1 Samweli 20
20
Dafidi ma Yonatan
1Dafidi e serenti e ye Nayito gɛtɛ wʋ̀ sa Rama fɔ gɛ ɛ san ɛ ma lila Yonatan alan, <<Anʋn gɛ na mɛ? Ade-kpen mɔmɔ gɛ na mɛ? Anʋn yaade gɛ na mɛ aate, gɛ ee len èè wolo mɩ?>> 2Yonatan e tiri wuunyun alan, <<Kpakpaakpa! aa nan ku. Nya, miinte ɛn taa mɛ gɩnyan-dɩrɛ gɩkɩ abɛɛ gɩnyan-pɩɩ gɩkɩ, gɛtɛ ɛn nan yɛ mɩ nan nyɩnla. Anʋn yii koro gɛ eè bubwa mɩ ade nyayɩ? Wʋn ma waanɩ gɛlɛ!>> 3Mɔ Dafidi ɛ kan ntam gɛ ɛ dɔ̀ alan, <<Aate ɛ̀ nyɩ̀ gɛtɛ aa len maade gepepe, okoro ɛ mɛ dɩmɩnlɛ alɛ, < Wun di gɛtɛ Yonatan ɛ̀ɛ̀ nyɩnla ade nyayɩ, nka gɛlɛ fɔ, dɩkpʋkpʋ daà be ton wɔ.> Mɔ gɛtɛ Yahwe ɛ̀ nyɩ̀ ɛ̀ sa nkpa gɛ awɔ mɔ à sa nkpa lɛ, nn mɩnɩ ma ɔfɔ ma diku.>>
4Ɛwʋ gɛ Yonatan ɛ dɔ̀ Dafidi alan, <<Gɩnyan-kamasɛ gɛtɛ aa len nan mɛ fɔ, nan mɛ n tɛ wɔ̀.>>
5Okoro Dafidi ɛ dɔ̀ Yonatan alan, <<Nya, gɩsa wù di gɛ ebon-fon wɔsɛ wuu gedi, gɛ wù di gɛtɛ nàn di ma egyu-dɩrɛ, mɔ yɛ mɩ nan ma bu dɩfa daanɩ ka ma sere gɩsarama ɔgyɔlɔ. 6Gengyi aate en we mɩ fɔ, dɔ̀ wɔ alan, <Dafidi ɛ fɔ mɩ osele, alɛ eè serenti ɛ san wɔlɛ Betelem ditele, yema wofoli wʋʋ bɛnɩ powu bee di gɩkyan gɩɩsɛ.> 7Gengyi ɛ̀ dɔ̀ alan, <Wʋ̀ kɔlɔ> fɔ, fɔ gɩnyankɩ gɩn nan mɛ nmɩ aasaranyan. Mɔ gengyi ɛ̀ ka owurufa fɔ, ɛwʋ bɩrɛ, nyɩnla alɛ, ɛ̀ nyɩ è len ɛ̀ɛ̀ mɛ mɩ ade-kpen. 8Okoro n fɔ wɔ̀ gɛ we mɩ gutunkoro, yema nmɩ ma awɔ tɩ tà dikola Yahwe bʋnʋn. Gengyi na di dɩpwɛ fɔ, awɔ gbagba wolo mɩ! Anʋn yii koro gɛ aà tiri mɩ a tɛ aate?>>
9Yonatan ɛ dɔ̀ alan, <<Kpakpaakpa! Wʋʋn nan ba waanɩ wʋ nya! Gengyi gifiye bɛrɛɛ gba gɩ̀ gbɛrɛ mɩ alɛ miinte ee len èè wolo wɔ̀ fɔ, anʋn yii koro gɛ mɩn nan dɔ̀ wɔ̀?>>
10Gɛ Dafidi e lila Yonatan alan, <<gengyi aate e tiri ade fɔ yiinyun ɛ tɛ wɔ owurufa waanɩ fɔ, lan gɛ nan mɛ gɛ nan nyɩnla?>>
11Gɛ Yonatan ɛ dɔ̀ Dafidi alan, <<Bà taà san dɩfa daanɩ!>> Gɛ bɔɔ bɛnyɔɔ bɛ da dɩfa fɔ daanɩ.
12Gɛ Yonatan ɛ dɔ̀ Dafidi alan, <<Na nya Yahwe, Isareli wo Wurubwarɛ na tɛ wɔ alɛ, gɩsarama ɔya nyawʋ wʋʋkʋna fɔ, nan tabʋrʋ ma miinte. Gengyi ɛ̀ ba dɩmɩnlɛ-kpara tɛ wɔ̀ fɔ, nan yɛ wɔ̀ àà nyɩnla. 13Mɔ gengyi ɛ̀ ba dɩmɩnlɛ-kpen aa koro gɛ mɩn yɛ wɔ̀ àà nyɩnla àà serenti fɔ, ɛwʋ bɩrɛ Yahwe ɛ gbɛrɛ mɩ e wolo. Yahwe ɛ sara ma awɔ, anlɛ gɛtɛ ɛ sara ma miinte fɔ. 14Mɔ gɛtɛ ǹ nyɩ̀ ǹ sì nkpa lɛ, boo len maade anlɛ gɛtɛ Yahwe e tiri gelen e len mɩ fɔ, fɔ aate ɛ kara bè wolo mɩ. 15Gengyi Yahwe eè wolo nmɩ Dafidi mɩɩn bɛkyʋnlɛ powu e ye gɛtʋnkwaa gaanɩ gba fɔ, kara yɛ gelen gɛtɛ à ba tɛ mɩɩn dɩkpaara fɔ, gàà lanla.>>
16Ɛwʋ gɛ Yonatan ɛ tà dikola ma Dafidi dɩkpaara gɛ ɛ dɔ̀ alan, <<Yahwe e le aa bɛkyʋnlɛ gutoro.>> 17Gɛ Yonatan e biri ɛ yɛ Dafidi ɛ kan ntam ɛ fɩya gɛtɛ ee len wɔ, yema ɛwɔ Yonatan mɔ ee len wɔ anlɛ ɛwɔ gbagba wo koro.
18Ɛwʋ gɛ Yonatan ɛ dɔ̀ Dafidi alan, <<Gɩsa wù di ebon-fon wɔsɛ wuu gedi, taà kʋna wɔ̀, yema aa gɛsarakʋn gaà mɛ gɛbɩya-kwaa. 19Gɩsarama ɔgyɔlɔ san ma bù ɔkʋn gɛtɛ a daà ma bu ɔkʋna gɛtɛ ade nyayɩ i sere ɔpɩ fɔ, fɔ àà so ataa-tɩyɛlɛ fɔ yɩɩ gama. 20Gɛ nan tà bɩsɩnta bisiyee n sa ofen dʋkɔ, anlɛ n tɛ tà nan sere gɛ gɩnyankɩ. 21Fɔ nan sa ɛsaranyan ɛkɩ alan, < San ma bugiti bɩsɩnta fɔ.> Gengyi ǹ dɔ̀ wɔ alan, <Bɩsɩnta fɔ bʋ̀ sa gɛ aafèn nyawʋ, ka bʋ ba nfan> fɔ, wuu wùlà alɛ ade ɩkɩ ɩn ma, ye ba. Na nya Yahwe gɛtɛ ɛ̀ sa lɛ na tɛ wɔ̀ alɛ ade-kpen ɩkɩ ɩn ma. 22Mɔ gengyi n dɔ̀ ɛsaranyan fɔ alan, <Nya, bɩsɩnta fɔ bɩ̀ kààrà bʋ da sɩyɛɛ ɔfɔ fɔ,> ɛwʋ bɩrɛ, serenti yema Yahwe e tiri wɔ̀ osele. 23Gɛ ade gɛtɛ ɛtɩ ma awɔ tɩ tabʋrʋ fɔ, kʋna gɛtɛ Yahwe n di taadansɛ gakpaakpa.>>
24Gɛlɛ wuu koro Dafidi ɛ ma bu dɩfa fɔ daanɩ, gɛ ɔya gɛtɛ ebon-fon wɔsɛ wuu gedi wʋ̀ nɩma fɔ, egyu-dɩrɛ Sawulo ɛ ma sara gɛ e di. 25Ɛ sara wɔ gɛbɩya gii koro anlɛ gɛtɛ ɛ̀ fʋrʋma ɛɛ sara ɔya-kamasɛ ɛ marama ɔpɔrɩ fɔ, Yonatan è si wofèn, gɛ Abine è si Sawulo wɔ bɩlan baanɩ, mɔ Dafidi gɛsarakʋn bɩrɛ gɩ̀ dɔ̀ gɛbɩya-kwaa. 26Mɔ Sawulo ɛn dɔ̀ ade ɩkɩ duwi dɩtɔkɔ, yema ɛ sa amɩnlɛ alɛ, <<nkɩfɔ anlɛ gɩnyankɩ na sa Dafidi dɩdɩɩ, gbagbaagba fɔ e gyu dɩdɩɩ.>> 27Mɔ ebon fɔ duwi-nyɔɔfɛ fɔ, Dafidi gɛsarakʋn gɩ̀ sangba gɩ̀ dɔ gɛlɛ. Ɛwʋ gɛ Sawulo e lila Yonatan alan, <<Anʋn yii koro gɛ Yese wobi fɔ ɛn ba gedi walan ma ǹdò?>>
28Yonatan e tiri wuunyun alan, <<Dafidi ɛ fɔ mɩ osele gɛtɛ ɛ̀ɛ̀ san Betelem ditele daanɩ. 29Ɛ dɔ̀ alan, <Yɛ mɩ nan san, yema tɩɩ dɩkpaara dɩɩ tɛ gedi ditele-dɩrɛ daanɩ, gɛ mɩɩndɩrɛ ɛɛ nyɩ mɩ gɛtɛ nan sara dʋkɔ. Okoro we mɩ gutunkoro fɔ àà tiri mɩ osele nan ma we mɩɩndɩrɛ ɛbɛ.> Nyawʋ wuu koro gɛ ɛn talɩ ɛ ba egyu-dɩrɛ gedikʋn gɩɩkpʋlɔ fɔ wʋʋpɩ.>> 30Gɛ Sawulo woturu wʋ tɔ Yonatan wo koro, gɛ ɛ dɔ̀ wɔ alan, <<Ɛnanɩ giten-kɛma, ma oturu-dʋrʋ wobi! À nyɩ̀ alɛ mɩn nyɩ̀ gɛtɛ a mɛ onyun ma Yese wobi, gɛtɛ wù di awɔ gbagba ma aana gɛtɛ e wo wɔ̀ fɔ yɩɩnɩnfa? 31An nyɩ̀ gɛtɛ Yese wobi nyawɔ è si nkpa fɔ an nan talɩ a di bugyu gɛtʋnkwaa nyagɩ gaanɩ? Okoro sa bàà ma ka wɔ mɔma mɩ, yema wù di gɛtɛ èè ku.>>
32Gɛ Yonatan e lila wote alan, <<Anʋn yii koro gɛ baà wolo wɔ? Anʋn gɛ ɛ mɛ?>> 33Mɔ Sawulo e fun wɔ gɩtʋrʋnyan èè sere wɔ wolo. Gɛ Yonatan e we ɛ nyɩnla gɛtɛ wote ɛ̀ nyɩ̀ ee len gɛtɛ èè wolo Dafidi gɛ.
34Yonatan ɛ ka owurufa-dɩrɛ ɛ tɔ e ye gedikʋn fɔ gɩɩpɩ. Gɛ ebon fɔ duwi-nyɔɔfɛ dɩtɔkɔ daanɩ fɔ, e terema en di anyandilɛ, yema wote ade gɛtɛ ɛɛ mɛ Dafidi fɔ wʋ sa wɔ ɩnɩnfa.
35Kere-kpalɛ gagyɩgyan fɔ, Yonatan ɛ ka ɛsaranyanbi ɛkɩ ɛ tɛrɛma koro gɛ ɛ san dɩfa fɔ daanɩ, ɛ̀ɛ̀ ma tuma Dafidi. 36Gɛ ɛ dɔ̀ ɛsaranyanbi fɔ alan, <<Serenti san ma bugiti bɩtà gɛtɛ na tà fɔ.>> Gɛtɛ ɛsaranyanbi fɔ e serenti ɛɛ fɔrɔ fɔ, Yonatan ɛ tà gɩtà ɛ kààrà wɔ. 37Gɛtɛ ɛsaranyanbi fɔ ɛ nɩma ɔkʋn gɛtɛ gɩtà fɔ gɩ nʋn fɔ, Yonatan e kpen ɛ dɔ̀ wɔ alan, <<Gɩtà fɔ gɩ̀ dɔ̀ bʋnʋn!>> 38Gɛ e kpen ɛ dɔ̀ ɛsaranyanbi fɔ alan, <<Kya koro! San belen-belen! Kara yela!>> Ɛsaranyanbi fɔ ɛ ka gɩtà fɔ, gɛ e biri ɛ ba wofonte wakʋn. 39Mɔ ɛsaranyanbi fɔ ɛn nyɩnla ade gɛtɛ wuu wùlà. Yonatan ma Dafidi booko n nyɩ̀. 40Ɛwʋ gɛ Yonatan ɛ ka waakpanyan ɛ tɛ ɛsaranyanbi fɔ, gɛ ɛ dɔ̀ wɔ alan, <<San, birima yɩ san ditele.>>
41Gɛtɛ ɛsaranyanbi fɔ ɛ da e were fɔ, Dafidi ɛ tɔ e ye ataa-tɩyɛlɛ fɔ yɩɩ gatɩn gɩɩ gɩlan, gɛ ɛ waran e kura ɛ ka bʋnʋn e tin gɛtʋnkwaa Yonatan bʋnʋn disere disiyee. Ɛwʋ gɛ be mù bɛwɔlɔn, gɛ be wula, mɔ Dafidi na wula gʋsɔ.
42Gɛ Yonatan ɛ dɔ̀ Dafidi alan, <<San olila waanɩ yema ɛtɩ ma awɔ tɩ kan ntam Yahwe diyere daanɩ, tɩ dɔ̀ alan, <Yahwe ǹ te di ɛtɩ ma awɔ adansɛ, ma aadu waanɩ wʋʋ bɛnɩ ma miindu waanɩ wʋʋ bɛnɩ boo getite gakpaakpa.> >> Dʋkɔ gɛ Dafidi ɛ da, gɛ Yonatan mɔ e biri ɛ ba ditele.
Currently Selected:
1 Samweli 20: ADE
Highlight
Share
Compare
Copy
Want to have your highlights saved across all your devices? Sign up or sign in
2025 Ghana Institute of Linguistics Literacy and Bible Translation
