Iroomaani 10
10
1Isanaayaan, Ukwaasana udehayu Yꞌisraaꞌiili ishidhhiineet toona kassooh uginꞌiisu aharriiw aree beet toonaati jillaay Ukwaasanaay dehaay siileelani. 2Baraah Ukwaasana areeyeeneet toona akteen, laakiin baraah beet toona kak idꞌaneeb kiikanna. 3Baraah Ukwaasanaay eetniit tooshbu kiikanna. Baraah Ukwaasanaay geeb agbilamaab ikatiini jillaay, eeknaayi salali dꞌuuy jarrabiyaan. Ukwaasanaayt tushbooti salalii sakaab kiikeen. 4Umasiih whaggi agiya ikati, aflaay baliin yꞌaamaneen kassaah beentooy shiboot imaar iyadna.
5Muusa tooshbu whaggii tikatiit bak awsifiini: “Uutak teen teena danꞌiib bateesooh ikwaar indi.” indi. 6Laakiin tuushbu wꞌiimaanii tikatiinaatiib uuktaab bak indi: “Uginꞌiisook, ‘Teebri aaw reewi indi?’ baadiya. (Beet tuuna aree Umasiih tibreetee nꞌati tikwsitiib tikati.) 7Tari ‘Aaw nꞌati tehooy tikwi indi?’ baadiya.” indi. (Beet tuuna aree Umasiih tuyatii yakisitiib ikati.) 8Laakiin uuktaab bak indi: “Ukwaasanaayt diigwat tidwil hook. Uyafiyook teefi, aree uginꞌiyook teefi.” indi. Beet wꞌiimaaniit diigwat tookna hinin bhaliinay. 9Tudiigwat bak tindi: Yasuuꞌa Wꞌankwana ikatiyeet toona fidhadhtiit uginꞌiisook aamantiniyeek, aree Ukwaasana barooh tuyatii yakisiyaneet toona aamantiniyeek, iidhhan tindiya. 10Uginꞌiisook aamantiniya, aree agbilamtiniya, aree uyafiisook titfadhiidha aree midhhan marriya. 11Uuktaab bak indi: “Barooh aamaniiniibka door han iiskwꞌa kiidi.” indi. 12Iyahuudiiwwa Ijintiiliiwwa farig kiibariin. Been Wꞌankwana uungaal kasseeh Ankwanaayoohna ikati, aree barooh waliikameen kasseeh winneet baarakiini. 13Uuktaab “Wꞌankwanaay oosmii waliikeen baliin kassaah midhhan imaar iyadna.” indi.
14Aflaay barooh ookna aamanaab baakaay uudehay kak barooh waliikeen? Aree barooh ookna maaswaab biikaayneek kak aamaneen? Aree tak gaal bareeh bhaliisamaab baakaay, baraah kak eemsiiwna? 15Bareeh gaal dehaay diigwatamaab biikaayeek aree kak bhaliiyeena? Uuktaab bak indi: “Baliin usakana udaayiib haay yꞌeen kak iragadaayaahna daawriiba!” indi.
16Laakiin usakana udaayiib agbiliyaan Yꞌisraaꞌiili kasseeh kiikeen. Unabi Isyaas bak indi: “Yaa Wꞌankwanaay, tudiigwattoon aaw aamaniya?” indi. 17Aflaay tudiigwatti maaswii wꞌiimaan yꞌiini, aree Umasiihi bhaliyee tudiigwat titmassiiw. 18Laakiin ani raatani: Baraah maaswaab kiikeen han? Sidiku baraah imaasiwna. Uuktaab bak indi:
“Bareeh whissuuhna toobuut kastooh iktim,
tikalmaataahna tuduniyaati agiya iktimna.” indi.
19Ani masi raatani: Yꞌisraaꞌiili afhamaab kiikeen han? Awwal, Muusa bak indi,
“Baliib oodehay baakay isehisid hookna andi,
tufhama baabariin oodehayii isehis hookna andi.” indi.
20Isyaas gwꞌagwuuyt hadiidiya,
“Aneeb hariwaab baakay uudehay baliin imriinheeb.
Anii raataab baakay oodehay baliib ani uknaayu dehaay lawan.” idi.
21Laakiin Israaꞌiili dehayiib hadiidiyanihoob, baruuh,
“Kassooh oombꞌi oogwimad
oodehay ibaasinaakiir ani wꞌayu dehaay abrir, aree baraah tisnaakirooy iribna.” idi.
Currently Selected:
Iroomaani 10: BEJA
Highlight
Copy
Compare
Share
Want to have your highlights saved across all your devices? Sign up or sign in
2026 Seed Company and the MTT
