें तरअः फयदा इदी तदाले। 3ईङ आपे के दोस एमोअ लःअय नोःआँ काईङ कंहड़ीः दा। एता लःअय ची ईङ पहिल तरअः गी कंहड़ी चुकाव तानिङ, ची आपे दो आले आला मन रे बसाव तनापे ची आले आपे लोः जिवीडोः लःअय चाहे गोजोअः लःअय तेयार एदान लेआ। 4ईङ आपे रे मुरुक भरोसा आउर घमन्ड एदनाआ। आले आला जामा बिपाईत बेरा पुरा संतवाना एम लआपे आउर भरपुर खुसी एम लआपे।
5 #
2 कुरि 2:13
जब आले मकिदुनिया हीःग थिनाले, हिमीन रे होः आले आला होड़ो के आराम का भेटाव थिना, बकिर आले के दो जामा बरन रेनअः दुख ऊउठाव पड़ाव थिना, बाहरीते झगड़ा आउर मन रेनअः भीतरी बोर स-सहाव पड़ाव नेना। 6बकिर परमेसर जे आबड़-दुबाड़ कु के ढाढ़स एमेआय, तीतुस आला हिजोअ रे आले के दिलासा भेटाव नेना। 7सिरीफ हुनी हिजोअ रे भाईर ढाढ़स का भेटाव नेना, बकिर निआँ चलते ची आम हुनी आला ढाढ़स के बड़हाव थिलाआम। हुनी आले के उदूः थिलाआय ची आपे आले के नेनेल नामापे, पसताअ रेनअः मन तरअः दुखी एदान पेआ आउर आले लःअय तिंगु ताहिनोआपे हिना लःअय आले मुरुक खुस ताहिनोआले।
8भाले अपन चिठी तरअः ईङ आपे के दुख सोदोर लेपेईङ, बकिर सेरे होः ईङ के होना चिठी तरअः एतान दुख होः कनोआँ। जे लकान पहिल पछताव थिनिङ। बकिर नहाअः ईङ नेल दाईङ ची होना चिठी तरअः आपे के थोड़ेक बेरा लःअय भाईर दुख सोदोर थिना। 9हिना लःअय ईङ खुस एदानिया। बकिर निआँ लःअय कोवान ची आपे के दुख सोदोर थिलीईंङ बकिर निआँ लःअय ची होना दुख रअः चलते गी आपे आला मन रूवाड़ नेना। एता लःअय ची आपे आला होना दुख परमेसर आला मरजी मोताबिक थिना। जेकर से ची आले पखी तरअः आपे लःअय जहान बात रे होः हानी आलु सोदोरोअ। 10जे दुख परमेसर आला मरजी मोताबिक हुयाआ, होना तरअः मन रूवाड़ जुनोआ, आउर होना तरअः उधार हुयाआ। नोःआँ लःअय पछताअ का पड़ाआ बकिर दुनिया रेनअः दुख मराईन के आगुयाय। 11नेलेपे ची आपे जे दुख परमेसर आला मरजी मोताबिक गरहन तदापे होना रे आपे आला जिनगी रे बदलाव आगु लःअय। हिना लःअय आपे आपने-आप बेकासुर स-साबित रअः मरजी, अनयाय रअः बिरोध इकिन खीस, इकिन बोर, ईङ के नेनेल रअः उतसाह, आले के गाती एमोअ रअः इकिन जुरजुट, आउर नेयाय एमोअ रअः इकछा दोहोयापे। नोःआँ जामा बात रे आपे नोकान साबित तदापे ची आपे नोःआँ बात रे बेकासुर एदान पेआ। 12जदि ईङ आपे लःअय लिखा थिलीईंङ, दो हुनी होड़ रअः चलते कोवान जे गुनाह थिलाआय, आउर ना ची हुनी चलते जेकर कसुर थिलाआय। बकिर निआँ लःअय लिखा थिलीईंङ ची परमेसर रअः मड़ांग रे आले प्रति आपे आला उतसाह दिसतार जुनोः। 13नोःआँ तरअः आले के ढाढ़स भेटाव ताना।
आले आला नोःआँ ढाढ़स तरअः आलावा तीतुस आला खुसी तरअः आले आउर जादे खुस नेनाले, एता लःअय ची आपे जाम कु रअः चलते हुनी आला जीव रे हरियार आदा नेना। 14आपे लःअय ईङ हुंकू तरअः जे बईढ़-चईढ़ केते बात थिलीईंङ, होना लःअय ईङ के लाजोअ का पड़ाव ताना। बकिर आले जे लकान आपे तरअः जामा सच-सच कंहड़ी थिलीईंङ, हिना लकान आपे बारे रे आले आला बईढ़-चईढ़ केते बात थिलीईंङ होना तीतुस रअः मड़ांग रे सच साबित नेना। 15हुनी जब नोःआँ के याईद लःअय ची आपे जामा एता लकान मनाव तनापे, आउर बोरते थरथराव यअते आपे एता लकान हुनी लोः भेंट नेनापे, दो आपे प्रति हुनी आला दुलार आउर गी बड़हाव जुनोआ। 16एता लःअय ची ईङ आपे रे पुरा भरसा दोहो सकायिङ हिना लःअय ईङ खुस एदानिङा।
Currently Selected:
2 कुरिन्थी 7: ASR
Highlight
Copy
Compare
Share
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
