Iroomaani 8
8
Umidhhan Ishuukee Ikatiib
1Aflaay oontꞌa Yasuuꞌaab Umasiihiib ikatiin baliib gwababi sꞌabuuk kiihaay. 2Aashuuk Imugaddasa Yasuuꞌaab Umasiihii yꞌiiniib umidhhan iyaaw hookna iyadna, aree tumaagnaaywa tuyatiiwwa isfidig hookna iyadna. 3Muusaay whag beet toonaati dꞌuuy kaꞌadgiriya. Wꞌaadamiit hayꞌa nꞌakwtuuyt, whag oobhaanaay ishagaamtii dehaay taad kiibari. Laakiin whag dꞌiyaab biikaayeet toona Ukwaasana idꞌi. Oon usabbii, Ukwaasana danuub dꞌiyaab wꞌaadamiit Wꞌoorooh ookna idanuubeet karaama iiktiyi jillaay diigwatiya. 4Whag yharriiweet tuushbu timmiima hoon tikatiyi jillaay, hinin Aashuuk yhariwneet toonaatii nikweer nuun, wꞌaadamiit hayꞌa harriiweet toona kitti.
5Baliin tumaagnaaytiit hayꞌaatii ikweer, iginꞌaayaahna beet tehayꞌa harriiweet toonaatiib daayeen. Laakiin Ishuukeet hayꞌaatii ikweer, iginꞌaayaahna Aashuuk yhariwneet toonaatiib daayeen. 6Idanuubi dehayi ginꞌa tooyat istoobiina, laakiin iginꞌa Aashuuk aabkaab ikatiineeb midhhanwa mꞌasigwa ikatiin. 7Idanuubi ginꞌa Ukwaasana ashoosamiini. Ukwaasanaay whag kiisinaakir, whag yharriiweet toona han kiidꞌi. 8Baliin tumaagnaaytiit hayꞌa abkaat ikatiineeb Ukwaasana kaꞌafirhisiyaan.
9Baraak tumaagnaaytiit hayꞌaatii amꞌabkaab kitteena, laakiin Aashuuk aabkaayeekna aree Ukwaasanaay Aashuuk hookna ikweerna. Umasiihiib Aashuuk hooy biikwariineebka, Umasiihiib iikti kiidi. 10Laakiin Umasiih hookna eefiyeek, tumaagnaayti sabbii igarooyuukna ayaab ikati. Laakiin tushbooti sabbii, ishuukaakna masi dhhaniib ikatiin. 11Ukwaasana Yasuuꞌaab tuyatii yakisiya, oontꞌa Ukwaasanaay Aashuuk hookna ikweerna. Aflaay Umasiihi tuyatii yakisiyaab Ukwaasana, wꞌaadamiit hayꞌaatookna masi ishidhhin indi. Ukwaasana beet toona bareeyookna eefeen Ishuukeesooh saki indi.
12Aflaay isanaayaan, hinin waajibt nibari. Laakiin batuuh tumaagnaaytiit hayꞌa hoon harriiweet toonaatii nikweereet toona kitti. 13Tumaagnaaytiit hayꞌa hookna harriiweet toonaatiit tikweerneek, iiyyi tiyadna. Laakiin Ishuukeet shamaamtii baraak ugarooy wꞌamaag shaga tisingiidneek, ikwaar tiyadna. 14Baliin Ukwaasanaay Shuukee atmalalhaab Ukwaasanaay ar ikatiin. 15Ukwaasana hiiyyaayookna ikatiyeeb Aashuuk kishiyaab kiikwaasna hookna aree kiisirakwna hookna. Laakiin Aashuuk Ukwaasanaay ar ikwasiin hookna, aree Ishuuki akriree Ukwaasana waliiknay, “Baaba, Baaba” niyad. 16Aashuuk aakna hineeb ishuuki geeb, hinin Ukwaasanaay ar nikatiyeet toona ibadehana. 17Oontꞌa hinin areeh nikatiyeek, udehayooh iniiweet tibaraka kinaami niyad. Hinin masi Umasiihi geeb, Ukwaasana bariiyooh dehaay daasaab ikatiyeet toona han kinaami niyad. Umasiihiib igwirha geeb shaaraknayeek, umatuunooh han geeb shaaraknay.
18Oontꞌa nibariyeeb igwirha, umatuun hoon lawi indiinaay geeb nisnadiireek, igwirha naatikina kiikeen. 19Ukwaasana dꞌiyaab ikatiyeena kastaah Ukwaasanaay yꞌar laweeneet toona winneet sꞌayaameen. 20Ukwaasana dꞌiyaab ikatiyeena diinanooyaana, aree bateeh tiknaati hayadaay kiiki. Ukwaasana bak iweer, laakiin masi sꞌayaab iifi. 21Ukwaasana idꞌiyeet taana taakna bꞌeeb gaal ikishiyaamti hooy fidagtiit suusi iyadna, aree umatuuniit hirriyaay Ukwaasanaay yꞌareet tikatiit beeti yꞌi iyadna.
22Ukwaasana idꞌiyeena kastaah ufiraayiit lhanayteet, oon udamaan ookiik lhameeneet toona nikteen. 23Laakiin bateeh oodꞌoohna kiikeena, hinin Ishuuki awwal firaay ibariin han tehooyteesoon gagarnay. Ukwaasana areeh ikwasiyeetoon toona nhagit, aree igarooyaan itfadiigneet toona nhagit. 24Hinin oon isꞌayaay nidhhan. Laakiin isꞌaya ulawiini sꞌayaab kiiki. Suur ibariyeena sꞌayaamiiniib aabu? 25Laakiin hinin masi binbariiyeena sꞌayaamnayeek, asbireetiit nhagit.
26Oontꞌaaneet, hinin ootaad kinbariyayt, Aashuuk Imugaddasa eeshtiimna hoon. Hinin naanaati jillaay siilalnayeeb kinkan. Laakiin Aashuuk Imugaddasa baahadiidamiit hayꞌaatii dehoon siileeleen. 27Ukwaasana iginꞌaayeen teefeet toona ikteen. Aashuuk yhariwneet toona han ikteen. Aashuuk han Ukwaasana yharriiweet toonaatiit, hinin yꞌaamanaayee dehaay siileeleen.
28Ukwaasana baliib ibarooh areeyeen oodehay eeshtiimi jillaay shagaamiiniyeet toona nikteen. Baruuh bareeyooh dehaay ikatiint teena kasteeh daayiinaayt haay yꞌiiniyi jillaay ikwasi. Baruuh beet toona bariiyooh ishagaay dehaay waasamaab oodehayii dehaay danꞌi. 29Ukwaasana udehayooh whankaay iktiin, aree Wꞌoorooh tꞌiiteeb iiktiini jillaay waasiya. Aflaay Wꞌooruuh gwida wari sanaayeebwa kwaateebwa iikti indi aree baruuh wꞌoor usuurkina iikti indi. 30Ukwaasana bareeh suur waasaabuuyt, bareeh han waliikiya. Baliib ibaruuh waliikiyaneeb, bareeh han agbiliya. Baliib ibaruuh agbiliyaneeb, bareeh han isoowin.
31Aflaay kasteeh teen tinaateeb naan nigweebeet toonaatu? Ukwaasana geeboon daayiiniyeek, aaw weer adgiriit kehoon daayi indi? 32Wꞌoorooh ookna han ishaab kiiki, laakiin kasseeyoon jillaay barooh karaamaateeb ifrꞌa. Aflaay hinin han, wꞌooriyooh geeb, kak winneet gwidaana iyaaw hoon kiidi han? 33Baliib Ukwaasana waasaab ikatiyeeb aaw atehimi indi? Baraah gwabab biibariineet toona Ukwaasana uukna sooyiini. 34Aflaay bareeh gariimiib ikwasi aabu? Yasuuꞌaab Umasiih, wꞌayaab, beenaatiika gwidakaana aree beeb tuyatii yakamiyaab, Ukwaasanaay umaygwadiib eefeeb, bariiyooh geeb hinee dehaay ashfꞌiiniib kiiki han? 35Umasiihiib ooreer aaw hooy ishiishamiidh hoon? Igwirha tari uumaag tari wꞌamaag wara, tari tehargwi tari iraboob tari ibidhꞌi tari bꞌadhadh han? 36Tuun batuuh uktaabiib kataabtu:
“Bariiyook jillaay hinin kassooh oombꞌi nimoosꞌi.
Wharuudi arginiit ishbibna hoon.” indi.
37Abadan, kasteeh teen tinaateeb hinin barooh areeyaan baliin bariisooh timmiimaat nasra nibari.
38Ukwaasanaay reerii naat han door ishiishimidh hoon bitdiyeet toona winneet akteen. Yat tari midhhan, malak tari jin, amseeneeb udamaaniib tari gayii yꞌiiniib udamaaniib, tari ikatiin akrir han Ukwaasanaay reerii ishiishimidh hoon kiidiin. 39Tibreeteeb asti eefeen akrirwa, tari tubuutiib nꞌati eefeen akrirwa, tari kastaah Ukwaasana kwaasaab ikatiyeet taanaawwa han, door han adgiriit Ukwaasanaay reerii ishiishimidh hoon kiidiin. Been uureer Yasuuꞌaab Umasiih Wꞌankwanaayoon lawi indi.
Currently Selected:
Iroomaani 8: BEJA
Highlight
Copy
Compare
Share
Want to have your highlights saved across all your devices? Sign up or sign in
2026 Seed Company and the MTT
