Iroomaani 11
11
Israaꞌiili Baagi
1Aflaay ani raatani: Ukwaasana een oodehay irib han? Abadan! Ani uknaayu Israaꞌiiliib akati, Ibraahiimiit dirriyaaytii akati, Binyaamiiniit tugabiilaatii akati. 2Ukwaasana whankaay waasaab ikatiyeeb udehayooh ribaab kiiki. Uuktaab Eelyaay uktaabiib diyaab ikatiyeet toona kanaab kitteena han? Eelya Israaꞌiili dehayi kehii Ukwaasana ashkiimiya: 3“Yaa Wꞌankwanaay, baraah inabiyaayeek idaarna, aree tikaraamaati mhiinan katꞌiyaan. Ani uubhaat oodꞌu amhi, aree baraah anii madar yhariwna.” idi. 4Ukwaasana aree bariiyooh dehaay naan igwibi? Ukwaasana “Asarama alfa da Baꞌalii dehaay kuuramaab baakay aneeb uknaayu dehaay adbi.” idi. 5Aflaay oontꞌa han, Ukwaasana tinꞌimaateesooh waasaab ikatiyi baagi eefi. 6Ukwaasanaayt tinꞌimaatee nuun, baraah shagaamaab ikatiini shagaay kiiki. Ukwaasana oodehay ishagaayiisoohna waasaab iiktiyeek, shaawti tinꞌimaataah sidik nꞌimaat kiiꞌattiyoodaayna.
7Aflaay naanaatu? Israaꞌiili dehay toona baraah yhiriwneet miraab kiikeen. Ukwaasana waasaab ikatiyeeb shalik dehay aabhat imriin. Uudehay aaraw Ukwaasanaayt tuwaliik sinaakraab kiikeen. 8Tuun batuuh uktaabiib kataabtu:
“Ukwaasana bareeh iginꞌaawwa igirmaawwa assiya.
Oon amsi ookiik baraah karhiyaana tari kiimaasiwna.” indi uuktaab.
9Daawid han indi: “Baraah tumꞌariituuhna sharakwa tooliitwa hooy batiikti!
Goofamiit ijasa yꞌastehaleeneeb jasaameen baꞌiiktiin.
10Tiliiliyaataahna thibnamiit shaawti rheen biikaayna,
ingꞌaayaahna diimaab agwalaab baꞌiiktiin.” diyaabi.
Ijintiili Midhhan Imaar Iyadna
11Ani masi raatani: Iyahuudi igafnihoob, dhibiyaaniit kwidhiyaan han? Abadan, bareeh tumaagtiyoohna sabbii, Israaꞌiileeb tugiira yayakisti jillaay, umidhhan Ijintiili imriin. 12Laakiin Iyahuudiit maagnaay tuduniyaatii dehaay miraay ikatiyeek, tehasartaahna aree Ijintiilee dehaay miraay ikatiin. Aflaay Iyahuudi kassaah timmiimeeneek, kak gwidaka miraay iikti indi!
13Ani bareek Ijintiili bhaliisamani. Ani Ijintiilee dehaay linguumaabu aree oon ishagaayiisu habnami andi. 14Ani udehayu ooknaay tugiira yayakseetiit wꞌiimaan yhariw iikwasi andi, aree galib hooy ishidhhin andi. 15Bareeyuuhna uuraab tuduniyaati geeb amꞌaduulaab ikwasiyeek, aflaay baraah agbilameenihoob, aya dehay tuyatii eedhhaniin tꞌiiteena iikti tindi. 16Wꞌajiini tarab awwal firꞌaaytiit karaama mugaddasaat ikatiyeek, aflaay kassuuh wꞌajiin mugaddas ikati. Ugadam mugaddas ikatiyeek, aalꞌid han mugaddasaab ikatiin.
17Saytuuni lꞌid gali katꞌamiyaaneek, malaali saytuuni lꞌid hooy imshawwaayniit eelꞌid irawi geeb hiddaab yakiyaan. Baraak Ijintiili been umalaali saytuuni lꞌiid tꞌiiteebaana, oontꞌa Iyahuudi geeb hiddaab wꞌiimaaniyookna gadam tisꞌakiirna. 18Aflaay baliin eelꞌid haay faalamaana. Bak sakteeneek, toon toona shibibna: Baraak ugadam kitsꞌakirna, laakiin ugadam isꞌakiir hookna. 19Malya baruuk, “Aalꞌid katꞌamaaba, aflaay ani mhiin imaar andi.” tindiya. 20Beet tuuna sidiku. Baraah aamanaab kiikeenayt katꞌamiyaana, aree baruuk wꞌiimaanii hayaayta. Atoorbiib baaꞌakaa, laakiin rikwiya. 21Ukwaasana eelꞌid yꞌasliya han ishaab biikaayeek, barook kak inꞌiish hook?
22Aflaay Ukwaasana kak daayiibwa akraabwa ikatiyeet toona iginꞌookna hooy dꞌiya: Idhibiyaan baliib dehaay ankiir, laakiin beet bariitooh tudaayiinaay tisoorariimeek, baruuh bariiyook dehaay daayiibi. Bak biikaayeek, baruuk han itkitꞌa tindiya. 23Iyahuudi wꞌiimaani naawoohna eeyꞌishneek, baraah oomhiin suur iifiineeb daasami iyadna. Ukwaasana beet toonaati dꞌuuy adgiriini. 24Baraak Ijintiili umalaaliib yakiiniib Isaytuuni hindi ikatꞌamaab, malya suur baakaayna, adaay Saytuuni hindiib imshawawiib tꞌiiteebaana. Iyahuudi oon whindi wꞌadaay tꞌiiteeba. Aree een eelꞌid ikatꞌamaab whindiyoohna ooknaay dehaay wꞌaguur Ukwaasanaay dehaay winneet laamaanaati.
25Isanaayaan, aflaay infiiseekna bittageegsayni jillaay, toon toona tukwabaas tikteeniineet toona aseharriiw hookna. Israaꞌiileeb oodehayi amaagniya diimaab iikti kiidi, laakiin Ijintiili adad timmiima Ukwaasanaay dehaay yꞌeeneeb ookiik oobhaat iikti indi. 26Shaawti kastuuh Israaꞌiil iidhhan iyadna. Tuun aree uktaabiib bak kataabtu:
“Wꞌishidhhiin Sihiyoonee yꞌi indi,
Yaaguubiit dirriyaaytii aree yꞌamag dehay kasseeh giigsi indi.
27Ani bareeyooh geeb oon ugalad iidꞌa andi
tumaagtoohna afooyi andi.” indi uuktaab.
28Baraah Usakana Udaayiib iribnayt, bareek Ijintiili jillaay Iyahuudi Ukwaasanaay ashu ikatiin. Laakiin Ukwaasana bareeh waasaabu aree bareeyooh yhoobaayi geeb galad dꞌiyaabuuyt, bareeh masi areeyiini. 29Ukwaasanaay miyaawwa tibarakaataahwa kiibilalna. 30Baraak Ijintiili suur Ukwaasana sinaakraab kitteena. Laakiin oontꞌa Iyahuudi sinaakraab kiikeenayt, oontꞌa baraak Ukwaasanaayt rhama timriina. 31Oontꞌaaneet, baraak timriineet tirhamaati sabbii, Iyahuudi oontꞌa Ukwaasana sinaakraab kiikeen. Shaawti baraah han oontꞌa Ukwaasanaayt rhama imeer ikatiin. 32Ukwaasana oodehay kasseeh tisnaakrooyti naawi abuuki ikwaas. Shaawti bareeh kasseeh rhamaat iniiw ikati.
Ukwaasana Hamidna
33Ukwaasanaay miraay kak gwidaab ikati! Tifagarandiitaahwa tukanaantuuhwa kak gwidaat ikatiin!
Bariiyooh oomkir aaw adgiriit fassariini?
Bariiyeeh isalala aaw adgiriit afhamiini? 34Uuktaab bak indi:
“Wꞌankwanaay oognꞌa aaw ikteen?
Barooh aaw nasehaat iniiwee dehaay adgiriini?
35Ukwaasana naat hiiyya gaal han kiihaay,
aflaay Ukwaasana bariiyooh dehaay kwansiyeena kitehaay.” indi uuktaab.
36Kasteeh teena baruuh dꞌiyaabu, aree kastaah taana bariiyooh geebii ikatiina, aree kastaah taana bariiyooh dehaay itꞌagiirna.
Umatuun diimaab bariiyooh baꞌiikti! Aamiin.
Currently Selected:
Iroomaani 11: BEJA
Highlight
Copy
Compare
Share
Want to have your highlights saved across all your devices? Sign up or sign in
2026 Seed Company and the MTT
