Esita 8
8
Egyu-dɩrɛ ɛ sɩ̀ ose gɛtɛ wàà kpa Yuda bete
1Duwi dɩtɔkɔ ke daanɩ gɛ Egyu-dɩrɛ Herihesi ɛ ka Haman, Yuda bete bɔɔkyʋnlɛ fɔ waanyan powu ɛ tɛ egyu-dɩrɛ-nanɩ Esita. Gɛ Modekayi e wura osele ɛ ba egyu-dɩrɛ wakʋn, yema Esita ɛ dɔ̀ egyu-dɩrɛ alɛ è di gɛ wɔfʋrɩ. 2Egyu e tiri wo gitola gɛtɛ wɔ dɩdawʋ dɩ̀ gyaga gii koro, gɛ e biri e to gi e ye Haman wakʋn fɔ, gɛ ka gi ɛ tɛ Modekayi. Gɛ Esita ɛ ka Haman waanyan fɔ ɛ sa Modekayi gʋlɔ.
3Esita e ni biri ɛ ka bʋnʋntu ɛ ma nʋ̀n egyu-dɩrɛ bɩsɩrɩ baanɩ. Ɛ fɔ wɔ gɛtɛ èè ten amɩnlɛ-kpen gɛtɛ Agagi-te Haman ɛ ka Yuda bete boo koro fɔ. 4Ɛwʋ gɛ Egyu-dɩrɛ Herihesi ɛ tʋna wo bugyu buuyon fɔ e wùlà Esita, gɛ Esita ɛ tɔ e be yela wɔ bʋnʋn.
5Gɛ Esita ɛ dɔ̀ alan, <<Egyu-dɩrɛ, gengyi wʋ̀ kɔlɔ tɛ wɔ, gɛ aa we mɩ gutunkoro fɔ, gɛ aa nya alɛ wù di ade-kpara gɛtɛ àà mɛ gɛlɛ fɔ, tɛ osele, fɔ bàà ŋwara ose-fon gɛtɛ waà kpa ɛwʋ gɛtɛ Agagi-te Hamedata wobi Haman ɛ ŋwara ɛ tɩyɛma alɛ be muru Yuda bete gɛtɛ bɛ̀ sa ntʋnkwaa gɛtɛ bʋ̀ sa aa gatɩn fɔ powu fɔ. 6Lan gɛ nan mɛ gengyi gyerebi ɛ̀ ba mɩɩn bɛnɩ boo koro fɔ? Lan gɛ nan mɛ gengyi bè wolo mɩɩn bɛfʋrɩ powu fɔ?>>
7Ɛwʋ gɛ Egyu-dɩrɛ Herihesi e tiri wuunyun ɛ tɛ egyu-dɩrɛ-nanɩ Esita ma Yuda-te Modekayi alan, <<Gɛtɛ Haman ɛ tɔ e yela Yuda bete boo koro fɔ, na ka waanyan na tɛ Esita, gɛ na yɛ bɛ sa wɔ gigyen ɔŋʋʋ bɛ gyɔlɔga ma oyon. 8Nkele ŋwara ose-fon ka da ma Yuda bete boo koro miin diyere daanɩ anlɛ gɛtɛ wʋ̀ kɔlɔ tɛ wɔ̀, fɔ àà ka egyu-dɩrɛ dɩdawʋ gii gitola nyɩ gii koro. Yema gɩkpa gɩkɩ gɩn ma gɛtɛ bɛ̀ ŋwara gɩ egyu-dɩrɛ diyere daanɩ, gɛ bɛ̀ ka wɔ dɩdawʋ dii gitola bɛ nyɩ gɩ, gɛ ɛkɩ eè terema gɩ.>>
9Okoro ebon-siyeefɛ, gɛtɛ bee kpèlè Siwan fɔ duwi dikpilin ma esiyeefɛ daanɩ fɔ, be kpèlè egyu-dɩrɛ gɩkpa gɩɩ bɛŋwaralɛ be tuma. Gɛ bɛ ŋwara Modekayi wose, bàà ka bɛ tɩyɛma Yuda bete ma bɛndɩrɛbi kperen-kperen gɛtɛ bɛɛ nya ntʋnkwaa akpilin kooron ma kwarankɩ (127), gɛtɛ bɩ̀ sa ye Indiya gɛtʋnkwaa gaanɩ san Kusi gɛtʋnkwaa gaanɩ fɔ powu. Bɛ ŋwara ose-fon nyawʋ ginde-kamasɛ gaanɩ. Gɛ bɛ ŋwara wʋ ma ginde-kamasɛ gɩɩ gɛŋwarabi. Gɛlɛ ke gɛ bɛ ŋwara wʋ Yuda bete boo ginde gaanɩ ma bɔɔ gɛŋwarabi gaanɩ. 10Modekayi ɛ ŋwara akpa fɔ Egyu-dɩrɛ Herihesi diyere daanɩ, gɛ bɛ ka wo gitola bɛ nyɩ ose fɔ. Ɛwʋ gɛ bɛ ka ose nyawʋ bɛ sa egyu-dɩrɛ bɛsaranyan baalɔ yaanɩ. Bɛ ka egyu-dɩrɛ wabengyi gɛtɛ ɩ̀ ba ɔsa bɛ ma yo-yo akpa fɔ.
11Anyun-gyebi gɛtɛ ɩ̀ sa ose fɔ waanɩ fɔ n di alɛ, Egyu ɛ tɛ Yuda bete osele gɛtɛ gengyi bɛkyʋnlɛ bɛkɩ bɛ̀ tɔ bè yela boo koro gɩfɩɩ-kamasɛ gaanɩ fɔ, osele wʋ̀ sa tɛ bɛ, gɛtɛ bàà kya be bo fɔ bàà kpà be to koro, fɔ bàà wolo bɔɔ bɛkyʋnlɛ fɔ, fɔ bàà muru boo beteni, ma bɛnanɩ, ma boo bebi powu, fɔ bàà kpila bɛkyʋnlɛ fɔ baanyan. 12Ebon fwo-nyɔɔfɛ, gɛtɛ bee kpèlè Ada fɔ, duwi-fwo-siyeefɛ fɔ, n di duwi gɛtɛ bɛ sɩ̀ alɛ, Yuda bete bɛ mɛ ade nyayɩ ntʋnkwaa powu, gɛtɛ bʋ̀ sa Egyu-dɩrɛ Herihesi gatɩn fɔ baanɩ. 13Wù di gɛtɛ anyun-gyebi gɛtɛ ɩ̀ sa ose fɔ waanɩ fɔ yàà mɛ ose tɛ gɛtʋnkwaa-kamasɛ. Gɛ wù di gɛtɛ bàà kalan wʋ ɛkamasɛ ɛ̀ɛ̀ nʋn. Fɔ Yuda bete bàà wura pɩna koro bàà talɩ be wolo bɔɔ bɛkyʋnlɛ-kamasɛ gɛtɛ baà tɔ be yela boo koro fɔ.
14Okoro egyu-dɩrɛ e tiri wɔ bɛsalɛ gɛtɛ bɛɛ gyaga wabengyi gɛtɛ ɩ̀ ba ɔsa gepepe fɔ osele gɛ bɛ kya iti bɛ da. Bɛ sɩ̀ ose nyawʋ ditele-dɩrɛ gɛtɛ bee kpèlè Susa fɔ mɔ ke daanɩ.
15Gɛtɛ Modekayi e ye egyu-dɩrɛ dɩkpaara ɛɛ fɔrɔ fɔ, be su wɔ begyu bɔɔ ngba buluu, ma gifututu, gɛ è tin sɩka-sɩya digyu-koto-dɩrɛ gɛ ɛ sa dɩgyʋgʋsa-sɩya ɛ gyaga gigyu-gba fɔ gii koro. Ɛ̀ san fɔ, Susa ditele dɩɩ bɛnɩ bɛɛ gbɛrɛ afala ɔsɛ waanɩ. 16Duwi dɩtɔkɔ, Yuda bete boo koro gɩ̀ nʋ̀n bɛ, be di ɔsɛ, be wura gebù. 17Gɛtʋnkwaa ma ditele-kamasɛ gɛtɛ ose nyawʋ wʋ ma gyu fɔ, Yuda bete gɛtɛ bɛ̀ sa dʋkɔ fɔ, be di, gɛ bɛ nyʋn ɔsɛ waanɩ. Gɛ wʋ ba gɛtɛ ntʋnkwaa fɔ baanɩ fɔ, bɛnɩ kpekpesi gɛtɛ ben di Yuda bete fɔ, be biligi Yuda bete, yema alɛ bè serenti Yuda bete fɔ okoro.
Currently Selected:
Esita 8: ADE
Highlight
Copy
Compare
Share
Want to have your highlights saved across all your devices? Sign up or sign in
2025 Ghana Institute of Linguistics Literacy and Bible Translation
