1 Samweli 22
22
Gedi gɩɩ bɛtɛlɛ baaku
1Dafidi e serenti e ye Gati ditele gɛ ɛ ma bu dɩtaa-fwe gɛtɛ dɩ̀ gbɛma Adulam ditele fɔ daanɩ. Gɛtɛ wɔdɩrɛ ɛbɛ ma wote dɩkpaara dɩɩ bɛnɩ bɛ nʋn gɛlɛ gaade nyayɩ fɔ, bɛ waran bɛ san wakʋn dʋkɔbɛ. 2Gɛ bɛnɩ powu gɛtɛ bɛ̀ sa dɩyɩyɛ daanɩ, abɛɛ bè de atoro, abɛɛ ade ɩn sara ma ɛbɛ fɔ powu be be tuma wakʋn dʋkɔbɛ, gɛ Dafidi ɛ bɛ mɛ boogyegeyelɛ. Bɛnɩ fɔ baà mɛ anlɛ nkpɩn bʋnyɔɔ gɛtɛ bɛ sara ma ɛwɔ dʋkɔbɛ. 3Gɛtɛ Dafidi e ye dʋkɔbɛ fɔ, ɛ da Misipa ditele gɛtɛ dɩ̀ sa Mohabi gɛtʋnkwaa gaanɩ fɔ gɛ ɛ dɔ̀ Mohabi wogyu alan, <<Ǹ fɔ wɔ̀ gɛ aà yera miinte ma mɩɩna ɛbɛ baà bɛ sara aakʋn ka ma sere ɔya gɛtɛ nan we ade gɛtɛ Yahwe ɛɛ̀ mɛ ɛ tɛ mɩ?>> 4Okoro Dafidi ɛ ka wote ma wɔna ɛ sɩ̀ Mohabi wogyu, gɛ bɛ sara dʋkɔbɛ ye ɔya powu gɛtɛ ɛ̀ sa gebukʋn fɔ. 5Mɔ Wurubwarɛ wɔtabʋrʋlɛ Gadi ɛ dɔ̀ wɔ̀ alan, <<Kara sara gebukʋn nfan, tɔ san Yuda gɛtʋnkwaa gaanɩ.>> Okoro Dafidi e ye dʋkɔbɛ gɛ ɛ da Hereti gɩkan gaanɩ.
Sawulo e wolo Nobi gedi gɩɩtɛ̀lɛ
6Duwi dɩkɩ Sawulo ɛ nʋn gɛtɛ be we Defidi ma bɛnɩ gɛtɛ bɛ̀ fɩya ma ɛwɔ fɔ. Fɔ è si Tamarisiki woyon wʋʋ gatɩn, Gibeya wodon wuu koro gɛ è de wɔ gɩtʋrʋnyan, gɛ wɔ bɩtà bʋʋ bɛtàlɛ bɔɔ bɛndɩrɛ be yela be silin wɔ be tuma. 7Gɛ Sawulo ɛ dɔ̀ bɛ alan, <<Ɛyɩ Benyamin bɛnɩ ɩ nʋn, Ɩ̀ nyɩ̀ alɛ Yese wobi Dafidi ɛɛ̀ tɛ yɩ ili ma wayɩn wo-ili powu? Abɛɛ ɩ̀ nyɩ̀ alɛ ɛɛ̀ sɩ̀ yɩ bɩndɩrɛ ɛ tɛ bɛnɩ nkpɩn ton, ma bɛnɩ akpilin ton? 8Gɛlɛ wuu koro gɛ ɛyɩ powu ɩ mɛ onyun miin koro? Gɛ ɛkɩ ɛn talɩ ɛ dɔ̀ mɩ ɔkʋna gɛtɛ nmɩ gbagba miinbi ɛ tà dikola ma Yese wobi fɔ. Yaanɩ ɛkɩ ɛn fɛ ma nmɩ gba abɛɛ ɛ̀ɛ̀ dɔ̀ mɩ alɛ miinbi ɛ yɛ mɩɩnsaranyan ɛ tɔ e yela miin koro gɛ ee bugiti osele èè tiri mɩ ye dʋkɔ anlɛ gɛtɛ wù we ǹdò lɛ.>>
9Mɔ Dowegi, Edomi-te gɛtɛ è yela ma Sawulo bɛndɩrɛbi fɔ ɛ dɔ̀ Sawulo alan, <<Na we Yese wobi fɔ gɛtɛ ɛɛ fɔrɔ Ahitubi wobi Ahimeleki gɛtɛ ɛ̀ sa Nobi fɔ wakʋn. 10Ahimeleki e lila Yahwe anlɛ gɛtɛ Dafidi ɛɛ̀ mɛ, gɛ ɛ tɛ wɔ anyandilɛ ma Filisiti-te Goliyati wɔ tata fɔ.>>
11Okoro Sawulo ɛ sa bɛnɩ Ahitubi wobi Ahimeleki ma wote dɩkpaara dɩɩ bɛnɩ powu gɛtɛ bè di Nobi gedi gɩɩ bɛtɛlɛ fɔ baakʋn. Gɛ ɛbɛ powu bɛ ba Sawulo wakʋn. 12Sawulo ɛ dɔ̀ alan, <<Ahitubi wobi, nʋ̀n.>> Gɛ e yera wɔ alan, yoo! Miinfonte. 13Sawulo e lila wɔ alan, <<Anʋn yii koro gɛ a wɔ ma Yese wobi ɩ mɛ onyun miin koro gɛ a tɛ wɔ boroboro, ma tata gɛ a biri a lila Yahwe gelenbi a tɛ wɔ, gɛ wʋ yɛ wɔ ɛ tɔ e yela miin koro gɛ ee bugiti osele èè tiri mɩ ye waanɩ anlɛ gɛtɛ ɛɛ mɛ ǹdò lɛ?>> 14Ahimeleki e tiri wuunyun ɛ tɛ egyu-dɩrɛ fɔ alan, <<Aa bɛsaranyan powu baanɩ fɔ, ɛ mɔmɔ ǹ ba nʋnkwarɩ anlɛ Dafidi gɛtɛ è di awɔ gbagba aalote gɛ è di aa bɛdɩyɛlɛ bɔɔdɩrɛ, gɛ ɛ̀ ba gebu-dɩrɛ aa dɩkpaara daanɩ? 15Okoro duwi dɩtɔkɔ n di dɩgyangbasɛlɛ gɛtɛ na lila Yahwe gelenbi na tɛ wɔ? Kpakpaakpa! Egyu kara ka ade gyaga nmɩ aasaranyan miin koro abɛɛ miinte dɩkpaara dɩɩnɩ ɛkɩ wokoro. Yema nmɩ aasaranyan mɩɩn nyɩ̀ ade ɩkɩ kadama gɛlɛ gaade nyayɩ yii koro.>> 16Mɔ egyu-dɩrɛ ɛ dɔ̀ alan, <<Ahimeleki, awɔ ma aate dɩkpaara dɩɩ bɛnɩ powu yaà nyɩ̀ i ku.>>
17Okoro egyu-dɩrɛ Sawulo ɛ dɔ̀ wɔ bɛdɩyɛlɛ gɛtɛ bè yela dʋkɔ fɔ alan, <<I wolo Yahwe gedi gɩɩ bɛtɛlɛ fɔ, yema ɛbɛ mɔ be yela Dafidi gama. Ma gɛtɛ bɛ̀ nyɩ̀ alɛ ee serenti gba fɔ, bɛn dɔ̀ mɩ.>> Mɔ bɛdɩyɛlɛ fɔ be terema gɛtɛ bàà wolo Yahwe gedi gɩɩ bɛtɛlɛ fɔ.
18Ɛwʋ gɛ Egyu-dɩrɛ ɛ dɔ̀ Dohegi alan, <<Awɔ fi, fɔ àà wolo gedi bɛtɛlɛ fɔ.>> Gɛ Dohegi e fi gɛ e wolo bɛ. Duwi dɩtɔkɔ e wolo gedi gɩɩ bɛtɛlɛ akpilin anaa ma ton gɛtɛ bɛ̀ sa boo gedi gɩɩ gɛtɛ̀ ngba tinlɛ diboro fɔ. 19Sawulo e biri ɛ yɛ be wolo gedi gɩɩ bɛtɛlɛ boo ditele Nobi bɛnɩ powu. Be wolo beteni ma bɛnanɩ, ma bebi, ma bɛkyʋkyʋʋ, ma bɛkwɔ, ma akpɔŋɔ-tɩtɩɩ, ma bɛyɛran powu.
20Mɔ Ahimeleki wobi Abiyatari gɛtɛ wotu n di Ahitubi fɔ, e serenti gɛ ɛ ma fɩya ma Dafidi. 21Gɛ ɛ dɔ̀ Dafidi alɛ Sawulo e wolo Yahwe gedi gɩɩ bɛtɛlɛ fɔ. 22Ɛwʋ gɛ Dafidi ɛ dɔ̀ Abiyatari alan, <<Duwi dɩtɔkɔ gɛtɛ na we Edom-te Dohegi dʋkɔbɛ fɔ, nan nyɩnla gɛtɛ ɛɛ̀ tɛ dɔ̀ Sawulo ade fɔ. Miin koro gɛ aate dɩkpaara dɩɩ bɛnɩ powu be ku lɛ. 23Sara maakʋn kara yɛ gɩsaa gàà ton wɔ, ɛnɩ gɛtɛ ee bugiti aa diku fɔ, ee bugiti nmɩ mɔ miinyo ke. À sara maakʋn fɔ, aà wura getoya.>
Currently Selected:
1 Samweli 22: ADE
Highlight
Share
Compare
Copy
Want to have your highlights saved across all your devices? Sign up or sign in
2025 Ghana Institute of Linguistics Literacy and Bible Translation
