1 Samweli 23
23
Dafidi e to Keyila ditele ɛ ya
1Duwi dɩkɩ ɛkɩ ɛ dɔ̀ Dafidi alan, <<Nya, Filisiti bete bɛɛ kpà ma Keyila bete gɛ bee yuri ili yaanyan-fon fɔ,>> 2e lila Yahwe alan, <<N san nan ma kpà ma Filisiti bete nyabɛ?>> Yahwe e tiri wuunyun ɛ tɛ wɔ alan, <<San ma kpà ma ɛbɛ fɔ àà to Keyila ditele ya.>>
3Mɔ Dafidi bɛnɩ bɛ dɔ̀ wɔ alan, <<Nya, gɛtɛ tì sa Yuda gɛtʋnkwaa gaanɩ gba lɛ, gɩsaa gì de tɩ, fɔ lan gɛ taà talɩ tɩ tɔ tɩ san Keyila ditele alɛ tɩ maà tà bɩtà ma Filisiti bɩtà bʋʋ bɛtàlɛ?>>
4Okoro Dafidi e biri e lila Yahwe gelenbi, gɛ Yahwe e tiri wuunyun ɛ tɛ wɔ alan, <<Waran san Keyila, yema nan ka Filisiti bete n sa aalɔ yaanɩ.>> 5Okoro Dafidi ma wɔ bɛnɩ bɛ san Keyila, gɛ bɛ kpà ma Filisiti bete fɔ gɛ Dafidi e wolo bɛ kpekpesi gɛ be kpila baanyan, gɛ e to Keyila bete ɛ ya. 6(Ɔya gɛtɛ Ahimeleki wobi Abiyatari e serenti ɛ ba Dafidi wakʋn fɔ, ɛ ka gedi gɩɩ bɛtɛlɛ bɔɔ gɛgba tinlɛ diboro ɛ ba Keyila ditele daanɩ.)
Sawulo ɛ kpa ɛ gyaga Dafidi wokoro
7Gɛtɛ bɛ dɔ̀ Sawulo alɛ Dafidi ɛ ba Keyila fɔ, ɛ dɔ̀ alan, <<Wurubwarɛ e tiri wɔ ɛ tɛ mɩ, yema wu we anlɛ gɛtɛ e gye wo koro ɛ tan dikwo, gɛtɛ e be gyu ditele gɛtɛ ɔpɔrɩ wu silin di wu tuma gɛ dɩ̀ ba bʋwɔrɔnyan diitunu dɩrɛ-dɩrɛ.>> 8Ɛwʋ gɛ Sawulo e kpèlè wɔ bɩtà bʋʋ bɛtàlɛ powu gɛtɛ bàà waran san Keyila bàà ma sʋ Dafidi ma wɔ bɛnɩ sa.
9Ɔkʋna gɛtɛ Dafidi ɛ nʋn alɛ Sawulo ɛɛ sa amɩnlɛ-kpen wokoro fɔ, ɛ dɔ̀ gedi gɩɩ gɩtɛlɛ Abiyatari fɔ alan, <<ka gɛgba tinlɛ diboro fɔ ba.>> 10Dafidi e tiri wuunyun alan, <<Oo Yahwe, Isareli Wo Wurubwarɛ, nmɩ aasaranyan na nʋn alɛ, miin koro Sawulo ee len èè bè muru Keyila ditele. 11Keyila bete baà tiri mɩ bɛ bɛ tɛ wɔ? Sawulo ɛɛ̀ nyɩ̀ ɛ ba anlɛ gɛtɛ na nʋn fɔ? Oo! Yahwe, Isareli Wo Wurubwarɛ, dɔ̀ nmɩ aasaranyan.>> Gɛ Yahwe ɛ dɔ̀ alan, <<Ɩɩn ɛɛ̀ ba.>>
12Dafidi e biri e lila alan, Keyila bete baà tiri nmɩ ma mɩɩn bɛnɩ bɛ tɛ Sawulo? Gɛ Yahwe ɛ dɔ̀ alan, <<Ɩɩn baà tiri yɩ bɛ tɛ.>>
13Gɛ Dafidi ma wɔ bɛnɩ gɛtɛ baà mɛ anlɛ nkpɩn bisiyee fɔ be ye Keyila, bɛɛ sara, sara bɛ tɔ. Gɛtɛ Sawulo ɛ nʋn alɛ Dafidi ma wɔ bɛnɩ be serenti be ye Keyila fɔ, ɛ mɩnɩ san dʋkɔbɛ.
14Dafidi e bu odon wʋʋ gɛtʋnkwaa gɛtɛ gɩ̀ sa Sifi wotonkuma waanɩ fɔ. Sawulo e bugiti wɔ duwi n di duwi, mɔ Wurubwarɛ en tiri Dafidi sa walɔ yaanɩ. 15Gɛtɛ Dafidi ɛ̀ sa Horesi gɛtɛ wʋ̀ sa Sifi wotonkuma waanɩ fɔ, Dafidi ɛ nʋn gɛtɛ Sawulo ɛ ba è be wolo wɔ. 16Gɛ Sawulo wobi Yonatan ɛ san Dafidi wakʋn Horesi ɛ ma kpà wɔ èè yela kin-kin Wurubwarɛ anɩ. 17Ɛ dɔ̀ alan, <<Kara yɛ gɩsaa gàà ton wɔ, miinte Sawulo ɛɛn nan ka gʋlɔ ɛ kya wɔ. Aà bɛ mɛ egyu-dɩrɛ gɛtɛ aà nya Isareli powu wo koro gɛ nmɩ nan mɛ aanyɔɔfɛ. Miinte Sawulo gba ɛ nyɩ̀ gɛlɛ.>>
18Bɔɔ bɛnyɔɔ bɛ tà dikola Yahwe bʋnʋn. Dʋkɔ gɛ Yonatan ɛ da dɩkpaara, mɔ Dafidi ɛ wɔ Horesi.
19Sifi bete bɛ bʋn bɛ san Sawulo wakʋn Gibeya, gɛ bɛ dɔ̀ wɔ alan, <<Dafidi è bu odon wʋʋ gɛtʋnkwaa gɛtɛ gɩ̀ sa Horesi, Hakila wodon fɔ wuu koro, Yesimon wɔ gatɩn gɩɩ gɩlan. 20Oo egyu-dɩrɛ! waran ba ɔya-kamasɛ gɛtɛ aa len fɔ taà gye wɔ tɩ tɛ wɔ̀.>> 21Sawulo ɛ dɔ̀ bɛ alan, <<Yahwe e hira yɩ anlɛ gɛtɛ ɩ dɔ̀ mɩ ade nyayɩ lɛ. 22Ɩ san fɔ yàà ma nya gepepe, i bugiti yàà we ɔkʋn gbagbaagba gɛtɛ Dafidi ɛ̀ sa, ma ɛnɩ gɛtɛ e we wɔ dʋkɔbɛ. Bɛ dɔ̀ mɩ alɛ ɛ̀ ba dɩgyasɛyɩ. 23I bugiti yàà we wabukʋn powu fɔ yàà biri bɛ dɔ̀ mɩ ade gɛtɛ ɩ̀ sa waanɩ gbagba. Fɔ nan san ma ɛyɩ gengyi ɛ̀ sa dʋkɔbɛ fɔ, nan dɩyɛ n gye wɔ. Gengyi wù di gɛtɛ nan bugiti wɔ Yuda wakpara fɔ powu yaanɩ gba fɔ, nan mɛ>>
24Okoro be gyegeye Sawulo bɛ da Sifi. Fɔ Dafidi ma wɔ bɛnɩ bɛ̀ sa Mayon wotonkuma waanɩ Araba gatɩn gɩɩ gɩlan gɛtɛ wʋ̀ sa Yesimon fɔ. 25Sawulo ma wɔ bɛnɩ bɛ kya wo gebuti, gɛ gɛtɛ Dafidi ɛ nʋn gɛlɛ fɔ, ɛ waran ɛ da ataa yiidon gɛtɛ wʋ̀ sa Mayon wotonkuma waanɩ fɔ gɛ ɛ sara dʋkɔ. Gɛtɛ Sawulo ɛ nʋn gɛlɛ fɔ, ɛ san Mayon wotonkuma waanɩ ɛ ma bugiti Dafidi.
26Sawulo ɛ̀ san ma odon fɔ wuufèn wʋkɩ, fɔ Dafidi ma wɔ bɛnɩ mɔ bɛ̀ sa ofèn do, bee kutuma bàà serenti ye Sawulo wakʋn. Gɛtɛ Sawulo ma wɔ bɛnɩ bɛ gbɛma Dafidi ɛbɛ bàà gye bɛ fɔ, 27ɛnɩ-salɛ ɛkɩ ɛ ba Sawulo wakʋn ɛ bɛ dɔ̀ wɔ̀ alan, <<Ba bilen! Filisiti bete bee to gɛtʋnkwaa fɔ.>> 28Dʋkɔ gɛ Sawulo e kere Dafidi gɛtɛrɛma ɛ ya, gɛ ɛ da ɛ̀ɛ̀ ma tuma Filisiti bete fɔ. Gɛlɛ wuu koro gɛ bee kpèlè dʋkɔ alan Sela Hammalekoti#23:28 Gɛtɛ wuu wùlà alɛ dɩtaa gɛtɛ diyo 29Dafidi e ye dʋkɔ gɛ ɛ ma sara En Gedi.
Currently Selected:
1 Samweli 23: ADE
Highlight
Share
Compare
Copy
Want to have your highlights saved across all your devices? Sign up or sign in
2025 Ghana Institute of Linguistics Literacy and Bible Translation
