Yuuhannaay 4
4
Yasuuꞌaawwa Takat Saamriitwa
1Ifariisi Yasuuꞌa ansiramiya, Yuuhannaayiika gwidaka kwiriya inmiis diyee imaasiwna, 2laakiin ikwiriyaatayaah iimisna nuun, Yasuuꞌa uukna gaal han misaab kiiki. 3Aflaay Yasuuꞌa ibhali yꞌattiyoodiyaab imaasiwihoob, Yahuudaay giigiyaayt Jaliil beeti masi yꞌagar.
4Oontꞌa baruuh Saamiraay geebii hasamiyeet toonaati. 5Aflaay baruuh Saamiraay tiifiit madiina Sookhaar iidneet iktim. Batuuh Yaaguub wꞌoorooh Yuusif hiiyyaab iiktiyeeb whaashii sagiit kitti. 6Been whaashiib Yaaguubiit tuuri tiifi. Yasuuꞌa tꞌiibaabtii dayyariya aree tooreeti kwayaay nꞌati isꞌa. Been uudoor nabhoob iikti.
7Takat Saamiraayiit yami harawaay toori tikwtaay eeta. Yasuuꞌa batiiyooh dehaay, “Yam gwꞌasiiheeb.” idi. 8Ikwiriyaatayaah mꞌariit dilibti iyiyni jillaay tumadiina bayaa iifiin.
9Tutakat Tusaamiri bariiyooh dehaay, “Baruuk Yahuudiibwa, ani aree Saamriitu, kak yami gwꞌasti raattiniyaheeb?” tidi. Iyahuudi Isaamri kiiꞌamdawaalna.
10Yasuuꞌa batiiyooh dehaay, “Ukwaasanaay oomyaaw tiktiineek aree batook eeyam raatiiniib aab ikatiyeet toona tiktiineek, barooh raattii aree baruuh ishidhhiin yam iyiw hooki.” idi.
11Tutakat “Duuruun, baruuk dirkwaat kitbariya aree tuuri aree hoogaati. Een eeyam yꞌishidhhiin naad manriya? 12Baruuk baaboon Yaaguubiika winkaabwa han? Baruuh toori yhii hoon, aree baruuh uukna batiisooh gwꞌiya. Yꞌaraahwa ureewuuhwa han bak idꞌiin.” tidi.
13Yasuuꞌa batiiyooh dehaay, “Een eeyam gwꞌiiniibka masi ityiw indi, 14laakiin ani aniiweeb eeyam gwꞌiiniibka shaawti door han ityiw kiidi. Aayam ani aniiweeb bariiyooh tehooyteeb thaw iikti iyadna, aree barooh umidhhan udaayim iyawna.” idi.
15Tutakat bariiyooh dehaay, “Duuruun, een eeyam hiiyyaheeb, aflaay door han ityiw kaadi. Tooy han yami harawaay yꞌi kaadi.” tidi.
16Yasuuꞌa batiiyooh dehaay, “Difii, utakook waliikiit agari mꞌayii” idi.
17Tutakat “Ani tak kaabari” tidi.
Yasuuꞌa batiiyooh dehaay, “Tak kaabari tindiyihoob sidkiituwii. 18Batuuk suur ay doora tidꞌarii, uutak tꞌa tibariyeeb aree sidik takook kiiki. Sidik hadiidtaayii.” idi.
19Tutakat “Duuruun, baruuk nabiib tikatiyeet toona rhani. 20Hoobaan oon oorbaay kehii Ukwaasana yꞌabidna. Laakiin baraak Iyahuudi Ukwaasana been oomhiin ibakii nꞌabdeeb Alguduseeb eefi tiyadna.” tidi.
21Yasuuꞌa batiiyooh dehaay, “Yaa takatay, aamaniiheeb, damaan yꞌiini, uudehay oon oorbaay kehii ikatiyeek tari Alguduseeb Ubaaba yꞌibid kiidiin. 22Baraak Isaamri sidik aab tꞌabidneeb kitkanna. Laakiin hinin Iyahuudi aab nꞌabdeeb nikteen. Umidhhan aree Iyahuudee yꞌiini. 23Laakiin damaan yꞌiini aree suur akay tooy eefi. Uudehay ishuukeewwa usidkiiwwa Ubaaba yꞌibid iyadna. Aan baraah baruuh harriiweeb yꞌaabdi ikatiin. 24Ukwaasana Shuuk ikati, aree bariiyaah yꞌaabdi ibakii ishuukeewwa usidkiiwwa barooh yꞌabidna.” idi.
25Tutakat bariiyooh dehaay, “Umasiih yꞌiiniyeet toona akteen. Baruuh yꞌiiniyihoob naatka sooyi hoon indi.” tidi.
26Malya Yasuuꞌa igwibi, “Uun batook infariid, ani barooh akati.” idi.
27Been oodoor Yasuuꞌiib ikwiriyaatay yꞌagarna, aree barooh tootakat bhaliisamee rhiyaanihoob isgaribna. Laakiin gaal han raataab kiiki, “Naan harriiwa?” diyaab kiiki. Tari “Batooh naanhooy bhaliisamtiniya?” diyaab kiiki.
28Malya tutakat iyami sarooh tꞌishaayt tumadiina tꞌagar. Beentooy oodehayii dehaay, 29“Mꞌaana shibibna, tak kastooh toona ani weeraat iiktiyeet sooyiheeb. Uun baruuh Umasiih ikati?” tidi. 30Aflaay uudehay tumadiina yꞌishniit Yasuuꞌaab beeti ibeen.
31Been oodoor ikwiriyaatay barooh inꞌalna, “Seedna, mꞌariit naat tamaa!” idiin.
32Laakiin baruuh bareeyooh dehaay, “Baraakna naat han hooy bitkaanneet mꞌari abari.” idi.
33Malya ikwiriyaatay taktak raatiyaana, “Gaal mꞌariit dehaay haay yꞌaab ikati han?” idiin.
34Yasuuꞌa bareeyooh dehaay, “Timꞌariitu, beeb aneeb diigwatiyaab harriiweet toonaati saktiiwwa, ushagaayooh faayistiiwwa tikati. 35Baraak bhaliib tiyadna, ‘Fadhig tirga warib malya uuwaak ikati!’ tiyadna. Laakiin andi hookna: igwꞌadeekna nigilnaat tidirꞌa daayiib shibibna! Wharru oontꞌa uwaakii dehaay bashikwu. 36Uutak uwookana ukiraayooh itkwis indi, aree umidhhan udaayimii dehaay wharru iidbil indi. Aflaay wꞌaadanaawwa uwookanaawwa hiddaab afirhi iyadna. 37Aflaay ‘Gaal yꞌandi, weer inwiik.’ iyad ibhali sidik ikatiin. 38Bareek dehaay shagaamaab bitkaayneet dirꞌaati waakii dehaay afdig hookna. Wari ushaga wꞌakraab shagaamiyaana, aree baraak bareeyooh ushagaay rayiimtaana.” idi.
39Tutakat “Ani weeraat iiktiyeet toona kastooh sooyiheeb.” tidi akay, beet tumadiinaatii gwida Saamiri Yasuuꞌii aamaniyaan. 40Aflaay Isaamiri bariiyooh dehaay eeyaanihoob, barooh geeboohna soosꞌooyt hooy yhariwna. Yasuuꞌa han maloot yina beentooy isꞌa. 41Aree bariiyeeh ibhaliyi sabbii masi gwida dehay aamaniyaan.
42Baraah tootakatii dehaay eeyaaniit, “Hinin oontꞌa aamanna, batuuk tidii akay kiiki, laakiin oontꞌa hinin iknaayaan nimaasiw, aree uun uutak sidik tuduniya Ishidhhiin ikatiyeet toona nikteen.” idiin.
Yasuuꞌa Udaabti Oor Mheeliya
43Yasuuꞌa maloot yina beentooy yhagit harꞌii, yꞌish Jaliil ibi. 44Baruuh uukna, “Nabi whaashooh ooknaay kahamooysamiya.” idi. 45Baruuh Jaliil iktimihoob, Jaliileeb uudehay barooh yꞌashishna. Baraah wꞌiidii dehaay Algudus beeti giigaa iifiinayt, baruuh Whasamti Wꞌiidiib beentooy idꞌiyeet toona kastooh rhaa iifiin.
46Malya Yasuuꞌa Jaliiliib tiifiit Gaanaab beeti yꞌagar. Been oomhiin baruuh eeyam haab hooy ikwaaseebu. Aree beentooy Kafarnaahuumeeb wꞌooruuh lhaab iiktiyi hikwuumaati daabit iifi. 47Uutak Yasuuꞌa Yahuudaay Jaliil beeti yꞌaabu miyaad imaasiwihoob, barooh ibaayt Kafarnaahuum geeb giigiit wꞌooriyooh mheelti hooy yhariw. Wꞌooruuh tooyat diwlaa iifi.
48Yasuuꞌa bariiyooh dehaay, “Mꞌuujisaatwa ajaayibwa rhi bitdiineek gaal han hookna aamani kiidi.” idi.
49Uutak Yasuuꞌii dehaay, “Seedna, wꞌooru baayaay geebu yakaa.” idi.
50Yasuuꞌa “Difaa, wꞌooruuk ikwaar indi!” idi.
Uutak Yasuuꞌiib ibhali aamaniyaayt giigiya. 51Baruuh usalaliib ugawooh bayee, ikishiyaayaah yꞌashishniit wꞌoor dhhaniib iiktiyeet toona usakana sooyaan. 52Baruuh ikishiyaayee dehaay, “Wꞌoor naadoor shabhamiya?” idi. Baraah “Iru nabhoob iiktiyihoob yꞌabaaki hooy imhiin.” idiin.
53Malya wꞌoori baaba been Yasuuꞌa bariiyooh dehaay, “Wꞌooruuk ikwaar indi.” diyaab iiktiyeet toosꞌa tookna tiiktiyeet toona ikan. Aflaay baruuhwa indhiwaayaahwa aamaniyaan.
54Yasuuꞌa Yahuudaay Jaliil beeti yꞌagareekka, tuun timꞌuujisa tꞌikwaaseet tumalya tiikti.
Currently Selected:
Yuuhannaay 4: BEJA
Highlight
Copy
Compare
Share
Want to have your highlights saved across all your devices? Sign up or sign in
2026 Seed Company and the MTT
