1 तिमुथी 1
1
1बिसवास रे ईङ आली सचा होपोन तिमुथियुस लःअय ईङ पौलुस नोःआँ लिखाअ दाईंग, आबु आली उ-उधार अवला परमेसर आउर आबु आला आसरा ख्रीस्त ईसु आला हुकूम तरअः, ख्रीस्त ईसु आली प्रेरित बनाव तनाय।
2 #
प्रे.कामी 16:1
तिमुथियुस के,
जे बिसवास रे सचा होपोन हेके परम बाबा परमेसर, आउर आबु आली परभु ख्रीस्त ईसु पखी तरअः दया आउर सानती भेटाअः।
झुठा उ-उपदेस कु आला बिरोध रे चेतावन
3जे लकान मकिदुनिया सेनोः बेरा ईङ आम के समझाव थिलमिईङ, इफिसुस रे ताही केते उकिन झन के हुकूम एमा कुमे, ची एटाअ बरन रेनअः सिकछा आलुम एमाकु। 4आउर होना नोकान मारी गाम आउर पुरखाकु आला का-अन्तोः वाला बंसवाईर रे मन आलपे लगाव के, जेकर से कंहड़ी उपड़ीङोअ हुयाआ, आउर परमेसर आला होना जोजना मोताबिक कोवान, जे बिसवास तरअः लगाव दोहोयाय, हिना लकान गी समझाव देमेईंग। 5नोःआँ हुकूम रेनअः उदेस्य पेरेम हेके, जे निमन हिरदाय आउर बेस भितरी मन आउर बेकपट वाला बिसवास तरअः सिरजाआ। 6नोःआँ के बाई केते उकिन होड़ दो फिराव केते, बेकार रेनअः कंहड़ी-उपड़ीङोः रे भटकाव नाकु। 7हुंकू मुसा आला कनहुन सि-सिखावकु वाला दो बनाअः नामाकु, बकिर जेके हुंकू कंहड़ी याकु चाहे जे बात रे हुंकू जादे जोड़ एमेआकु होना के दो हुंकू खुदे काकु समझाआ।
8आबु पाड़ी आबु ची जाहें मुसा आला कनहुन के बेस केन पलाने दो भला एदनाआ। 9नोःआँ होः पाड़ी आबु ची मुसा आला कनहुन धरमी होड़ लःअय कोवान, बकिर कनहुन के का मनाअ वाला, बिरोधी कु, आउर परमेसर के का-मनाअ वाला पापीकु, अपबितर कु, परमेसर रअः बिरोध वाला कु, एंगा आउर आपा के गो-गोएःगकु, होड़ गोएःग कु, 10बेलाज कामीकु, हेरेल-हेरेल कु लोः लाईं-लाईंकु लोः बेलाज कामीकु, मनवा के आ-आखरिङकु, झुठाकु, आउर झुठा किरया जोजोमकु, चाहे नेकान गी एटाअ काम लःअय एदनाआ, जे उतम सिकछा रेनअः बिरोध रे एदनाआ, हुंकू लःअय ठहराव लअः एदनाआ। 11होना उतम सिकछा बेस खभाईर लकाना, नोःआँ बेस खभाईर परम धनया परमेसर आला महिमा दिसतारेआय आउर ईङ के जिमाओ तदिङा कु।
परमेसर आला दया लःअय धन्यवाद
12ईङ आबु आली परभु ईसु ख्रीस्त के धन्यवाद एमाअ दियीङ, जे ईङ के सवांग एम लःअय आउर ईङ के बिसवास जुकूर समझाव केते अपन सेवा रे ठहराव तादिङाय। 13#प्रे.कामी 8:3; 9:4,5ईङ दो पहिल नि-निन्दा वाला, स-सताव वाला, अन्याय करावी ताही नेनिंग। सेरे होः ईङ रे दया हुयाव नेना, एता लःअय ची अनबिसवास रअः चलते एतान दिंग सेके काईङ पाड़ी केना। 14आउर आबु आली परभु आला आगम दयाईङ तेङ रे होना बिसवास आउर पेरेम लोः जे ईसु ख्रीस्त रे एदनाआ हुयाव नेना।
15नोःआँ बात बि-बिसवास लकान एदनाआ आउर जामा बरन रे मनाअ लकान एदनाआ, ची ईसु ख्रीस्त पापीकु के बा-बंचाव लःअय नोःआँ दुनिया रे हीःग नेनाय, आउर होना मेसे जामा तरअः बड़े पापी ईङ हेके। 16ईङ एड़े निआँ लःअय दया हुयाव नेना, ची ईसु ख्रीस्त जामा तरअः पहिल ईङ एड़े अपन जामा तरअः जामा स-सहाव के दिसतार लःअय, आउर हुंकू होड़ लःअय मियांड नामुना देखार लःअय, जे का-अन्तोः जिनगी ना-नाम लःअय हुनी रे बिसवासे कु। 17नहाअः जुग-जुग रिनी राजा, का-अन्तोः वाला, बेगार नेल लिदी मियांड ठुका परमेसर के, जुग-जुग मरजाईद आउर महिमा हुयाव एकान। आमीन!
18ए ईङ आली होपोन तिमुथियुस, होना आगमजानीकु आला आगमजानी रअः मोताबिक, जे आम आला बारे रे कंहड़ी लअः ताही नेना, ईङ आम के नोःआँ हुकूम एमाअ देमेईंग, जेकर से आम होना मोताबिक बढ़ियाँ अतमिक लड़ाई के लड़ाव एकान मे। 19बिसवास आउर होना बेस भितरी मन के थमंभाव तामे, जेके ओ-ओचोअ रअः चलते उकिन झन आला बिसवास रअः डोंगा डुबाव ना। 20हुमिनयुस आउर सिकेन्दर निआँ लकानाकिन। ईङ हुंकिन के सैतान के जिमाओ किदकिनिङ, जेकर से ची नोःआँ तरअः, नोःआँ सिख इदी किन ची परमेसर आला नि-निन्दा कोवान चाही।
Currently Selected:
1 तिमुथी 1: ASR
Highlight
Copy
Compare
Share
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
