Ilinguumamti 24
24
Fiiliikisi suurii whaakamti
1Ayt yinaati harꞌii Hanaaniya ufagiiri uuwin, eegrimaab gwadibwa gaadiib Tartulluus iidneebwa iyhaayt Gaysariyaab ibi. Baawloos gwabab sꞌabuuki jillaay whaakim ibeen. 2Aflaay Baawloos waliikamiyanihoob, Tartulluus igwabab hadiidiya, “Fiiliikis whamooysama, udehayoon gwida dooreeka tisꞌasiga, bariituuk tꞌamshabbooy aree whaashoon tishiishboob. 3Hinin ikati mhiiniika kastooh toona baruuk tidꞌiyeet winneet hooy afirhaaba. 4Laakiin ani barook gallabtiib kaahariw, dabaloot midda sabar dꞌiyaat sinaakira hoon.
5Kasseeh Iyahuudi tuduniyaatiib eefeen, uun uutak aashoosamaabu, gwirhaab kehii akaabi. Baruuh han masi Inaasiraayi iyadneet majmuuꞌaati suurkina ikati. 6Masi baruuh oodiini gaw han najjastiib jarrabiya. Aflaay hinin barooh nꞌabik. 7Hinin abiiyeen nibariyeeb whaggii haakamtiib nhariw. Laakiin Liisiyaas udheeshi hadꞌa eeyaayt barooh akruurii hoon haay giigiya. Malya Liisiyaas oon ootak bariiyook suurii atehimnayeet toona sooya hoon. 8Baruuk abiiyaak barooh raattiniyeek, hinin atehimnayeet tuuna sidik ikatiyeet toona han iikan tindiya.” idi.
9Malya Iyahuudi yakiyaaniit, Tartulluus iideeb ibhali ayyadiyaan.
10Oontꞌa whaakim Baawloos bhaliiyi jillaay tuuliya. Baawloos igwibi, “Baruuk whaashiyoon dehayi kehii gwida hawla gaadiib tikatiyeet toona akteen. Aflaay ani toon tumhakamaatiyook suurii ugarooyu hanbiyeet toona winneet hooy afirhaabi. 11Ani tamna maloot yinaati suurii ibaadaatee dehaay Algudus abayeet toona baruuk willa iikan tindiya. 12Iyahuudi aneeb atehimeen oodiini gawiib gaal amgwasaaree miraayi kiikeen. Oodiini gawiib ikatiyeek tari tumadiina tooknaatiib han ribshaayt sidꞌaab kaaki. 13Aan baraah aneeb haay isꞌabiikneeb igwabab sidik ikatiineet toona akiidaat kiibariin. 14Laakiin sidiku ani Ukwaasanaay usalalii sakani, aree hoobeeyoon Ukwaasana anbiid. Toon toona baraah shawaaytu iyadna. Ani Muusaay whaggiib kataabt toona kastooh inabiya diyaab ikatiineet aamanani. 15Ani aan aanda sꞌayaameeneet toona Ukwaasanaay sꞌayaamani. Uudehay aashiboobwa yꞌamagwa kassaah tuyatii yaki iyadneet toona aamanani. 16Aflaay ani Ukwaasanaawwa kasseeh oodehayi suuriiwwa uginꞌu asinhiiseet toona aharriiw.
17Gwida hawlaayi mitlali harꞌii, whaashiyoon oodehay yhamraab miyaawwa karaamaatwa iyiwi jillaay tooy agar. 18Udiini gawiib wꞌiidiib toon toona dꞌiyee imriinheeb. Beenhoob gwida dehay geebu kiihaayna, ribshaayt han kwaasaab kaaki. 19Laakiin Yahuudi gali Aasiyaay yꞌaab beentooy iifiin. Baraah anii kehii halaagaayt iibriineek tooy suurook daayiina. 20Tari oodehay tooy eefeen raataana. Ani umajlisiyoohna suurii angadihoob, gwabab akaana hoosu miraab biikaayneet toona sooyeen hookna. 21Gwabab ani kehii miraab ikatiineek, ani tumhakamaati suurii waliikan, ‘Ani uudehay yꞌaya tooyat hooy yakeeneet toona aamanani akay, amsi haakamamani!’ adi.” idi.
22Malya Fiiliikis Ukwaasanaay usalal daayiib iktiin, tumhakama isingad, “Liisiyaas udheeshi daabit yꞌiiniyihoob, tehalaagaay ihikim andi.” idi. 23Malya udheeshi suurkina Baawloos ingwꞌiideet toona sooya. Laakiin biihakwiirneet toonaawwa, yꞌaraweetooh shamaamt biihabiineet toonaawwa sooya.
24Shalikt yinaati harꞌii, Fiiliikiswa tutakatuuh Duruusiila tuyahuudiiwwa eeyaana. Baawloos hooy itgwꞌiideeb oomhiin ibeen. Baawloos waliikisiyaaniit Yasuuꞌaab Umasiihiib iibriyeeb wꞌiimaani bhali isnaakirna. 25Laakiin Baawloos, tushibootiiwwa, ugarooy kaleewtiibwa, whukwim gayii yꞌiiniibwa sooyaneeb oodoor Fiiliikis irkwi. Shaawti baruuh Baawloosii dehaay, “Oontꞌa aan mhaaba, aflaay giigaa. Shawaay kaaki, laakiin ashtawiyeek dehook diigwati andi.” idi. 26Beet toonaati harꞌii, Fiiliikis Baawloos waliiksiitka diima bhaliisami. Baruuh Baawloos balsaat iyiweet toona hooy sꞌayaami.
27Malu hawla hasaamiyaani harꞌii, Boorsiyoos Feestoos, Fiiliikisi mhiin haakim iki. Fiiliikis Iyahuudi suurkina afirhistiib yhiriw akay Baawloos masi usijniib yꞌish idꞌi.
Currently Selected:
Ilinguumamti 24: BEJA
Highlight
Copy
Compare
Share
Want to have your highlights saved across all your devices? Sign up or sign in
2026 Seed Company and the MTT
