Esita 9
9
Yuda bete be di bɔɔ bɛkyʋnlɛ boo koro
1Ebon fwo-nyɔɔfɛ gɛtɛ bee kpèlè Ada fɔ, wo duwi fwo disiyeefɛ daanɩ gɛ ose gɛtɛ egyu-dɩrɛ ɛ sɩ̀ fɔ waà sere gʋtʋn gɩɩ gɛmɛ. Duwi dɩtɔkɔ gɛ Yuda bete bɔɔ bɛkyʋnlɛ bɔɔ bʋnʋn bʋ̀ gyaga gɛtɛ baà di Yuda bete boo koro. Mɔ fɔ, ade i fi, gɛ Yuda bete be dì bɔɔ bɛkyʋnlɛ fɔ boo koro. 2Yuda bete gɛtɛ bɛ̀ sa ntʋnkwaa gɛtɛ bʋ̀ sa Egyu-dɩrɛ Herihesi gatɩn fɔ powu be tuma baatele yaanɩ, gɛ bɛ pɩna koro gɛtɛ bàà tà bɩtà ma bɛkyʋnlɛ gɛtɛ bɛ mɛ onyun alɛ baà wolo ɛbɛ Yuda bete fɔ. Okoro ɛkɩ ɛn talɩ e yela Yuda bete bɔɔ bʋnʋn, yema bɛkyʋnlɛ fɔ powu bè serenti kààrà. 3Gɛ gebù gɩɩ bɛnɩ, ma gɩfɩɩ gɩɩ bɛnyalɛ, ma ɛbɛ gɛtɛ bè yela egyu gɩsɩrɩ, gɛ bɛɛ nya ntʋnkwaa fɔ powu buu koro fɔ, be yela Yuda bete bɔɔ gama, yema bè serenti Modekayi. 4Modekayi è di gɛ egyu-dɩrɛ wɔndɩrɛbi gbaa. Gɛ e di diyere gɩfɩɩ fɔ powu gaanɩ, gɛ ɛ̀ bɔ ee wura ɔkɛma ɛ fɩya.
5Okoro Yuda bete fɔ be wolo bɔɔ bɛkyʋnlɛ fɔ gɛ be muru bɛ powu, gɛ bɛ mɛ bɛ anlɛ gɛtɛ bè len. 6Susa ditele-dɩrɛ diiko daanɩ fɔ Yuda bete be wolo bɛkyʋnlɛ nkpɩn bʋnyɔɔ ma akpilin ton (500) be muru. 7Gɛlɛ ke be wolo Parisanidata, ma Dalifon, ma Asipata 8ma Porata, ma Adaliya, ma Aridata, 9ma Parimasita, ma Arisayi, ma Aridayi, ma Fayisata, 10gɛtɛ ɛbɛ n di Amedata wobi Haman, gɛtɛ ɛ kyʋn Yuda bete fɔ, wo bebi-tenibi fwo fɔ. Mɔ Yuda bete fɔ ben kpila baanyan da anlɛ gɛtɛ bee kpila bɩtà baanyan fɔ.
11Duwi dɩtɔkɔ ke gɛ bɛ ma dɔ̀ egyu-dɩrɛ bɛnɩ gɛtɛ be wolo Susa ditele daanɩ fɔ baasɔ. 12Gɛ egyu-dɩrɛ ɛ dɔ̀ egyu-nanɩ-dɩrɛ Esita alan, <<Gengyi Yuda bete be wolo bɛkyʋnlɛ nkpɩn bʋnyɔɔ ma akpilin ton (500) fɩya ma Haman bebi-tenibi fwo Susa ditele diiko daanɩ fɔ, ɛwʋ bɩrɛ ntʋnkwaa-kurumakyɛɛ fɔ baanɩ bɩrɛ, aan kya! Anʋn gɛ aa fɔ mɩ? Baà mɛ bɛ tɛ wɔ! Anʋn gɛ aa len a ye maakʋn? Waà kya wɔ̀ gʋlɔ!>>
13Gɛ Esita ɛ dɔ̀ alan, <<Egyu-kpara, gengyi gɛ waà pe fɔ, tɛ Yuda bete gɛtɛ bɛ̀ sa Susa ditele fɔ osele, fɔ gɩsa bàà ni biri be di dɩbʋn gɛtɛ ǹdò be di lɛ. Fɔ àà yɛ bàà sa Haman bebi-tenibi fwo fɔ boo gikpena ɔŋʋʋ gigyen kyɔlɔga ma oyon.>>
14Okoro egyu-dɩrɛ ɛ tɛ osele gɛtɛ bàà mɛ gɛlɛ. Ɛwʋ gɛ bɛ sɩ̀ ose ade nyayɩ yii koro Susa ditele. Gɛ bɛ sa Haman bebi-tenibi fwo fɔ boo gikpena ɔŋʋʋ gigyen bɛ kyɔlɔga ma oyon fɔ. 15Yuda bete be ni biri be tuma ebon gɛtɛ bee kpèlè Ada fɔ wo duwi fwo-naafɛ daanɩ. Gɛ be ni wolo bɛkyʋnlɛ gɛkpɩn ma akpilin ton (300) Susa ditele daanɩ. Mɔ ben kpila baanyan anlɛ gɛtɛ bee kpila bɩtà baanɩ fɔ.
16Yuda bete gɛtɛ bɛ̀ sa egyu-dɩrɛ ntʋnkwaa-kurumakyɛɛ baanɩ fɔ mɔ, be tuma, gɛ bɛ kpà be to koro be ye bɔɔ bɛkyʋnlɛ fɔ bɔɔ gatɩn. Yuda bete bɔɔ bɛkyʋnlɛ gɛtɛ be wolo fɔ baà mɛ anlɛ bɛnɩ asepekyi asiyee ma ɩgbaa kwarankɩ ma nkpɩn ton (75,000). Mɔ bɛn kpila baanyan anlɛ gɛtɛ bee kpila bɩtà baanɩ fɔ. 17Ade nyayɩ i sere gɛ Ada wobon fɔ duwi-fwo-siyeefɛ fɔ daanɩ. Duwi-fwo dɩnaafɛ fɔ daanɩ fɔ, Yuda bete be tuna, gɛ bɛ mɛ dɩ duwi-dɩrɛ ma ɔsɛ wuu duwi.
Be di Puri wɔsɛ
18Mɔ Yuda bete gɛtɛ bɛ̀ sa Susa ditele daanɩ fɔ, be tuma ebon ɛtɔkɔ duwi-fwo-siyeefɛ fɔ ma duwi fwo-naafɛ fɔ yaanɩ. Be tuna duwi fwo-tonfɛ fɔ daanɩ, gɛ bɛ mɛ dɩ duwi-dɩrɛ ma ɔsɛ wuu duwi.
19Nyawʋ wuu koro gɛ Yuda bete gɛtɛ bɛ̀ sa atelebi yaanɩ fɔ, bɛ mɛ Ada duwi fwo-naafɛ fɔ ɔsɛ wuu duwi ma duwi-dɩrɛ, ma duwi gɛtɛ bɛɛ tɛ bɛwɔlɔn anyan fɔ.
20Modekayi ɛ yɛ bɛ ŋwara ade nyayɩ powu bɛ sa akpa yaanɩ, gɛ ɛ ka yɩ ɛ tɩyɛma Yuda bete powu gɛtɛ bɛ̀ sa ntʋnkwaa gɛtɛ bɩ̀ sa Egyu-dɩrɛ Herihesi bugyu bɔɔ gatɩn fɔ. 21Ɛ ŋwara alɛ wù di gɛtɛ ɛkamasɛ èè di Ada wobon duwi fwo-naafɛ ma fwo-tonfɛ fɔ gɛtɛ ì di awi-dɩrɛ fɔ yii koro gɩkyan n di gɩkyan. 22Yema awi ɩtɔkɔ gɛ Yuda bete be to koro be ye bɔɔ bɛkyʋnlɛ baalɔ yaanɩ. Nkele mɔ ebon ɛtɔkɔ wanɩ gɛ bɔɔ dɩkpʋkpʋ di biligi ɔsɛ wʋ tɛ bɛ, gɛ boo gewula gi biligi ɔsɛ wuu gedi. Wù di gɛtɛ awi ɩtɔkɔ yàà mɛ awi-dɩrɛ ma ɔsɛ waawi, ma gɛtɛ̀ bɛwɔlɔn anyandilɛ, ma gɛkyɛ beyenpu anyan waawi.
23Okoro Yuda bete bɛ tɛrɛma Modekayi wade-wùlàlɛ fɔ, bɛ ka ɔsɛ wuu gedi fɔ bɛ mɛ ɔkɔnʋn. 24Yema alɛ nafɔ Agagi-te Amedata wobi Haman gɛtɛ è di Yuda bete bɔɔkyʋnlɛ fɔ e len gɛtɛ èè muru Yuda bete powu. Gɛ ɛ da ma Puri wataa yɩɩ gɛsɩ̀ yii koro e tiri duwi gɛtɛ eè muru bɛ. 25Waanɩ fɔ, gɛtɛ egyu-dɩrɛ ɛ nʋn ade nyayɩ fɔ, ɛ yɛ bɛ ŋwara gɩkpa alɛ Haman dɩmɩnlɛ-kpen gɛtɛ ɛ ka Yuda bete boo koro fɔ di biri ɛwɔ gbagba wo koro. Gɛ egyu-dɩrɛ ɛ yɛ bɛ sa ɛwɔ Haman ma wo bebi-tenibi gigyen ɔŋʋʋ bɛ kyɔlɔga ma oyon gɛtɛ ɛwɔ Haman e sere fɔ. 26Gɛlɛ wuu koro gɛ bee kpèlè awi nyayɩ alɛ, Purim fɔ. Purim nyawʋ wu ye gɛ digyebi Puri daanɩ. Yema ade gɛtɛ Modekayi ɛ ŋwara, ma Yuda bete baade gɛtɛ be we, ma ade gɛtɛ i sere boo koro fɔ yii koro. 27Yuda bete bɛ ka ade nyayɩ bɛ mɛ ɔkɔnʋn bɛ tɛ ɛbɛ ma boodu waanɩ wʋʋ bɛnɩ, ma bɛnɩ gɛtɛ bee len bàà mɛ koro Yuda bete fɔ powu. Be to awi anyɔɔ nyayɩ bɛ sa gɛtɛ ì di awi-dɩrɛ anlɛ gɛtɛ bɛ ŋwara bɛ sɩ̀ alɛ bɛ tɩ mɛ ɔya fɔ waanɩ kyɛkyɛɛkyɛ gɩkyan-kamasɛ fɔ. 28Wù di gɛtɛ Yuda bete boodu waanɩ powu, ma baakpaara powu, ma baatele-dɩrɛ ma ntʋnkwaa powu bàà kʋna be di awi nyayɩ yii koro. Gɛ wun di gɛtɛ bàà kere Purim wawi yii gedi bɛ ya kpakpaakpa, gɛ wun di gɛtɛ bàà finla yɩ.
29Okoro Abiyali wobi egyu-dɩrɛ-nanɩ Esita ɛ fɩya ma Yuda-te Modekayi, gɛ bɛ ŋwara gɩkpa-nyɔɔfɛ. Bɛ ka bootimi powu bɛ ŋwara gɛtɛ ɛkamasɛ èè to Purim sa. 30Gɛ Modekayi ɛ ka akpa fɔ ɛ tɩyɛma Yuda bete powu gɛtɛ bɛ̀ sa ntʋnkwaa akpilin kooron ma kwarankɩ (127) gɛtɛ bɩ̀ sa Egyu-dɩrɛ Herihesi gatɩn fɔ baanɩ. E lila olila ma nʋnkwarɩ ɛ tɛ bɛ. 31Gɛ bɛ sa bɛ aniya gɛtɛ bàà di Purim wawi fɔ yii koro kyɛkyɛɛkyɛ ma anlɛ gɛtɛ Yuda-te Modekayi, ma egyu-dɩrɛ-nanɩ Esita bɛ ŋwara alɛ ɛbɛ, ma boodu waanɩ wʋʋ bɛnɩ bàà di yii koro fɔ. Fɔ bàà ban onyun, fɔ bàà sara dɩkpʋkpʋ daanɩ. 32Bɛ ŋwara Egyu-nanɩ-dɩrɛ Esita wose gɛtɛ ɛ sɩ̀ ka da ma Puri wawi yii gedi yii koro fɔ bɛ sa gɩkpa gaanɩ.
Currently Selected:
Esita 9: ADE
Highlight
Copy
Compare
Share
Want to have your highlights saved across all your devices? Sign up or sign in
2025 Ghana Institute of Linguistics Literacy and Bible Translation
