1 थिसलुनी 4

परमेसर के खु-खुस वाला जिनगी

1ए बोयहाकु, आपे ईङ तरअः नोःआँ सिखाव नेनापे ची परमेसर के खु-खुस लःअय एता लकान चलाअः चाही, आउर आपे नोःआँ मोताबिक चलाआपे होओ। आखरी रे आले परभु ईसु आला नुमू रे आपे तरअः गोहराअ तनाले ची आपे नोःआँ बारे रे आउर मड़ांग बढ़ाव सेनपे। 2आपे नोःआँ पाड़ी आपे ची जेतना आपे के आचु तदपेआले होना परभु ईसु आला हक तरअः एमा तदपेआले। 3परमेसर आला निआँ मरजी एदनाआ ची आपे पबितर बनाअः पे, आउर बेलाज काम तरअः लंका ताहिन पे। 4अपन होड़ो रेनअः इकछा के काबु#4:4 काबु होड़ो रेनअः काबु के नोकान होः अनुवाद हुयाव सकाआ ची अपन लाईं लोः एता लकान ताहिनोः चाही। रे दो-दोहो नोकान ढंग से सिखाःपे जे पबितारा आउर मनाअः लकान हुयाअः। 5एटाअ जाईतकु लकान, जे परमेसर के काकु पाड़ीआ, होड़ो रेनअः गदुस इकछा आदायोः आलु हुयाअः चाही। 6परमेसर आला मरजी हेके ची जहान बात रे होः अपन बोयहा के हे-हेड़े कोवान चाही, एता लःअय ची नोःआँ जामा बात रअः बदला एमोई परभु हेके, जे लकान ची आले आपे के उदूः चुकाव तनाले आउर चेताव चुकाव नाले होः। 7एता लःअय ची परमेसर आबु के असुध बनाअः लःअय कोवान, बकिर पबितर बनाअः लःअय राअः तदबुआय। 8हिना लःअय जे नोःआँ सिकछा के काय मनाआ, हुनी मनवा के कोवान बकिर परमेसर के काय मनाआ, जे आपे के अपन पबितर आतमा एमेआय।

9आपे के आपे आलकु बोयहा आला दुलार रेनअः बारे रे लि-लिखा रअः दरकार कनोआँ, एता लःअय ची आपे खुदे परमेसर तरअः हुनी-नुई के दु-दुलार सिखाव तानापे। 10आउर सही माने रे आपे अपन जामा बोयहाकु लोः गोटा मकिदुनिया रे नेकान दापे होः। बकिर बोयहा! आले आपे के जादे गी ने-नेकान लःअय समझाव देपेआले।

11आउर जे लकान आले आपे के हुकूम एम तदाले, हिना लकान जामेकु सानती ते जिनगी जिवीडोः आउर अपन-अपन काम रे लगाल ताहिनोःकु आउर अपन-अपन तीः तरअः का-कामी रेनअः कुरनीसे कु। 12नोःआँ तरअः कलीसिया तरअः बाहरी तानकु होड़ आपे आला चलाअ रअः ढंग रेनअः मरजाईद केआकु, आउर आपे के जहान जिनीस रेनअः होः घटकमी एरे हुयाआ।

परभु आला हिजोः

13ए बोयहाकु आले चहाआले ची जे गोएःग#4:13 गोएःग गितीःग तानाकु। उकुअः नाकु हुंकू रअः बारे रे आपे जरूर पड़ीपे जेकर से ची आउरो कु लकान जेकर एतान आसरा होः कनोआँ, सोकेपे। 14आबु दो बिसवासेआबु ची ईसु गोएःग नेनाय आउर जिवीःड-बिरिःड नेनाय। हिना लकान परमेसर हुंकू के होः जे ईसु रे बिसवास-यअते गोएःग नाकु, हिनी लोः आगु किकुआय।

15 # 1 कुरि 15:51,52 आबु के ख्रीस्त तरअः जे सिकछा भेटाव ताना, होना मोताबिक आले आपे तरअः नोःआँ कंहड़ीः दाले आबु जे जिवीडाबु, परभु हिजोः जगुत जिवीःड ताही कोआबु, गोएःग उनकु तरअः मड़ांग इरबु बढ़ाव दड़ीआ। 16एता लःअय ची जब हुकूम एम केआय आउर सिरमादूतकु आली मुखिया जब जोर आवाज रे हुकूम एम केआय, तेकर परमेसर आला तुरही बजाव कोआ दो परभु खुदे सिरमा तरअः आड़गु कोआय। होना बेरा जे ख्रीस्त रे पहिल जीव बाई तदाकु, हुंकू पहिल रे बिरिःड कोआकु। 17होना तयोम आबु जे होना बेरा जगुत जिवीःड ताही कोआबु, हुंकू लोः रिम्बिल रे आलगाव कोआबु आउर तेङ हवा रे परभु लोः भेंट कोआबु। नोःआँ लकान आबु जुग-जुग परभु लोः ताही कोआबु। 18आपे नोःआँ बात रेनअः बखनाव-यअते हुनी-नुई के ढाढ़स एमा कुपे।

Currently Selected:

1 थिसलुनी 4: ASR

Highlight

Copy

Compare