1 तिमुथी 6
6
धाँगड़कु रअः बारे सिकछा
1होड़कु जे बंधाउवाकु आला जुवाठ लतार रे बंधाउवा बनाव तानाकु, हुंकू के अपन गोमके कु के जामा बरन रअः मरजाईद रेनअः जुकूर समझाअ चाही, जेकर से ची परमेसर आला नुमू आउर आबु आला उपदेस रेनअः निन्दा आलु हुयाव कोअ। 2नोकान बंधाउवा जेकर गोमके कु बिसवासी हेके, हुंकू के, हुंकू बोको हुयाअः रअः चलते तुछ आलकु समझाव कोअ। हुंकू के थोड़हे आलकु सेवा कु बकिर अपन गोमके आला जादे आउर सेवा सु-सुसार चाही, एता लःअय ची जेके नोकान फयदा भेटाअः ताना हुंकू बिसवासी हेके, आउर दुलारा हेके।
झुठा सिकछा आउर सचा धन
नोःआँ जामा बात रेनअः उपदेस एमा कुमे आउर समझाव एका कुमे। 3जदि जाहें नोःआँ तरअः एटाअ बरन रेनअः बात सिखाव कुआकु आउर आबु आली परभु ईसु ख्रीस्त आला होना बेस बचन के काय मनाआ, आउर भकती तरअः पेरेःग उना उपदेस तरअः खुस कनिया, 4दो ईङ समझाईंग हुनी के घमन्ड अंधरा बनाव तादियाय, हुनी एतान होः काय पाड़ीआ, आउर हुनी के कंहड़ी-उपड़िङ तेकर बेकार रेनअः सबद के एदी केते झ-झगड़ा रेनअः रोग लगाव ताना। नोःआंँ बात तरअः दो हिसंगा, झगड़ा, निन्दा सिकाईत आउर गादुस-गादुस सक 5आउर जामा बेरा झगड़ा हुंकू तरअः हुयाव एकाना, जेकर बुधी बगड़ाव ना आउर हुंकू सचाई तरअः आःड तनाकु, हुंकू समझाआकु ची परमेसर आला से-सेवा धन कामी रेनअः गी मियांड जरिया हेके।
6सबुर केते परमेसर आला भकतीये रे सचे गी जादे फयदा भेटाआ। 7एता लःअय ची आबु दुनिया रे जहान आगु केते हीःग तनाबु? आउर ना नोआँड़े तरअः इदी केते सेन दाड़ी कोआबु! 8हिना लःअय जदि आबु दुबाःड़े जो-जोम लःअय आउर सो-सोलोंग लःअय एदनअ, दो निआँ रे गी सबुर ताहिनोअ चाही। 9बकिर हुंकू जे धनवान बनाअः चहाआकु, परीकछा रे पड़ाव केते फंदा रे दाअः जुनोआकु आउर नोकान ढेर हुरमुठ आउर नसोअ खाता परीकछा घेराव केते होड़ के बगड़ाव कुआय आउर नसोअः रअः गड़हा रे ढोकलाव गोअ ताकुआय। 10एता लःअय ची धन रेनअः लोभ जामा बरन बुराई रेनअः जाईर हेके। निआँ लोभ रे पड़ाव केते उकिन होड़ बिसवास रेनअः होरा तरअः भटकाव नाकु आउर हुंकू ढेर खिलपाईत झेलाव लआकु।
याईद दोहो रेनअः बात
11बकिर ए परमेसर आली होड़, आम नोःआँ बात तरअः लंका ताहिन मे आउर धरम रेनअः काम, भकती, बिसवास, पेरेम, धीरज आउर नमर रे लगाव ताहिन मे। 12बिसवास लःअय लगतार लड़ाव एकान मे, आउर होना का-अन्तोः जिनगी के नामेमे। आम निआँ लःअय राअः लेनमे हेके, आउर जेकर बारे रे आम ढेर होड़कु मड़ांग रे बिसवास रअः बढ़ियाँ गोवाह एम तदाम। 13#सं.जोह 18:37परमेसर जे जामे के जिनगी एमेआय आउर ईसु ख्रीस्त जे पुनतियुस पिलातुस रअः मड़ांग रे अपन किमती गोवाही एम लःअय, हुंकिन मड़ांग रे ईङ आम के नोःआंँ हुकूम एमाअ दिमीईंग। 14जब तक आबु आली परभु ईसु ख्रीस्त काय दिसतारोआ जगुत आम के जे हुकूम एम लआ एदनाआ, हिना रे बेदाग आउर बेकासुर भाव तरअः चलाव एकान मे। 15जेके परमेसर अपन ठीक बेरा सिरे दिसतार कियाय, जे परम धनया, मियांड ठुका हाकिम आउर राजाकु आली राजा आउर परभु कु आली परभु हेके। 16जे काय गोजोअः वाला सिरीफ हिनी हेके, हुनी, नोकान मरसल रे ताहिनोआय जे एड़े आबु इरबु सोदोर दड़ीयोआ। हुनी के ना जाहें नेल तदियाकु आउर ना नेल दाड़ी कियाकु। हुनी आला मरजाईद आउर राईज जुग-जुग बनाल ताहिनोअ! आमीन।
17नोःआँ जुग रिनकु धनवान कु के बेता कुपे ची हुंकू आलकु घमन्ड के, आउर नासोअ वाला धन-खुरजी रे कोवान बकिर परमेसर रे भरसा दोहोय कु, जे आबु आला सुख लःअय जामा जिनीस भरपुर एमेआय। 18हुंकू के हुकूम एमा कुपे ची हुंकू बेस-बेस कामीकु। आउर बेस काम रेनअः धनगार बनाअः कु, आउर दान एमोअ आउर खुला दिल वाला पाड़ीयोअ कु। 19नोकाने रे गी हुंकू अपन लःअय सिरमा लःअय पुंजी जवार केआकु, जे हिजोअ दिन लःअय बढ़ियाँ मजगुत नेव पाड़ी कोआ। निआँ तरअः हुंकू सचा जिनगी के थमभाव ताकेआकु।
20तिमुथियुस आम के जे जिमा लआ एदनाआ आम होना के जतनाय मे। परमेसर रअः बिरोध वाला बात तरअः आउर होना बात तरअः जेके “बुधी” मेन गेआकु बकिर सही माने रे बुधी नलागे होना बात तरअः बंचाव ताहिन मे। 21थोड़ेक होड़ होना के मनाव केते बिसवास तरअः भटकाव नाकु।
परमेसर आला दया आपे तेंग रे ताहिन।
Currently Selected:
1 तिमुथी 6: ASR
Highlight
Copy
Compare
Share
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
