2 कुरिन्थी 3

नावाँ करार रिनकु से-सेवाकु

1एतान आले फिन अपन बड़ाई याले? चाहे आले एटाअकु लकान दरकार एदनाआ ची चिठी आपे लःअय आगु केते हिजोआले। चाहे आपे तरअः ईदी याले? 2आले आला चिठी दो आपे हेके जे आले आला मन रे लिखा लअः एदनाआ, जेके जामे होड़ पाड़ीआकु आउर पढ़हाआकु। 3#उइठ 24:12; जिर 31:33; जहेज 11:19; 36:26आपे सचेगी ख्रीस्त आला होना चिठी हेके, जेके ईसु गी आले तरअः लिखाअ ची तदलेआय जे आले आला सेवा रेनपे जोअ हेके, जे सियाही तरअः कोवान बकिर जिवीःड परमेसर आला आतमा तरअः लिखा ताना, जे टुकू रेनअः पाटी रे कोवान बकिर मनवा आला हिरदाय रुपी पटी रे लिखा ताना।

4आले ख्रीस्त तरअः परमेसर रे नेकान गी भरसा दोहोयाले। हिना लःअय नोकान कंहड़ीयाले। 5नोकान कनोआँ ची आले अपन रे नुमिन समरथ एदान लेआ, जे सोंचाव याले ची आले अपन-हारते जहान दाड़ी आले। बकिर आले के समरथ दो परमेसर तरअः भेटाआ। 6#जिर 31:31जे आले के मियांड नावाँ करार रअः से-सेवाकु बनाअः लाईक ठहराव तडलेआय। नोःआँ जहान लिखा लअः पोथी नलागे, बकिर आतमा रेनअः करार हेके, एता लःअय ची लिखा लेनअ पुथी दो नास जुनोआ बकिर आतमा जिनगी एमेआय।

नावाँ करार रेनअः बड़ाई

7 # उइठ 34:29 बकिर जदि मराईन रअः होना अकछर सेरेंग रेनअः पाटी रे लिखा लअः एदनाआ, नुमिन लवकाव भेस हीःग नेना ची इसराइल रिनकु होड़ मुसा आला होना जिरजोर मेःड मुहांड़ के काकु नेल दाड़ी लआ। आउर सेरे होः हुनी आला होना लवकाः तयोम घटाव नेना। 8जदि मारी करार नुमिन लवकाव ताही नेना, दो आतमा रआ करार जादे लवकाव हुयाव कोआ। 9आउर फिन जब दोसी ठा-ठहराव वाला करार रेनअः काम, नुमिन लवकाव ताही नेना दो धरमी ठा-ठहराव वाला करार, बाईढ़ केते लवकाव हुयाव कोआ। 10मारी करार रअः महिमा ढेर तेज थिना बकिर नावाँ करार रअः महिमा लोः तुलाय रे मारी वाला महिमा नोःआँ मड़ांग रे एतान होः कनोआँ। 11जदि ईड़ीगोअ वाला करार नुमिन महिमा थिना, दो असथीर ताहीनोः वाला करार जादे महिमा ताही कोआ।

12अपन निआँ आसरा रआ चलते आले नुमिन डिड़ह से कंहड़ीयाले। 13#उइठ 34:33आले हुनी मुसा लकान कनेलेआ, जे अपन मेःड मुहांड़ रे परदा लगाव एका ताकेनाय, जेकर से इसराइलीकु होना घटा वाला महिमा रेनअः अंत के आलकु नेल के। 14बकिर इसराइलीकु आला बुधी बन्द गुल थिना, एता लःअय ची नहाअः जगुत जब हुंकू होना मारी करार के पढा़आकु, दो हिना परदा हुंकू तेंग रे लगाव ताही नोःआँ, होना के काकु उडुंग तादा। एता लःअय ची होना परदा के ख्रीस्त गी हटाव दाड़ीआय। 15नहाअः जगुत मुसा आला कनहुन के पढ़ाव केते सुनायाकु दो, हुंकू आला मन रे नहाअः जगुत परदा पड़ाव ताही नोःआँ। 16#उइठ 34:34बकिर जब हुनी आला मन, “परभु पखा मन रूवाड़ेआय दो होना परदा हटाव जुनोआ।” 17एता लःअय ची “परभु दो आतमा हेके,” आउर जे एड़े परभु आला आतमा एदनाआ होनाःड़े छुटकानी एदनाआ। 18बकिर आबु उघड़ा मेःड-मुहांड़ तरअः परभु आला महिमा नोकान चमकाआ, जे लकान आयना रे तरस बजड़ाव केते चमकाआ, हिना लकान परभु आला आतमा तरअः चमका आबु। हिना लकान दिनोदिन महिमा तरअः महिमा रे बदलाव यते हुनी महान महिमामय भेस रे बदलाव सेना।

Currently Selected:

2 कुरिन्थी 3: ASR

Highlight

Copy

Compare