Ilinguumamti 25
25
Baawloos Feestoosi suurii haakamamiya
1Mhay bꞌi Feestoos haakim ikayi harꞌii, Gaysariyaay Algudus ibi. 2Beentooy ifagiiriya isuurkinaawwa, Iyahuudi suurkinaawwa bariiyooh suurii ingadniit Baawloosi kehii iibriineet tehalaagaay hadiidiyaan. Masi Feestoos raatiyaan. 3Baawloos Alguduseeb haay yꞌiiniyeet toona barooh inꞌalna. Baraah beet toona bariiyooh haay yhiriwneeb usabab, usalaliib kamiin dꞌiit Baawloosi madar yhiriwna. 4Laakiin Feestoos bareeyooh dehaay, “Baawloos Gaysariyaay daayi indi, ani han willa beentooy iidif andi. 5Baruuh maagt gwibbaab ikatiyeek, isuurkinaayaakna geebu bagiigiin, aree beentooy barooh bagaadiisamiin.” idi.
6Feestoos Gaysariyaab agaar baakaay, Alguduseeb asimhayt tari tamint yina isꞌa. Malya oombꞌi ooraaw ugaadi mhiin isꞌa, Baawloos tumhakamaatiib eesiisiya. 7Baawloos tumhakamaatiib eeyanihoob, Iyahuudi suurkina Algudusee yꞌaab bariiyooh kwayaay isꞌana. Baawloos akra gwabab gwidaab gwibbaab iiktiyeet toona sooyaan. Laakiin beet toona akkadeen badehi kiibariin.
8Malya Baawloos ugarooyooh habuuyiib bhaliiya, “Ani Iyahuudi haggi kehii tari oodiini gawi kehii tari Gaysari kehii maagnaayt dꞌiyaab kaaki.” idi.
9Feestoos Iyahuudi giraadtiib yhariw, aree Baawloosii dehaay, “Teen tehalaagayteeb ani haakamaniyook jillaay Algudusi mabay harriiwa?” idi.
10Baawloos “Ani oontꞌa Gaysariit tumhakamaatiib haakamamani, aree tooy ibakii hooy haakamamaniyeet toonaati. Ani Yahuudi haashi kehii maagnaayt dꞌiyaab baakaayeet toona baruuk tikteena. 11Ani tooyat astehaleen gwabab dꞌiyaab akatiyeek, tuyati jasa hooy dhaabi kaadi. Laakiin aan baraah aneeb haay atehimeeneet taana sidik biikaayneek, aneeb een oodehay haay sallamiiniyeet hadꞌaayi ibariib kiihaay. Ani shaawti Gaysar abiiyaah haakamiiniyeetu toona hooy aharriiw.” idi.
12Malya Feestoos een ibhali umajlisiyeeh da immakaar, malya Baawloosii dehaay, “Baruuk Gaysar uukna haakamtiyook tehariwa, aflaay Gaysar iibi tindiya!” idi.
Baawloos Whadꞌa Agriibaab immakaar
13Shalikt yinaati harꞌii, whadꞌa Agriibaawwa Barniikiiwwa Feestoos rheesamti jillaay Gaysariyaab eeyaan. 14Baraah beentooy gwidaat yina yhagitna. Beenhoob Feestoos Baawloosiit tehalaagaay whadꞌa haay infaraad. Baruuh “Fiiliikis tooy usijniib tak ishaabu, 15ani Algudus beeti giiganihoob, ifagiiriya isuurkinaawwa Iyahuudi suurkinaawwa bariisooh ashkiimiyaanheeb. Baruuh haakamamiiniyeet toona raatiyaanheeb.
16Ani ‘Tak uudehay hooy ashkiimeeneeb, igariimiyeeh suurii sꞌaab baakaay, inuunti Roomaaneet aada kiikeen. Baruuh ibakii beet tehalaagaaytiib gwanbi aree ugarooyooh yhanbi.’ adi. 17Malya baraah tooy geebu eeyaanihoob, tugadiyaay shaawti sidleelaab kaaki. Tooyin tooraaw ugaadi mhiin asꞌa, aree barooh waliiksan. 18Laakiin aanda barooh atehimiin bhaliiti harawaay ingadnihoob, ani hiisiyeet tumaagtii naat hooy miraab kiikeen. 19Bareeh udiinoohna ooknaay amgwasuuraab eebtik daaya. Baraah tak ayaab Yasuuꞌa iidneeb, Baawloos na dhhaniibu iideenaay imgwassaarna. 20Ani een bareeh kasseeyooh oosdik kak imiireeb kanaab kaaki. Malya Baawloos Algudus bayiit beentooy haakamamiiniyeet toona raatan. 21Laakiin Baawloos Gaysar yꞌeetiit tugadiyeetooh shanbiibeeb ookiik oosjin isehaayis. Aflaay barooh Gaysar astoobiyeeb ookiik tooy daayiiniyeet toona sooyan.” idi.
22Malya Agriiba Feestoosii dehaay, “Uun uutak indiyeet toona ani han asnaakiireet aharriiw.” idi.
Feestoos “Lhayt iimsaw tindiya.” idi.
23Tooyin tooraaw Agriibaawwa Barniikiiwwa tisinaakrooyti gaw shuumiyaanihoob, uudehay bareeh winneet daayiib yꞌashishna. Wawin dheeshi daabtaabwa tumadiinaati suurkinaawwa han beentooy iifiin. Feestoos aree Baawloos haay yꞌeeneet toona sooya. 24Malya Feestoos, “Whadꞌa Agriibaawwa yꞌiibaabkina aarawwa, oon ootak shibibna! Kassaah Iyahuudi Alguduseewwa Gaysariyaaywa eeyaaniheeb, aree bariiyooh madar hoosu yhariwna. 25Oon ootak tooyat astehaleen gwabab hooy miraab kaaki. Laakiin baruuh Gaysar haakamiyeet toona yhariw akay Roomaab astoobyeena amkir. 26Laakiin Gaysarii dehaay oon ootakiib naat sidik akantiibeet toonaati. Oon usabbii, barooh suurookna haay eesiisan, aree barook Whadꞌa Agriiba barooh suurook asingad. Bariitooh tugadiyaaytiib bhaliinaayt harꞌii, naat gaat akantiibeet toonaati. 27Tak abuukiib igwababeeh sooyaab baakaay, Gaysarii dehaay uufduug daayiina kitti.” idi.
Currently Selected:
Ilinguumamti 25: BEJA
Highlight
Copy
Compare
Share
Want to have your highlights saved across all your devices? Sign up or sign in
2026 Seed Company and the MTT
