1 Begyu-dɩrɛ 8
8
Bɛ ka Dikola dɩɩ dɩdaka fɔ bɛ ba Dikwo-dɩrɛ fɔ daanɩ
1Ɛwʋ gɛ egyu-dɩrɛ Solomon e kpèlè Isareli bɛndɩrɛ, ma Isareli wo-ifoli yɩɩ bɛndɩrɛ, ma Isareli wo-itunu yɩɩ bɛndɩrɛ e tuma, gɛtɛ bàà ka Yahwe Dikola dɩɩ dɩdaka fɔ be ye Siyon, Dafidi Ditele bɛ ba Dikwo-dɩrɛ fɔ daanɩ. 2Isareli bɛnɩ powu be be tuma egyu-dɩrɛ Solomon wakʋn ɔsɛ wuu gedi wʋʋya waanɩ gɛtɛ wù di Isareli bete boobon kwarankɩfɛ gɛtɛ bee kpèlè Etanim waanɩ.
3Gɛtɛ Isareli bɛndɩrɛ fɔ powu be be gyu fɔ, gedi gɩɩ bɛtɛlɛ fɔ be kukuru Dikola dɩɩ dɩdaka fɔ bɛ san Dikwo-dɩrɛ fɔ daanɩ. 4Gɛ gedi gɩɩ bɛtɛlɛ ma Lefi bete bɛ nɩ ka getuma gɩɩ Dɩyan dii dikwo fɔ, ma anyan fɩrɩnfɩrɩn-kurumakyɛɛ fɔ powu bɛ ba. 5Gɛ egyu-dɩrɛ Solomon, ma Isareli bete powu gɛtɛ be tuma wakʋn Dikola dɩɩ dɩdaka fɔ dɩɩ bʋnʋn fɔ, be wolo bɛyɛran, ma bɛkwɔ-teni kpekpesi gɛtɛ an talɩ a kalan bɛ tɛ gedi.
6Gɛ Gedi gɩɩ bɛtɛlɛ fɔ bɛ ka Yahwe Dikola dɩɩ dɩdaka fɔ bɛ ma sɩ̀ dii gɛsarakʋn gamɩ, Ɔkʋn-dɩrɛ Wʋʋkʋn-dɩrɛkʋn fɔ daanɩ. Gɛ bɛ ka dɩ bɛ sɩ̀ Kerubi ɛbɛ baa banban yɩɩ gatɩn. 7Kerubi ɛbɛ fɔ bɛ yɛrɛba baabanba be tin ɔkʋn gɛtɛ Dɩdaka fɔ dɩ̀ dɔ fɔ, gɛ wu tin dɩ, ma dii-iyon-tonlɛ-tolalɛ fɔ powu. 8Iyon fɔ ɩ̀ ba abo, gɛtɛ gengyi à yela Ɔkʋn-fɩrɩnfɩrɩnkʋn fɔ, gbɛma Ɔkʋn-dɩrɛkʋn fɔ, aà talɩ a we yɩ, mɔ gengyi à sa okòro fɔ, an nan we yɩ. Gɛ ɩ̀ sa dʋkɔbɛ bè ye ma ǹdò. 9Gɩnyankɩ gɩn ma Dɩdaka fɔ daanɩ fɩya ma ataa-pansan-pansan anyɔɔ, gɛtɛ Mose ɛ ka ɛ sa daanɩ Horebi wodon wuu koro fɔ, ɔkʋn gɛtɛ Yahwe ɛ ta dikola ma Isareli bete ɔkʋna gɛtɛ be ye Egyipiti gɛtʋnkwaa gaanɩ wʋʋ gama fɔ.
10Ɔya gɛtɛ gedi gɩɩ bɛtɛlɛ fɔ be ye Ɔkʋn-fɩrɩnfɩrɩnkʋn fɔ, dɩkpaba di be tin Yahwe Dikwo-dɩrɛ fɔ. 11Gɛ gedi gɩɩ bɛtɛlɛ fɔ bɛn talɩ mɛ bɔɔ gʋtʋn dɩkpaba fɔ dii koro, yema Yahwe gingyebi gɩ yɔn ma Yahwe Dikwo-dɩrɛ fɔ.
12Dʋkɔ gɛ Solomon ɛ dɔ̀ alan, <<Yahwe ɛ dɔ̀ alɛ ɛɛ̀ sara dɩkpaba-kpim daanɩ. 13Na sere Dikwo-dɩrɛ na tɛ wɔ̀, ɔkʋn gɛtɛ aà sara gakpaakpa.>> 14Gɛtɛ Isareli bete powu bè yela dʋkɔ fɔ, egyu-dɩrɛ e fi bʋnʋn e ten bɛ, gɛ e hira bɛ. 15Gɛ ɛ dɔ̀ alan, <<Ɩ yɛ taà sila Yahwe, Isareli wo Wurubwarɛ, gɛtɛ ɛ dama wɔ gʋlɔ gii koro ɛ mɛ wanyun-gyebi gɛtɛ ɛ dɔ̀ ɛ sɩ̀ ɛ tɛ miinte Dafidi fɔ. Ɛ dɔ̀ alan, 16<Ye duwi gɛtɛ na tiri mɩɩn bɛnɩ Isareli bete na ye Egyipiti gɛtʋnkwaa gaanɩ lɛ, miin te tiri ditele dɩkɩ ye Isareli wo-ifoli fɔ yaanɩ gɛtɛ bàà sere Dikwo-dɩrɛ miin diyere dii koro bàà tɩ sʋma mɩ dʋkɔ. Mɔ na tiri Dafidi èè di bugyu tɛ mɩɩn bɛnɩ Isareli bete.>
17<<Miinte Dafidi ɛ ka ɛ sa woturu waanɩ gɛtɛ eè sere Dikwo-dɩrɛ ɛ tɛ Yahwe, Isareli wo Wurubwarɛ fɔ bàà tɩ̀ sʋma wɔ daanɩ. 18Mɔ Yahwe ɛ dɔ̀ miinte Dafidi alan, <Gɛtɛ wʋ̀ sa aaturu waanɩ alɛ aà sere Dikwo-dɩrɛ miin diyere dii koro lɛ, a mɛ ade gɛtɛ ade nyayɩ ɩ̀ sa aaturu waanɩ. 19Mɔ fɔ nka awɔ nan sere Dikwo-dɩrɛ fɔ. Aabi gɛtɛ è di gɛ awɔ gbagba aa nkalan, ma aa koro-kpaba fɔ, nan sere Dikwo-dɩrɛ fɔ miin diyere dii koro.>
20<<Yahwe e di wade-dɔ̀lɛ-sɩ̀lɛ fɔ yii koro. Yema na sere miinte Dafidi bɩsɩrɩ, gɛ n si Isareli gigyu-bɩya gii koro, anlɛ gɛtɛ ɛ bɔ ɛ dɔ̀ ɛ sɩ̀ fɔ, gɛ na sere Dikwo-dɩrɛ na tɛ Yahwe, Isareli wo Wurubwarɛ diyere dii koro. 21Na mɛ gɛsarakʋn Dikwo-dɩrɛ fɔ daanɩ na tɛ Dikola dɩɩ dɩdaka gɛtɛ ataa ɩ̀ sa daanɩ fɔ. Dɩdaka nyadɩ dii koro gɛ Yahwe ɛ tà dikola ma tiitu ɛbɛ ɔya gɛtɛ e tiri bɛ e ye Egyipiti fɔ.>>
Solomon wonyun-tiri
22Ɛwʋ gɛ Solomon ɛ tɔ e yela Yahwe gedi gɩɩ gɛtɛ̀kʋn fɔ gɩɩ bʋnʋn, Isareli bete fɔ powu bɔɔ bʋnʋn, gɛ ɛ bʋma walɔ gatala, 23gɛ ɛ dɔ̀ alan, Oo Yahwe, Isareli wo Wurubwarɛ, ɛkɩ ɛn ma gatala, abɛɛ gɛtʋnkwaa anlɛ awɔ. Awɔ gɛtɛ aa di gelen gii dikola gɛtɛ a tà ma aa bɛsaranyan gɛtɛ bɛɛ ka boo-ituru powu bɛ san aasele waanɩ fɔ dii koro. 24A di aade gɛtɛ a dɔ̀ a sɩ̀ a tɛ miinte Dafidi gɛtɛ è di aasaranyan fɔ yii koro. A ka aanyun a dɔ̀ a sɩ̀, gɛ a dama aalɔ yii koro a yɛ wʋ ba waanɩ anlɛ gɛtɛ wʋ̀ dɔ ǹdò lɛ.
25Nkele Yahwe, Isareli wo Wurubwarɛ, di ade gɛtɛ a dɔ̀ a sɩ̀ a tɛ aasaranyan, miinte Dafidi alan, <Wʋn nan ba alɛ, an nan wura ɛnɩ gɛtɛ ɛ̀ɛ̀ sara Isareli gigyu-bɩya fɔ gii koro mɩɩn bʋnʋn, gengyi aa bebi baà bù mɩ gɛ baà di maade yii koro anlɛ gɛtɛ a mɛ fɔ.> 26Okoro nkele, oo Isareli wo Wurubwarɛ, yɛ aade gɛtɛ a dɔ̀ a sɩ̀ a tɛ aasaranyan miinte Dafidi fɔ, yàà ba waanɩ.
27Gɛ gbagbaagba fɔ Wurubwarɛ ɛɛ̀ bɛ sara gɛtʋnkwaa gaanɩ? Gatala, ma gatala gɩɩ gatala gba ɩn nɩma wɔ̀ gɛsara, lan gɛ waà mɛ gɛ Dikwo gɛtɛ na sere lɛ daà nɩma wɔ̀? 28Mɔ Oo Yahwe, miin Wurubwarɛ, nʋn nmɩ aasaranyan miinyun-tiri, fɔ àà we mɩ gutunkoro. Nʋn gewula ma onyun-tiri gɛtɛ aasaranyan ee tiri aa bʋnʋn ǹdò lɛ. 29Yɛ aa bʋnʋn bàà gyaga Dikwo-dɩrɛ nyadɩ dii koro odon ma ofilibo nfan nyawʋ gɛtɛ a dɔ̀ alan, <Miin diyere daà sara dʋkɔ.> Fɔ àà wura nʋn onyun-tiri gɛtɛ nmɩ aasaranyan nte tiri nfan fɔ. 30Nʋn nmɩ aasaranyan maade-fɔlɛ, ma aa bɛnɩ Isareli bete booyo gengyi bè fi bɔɔ bʋnʋn be ten nfan gɛ tì tiri onyun fɔ. Nʋn taakʋn ye gatala aa gɛsarakʋn fɔ. Nʋn taakʋn, fɔ àà ka taade-kpen kyɛ tɩ.
31<<Gɛ gengyi ɛnɩ ɛkɩ ɛ mɛ wɔwɔlɔn ade-kpen, gɛ wù di gɛtɛ ɛ̀ɛ̀ kan ntam, gɛ ɛ̀ ba ɛɛ kan ntam aa gedi gɩɩ gɛtɛ̀kʋn aa Dikwo-dɩrɛ nyadɩ daanɩ nfan fɔ, 32nʋn ye gatala, fɔ àà mɛ wʋʋ gʋtʋn. Dɔ̀ aa bɛsaranyan fɔ bɔɔ gɔdɔ, fɔ àà tin ɛwɔ gɛtɛ waade ɩn kɔlɔ fɔ dɩpwɛ, fɔ àà ka wade-kpen tola wɔ. Fɔ àà tɛ ɛwɔ gɛtɛ wade ɩ̀ dɔ̀ fɔ aten.
33<<Gengyi aa bɛnɩ Isareli bete bɔɔ bɛkyʋnlɛ bè di boo koro bɩtà baanɩ yema bɛ mɛ wɔ̀ ade-kpen, gɛ bè biri bɛ ba aakʋn, be be kpèlè aa diyere be tiri onyun aa Dikwo-dɩrɛ fɔ daanɩ bɛ̀ fɔ alɛ ka kyɛ bɛ fɔ, 34nʋn bɔɔ gɛfɔ fɔ ye gatala, fɔ àà ka aa bɛnɩ Isareli bete fɔ baade-kpen kyɛ bɛ, fɔ àà birima bɛ ba gɛtʋnkwaa, gɛtɛ a ka a tɛ boote ɛbɛ fɔ gaanɩ.
35<<Gengyi gatala gɩ̀ tan, gɛ ɛsʋn ɛn taa nʋ̀n, yema aa bɛnɩ bɛ mɛ ade-kpen aa koro, mɔ gengyi bɛ̀ dama dikwo-dɩrɛ fɔ dii koro be tiri onyun, be tiri baade-kpen bɛ dɔ̀ aa diyere daanɩ, yema aa tiira bɛ giten fɔ, 36nʋn baakʋn ye gatala, fɔ àà ka aa bɛsaranyan Isareli bete baade-kpen kyɛ bɛ. Wùlà bɛ dɩsarabi-kpara, fɔ àà yɛ ɛsʋn ɛ̀ɛ̀ nʋ̀n gɛtʋnkwaa gɛtɛ a tɛ aa bɛnɩ gàà mɛ baadikurumanyan gaanɩ.
37<<Gengyi dɩkpan abɛɛ gyerebi ɩ̀ nʋ̀n gɛtʋnkwaa fɔ gii koro, abɛɛ anyandilɛ yɩɩ gɛmɩna abɛɛ bɛkpagyɩgyɩ, ma akpata, abɛɛ gengyi ɛkyʋnlɛ ɛkɩ ɛ̀ bɛ sʋ bɛ ɛ sa boo ditele dɩkɩ daanɩ, abɛɛ gyerebi-dɩrɛ abɛɛ diyebabi gɛtɛ daà ba gɛtʋnkwaa fɔ gii koro, 38gɛ gengyi aa bɛnɩ Isareli bete fɔ baanɩ-kamasɛ è nu koro, gɛ bɛ bʋma baalɔ be wùlà Dikwo-dɩrɛ nyadɩ be tiri onyun dɩkpʋkpʋ daanɩ fɔ, 39nʋn ye gatala aa gɛsarakʋn fɔ, fɔ àà ka baade-kpen kyɛ bɛ fɔ àà mɛ wʋʋ gʋtʋn, fɔ àà le ɛkamasɛ gutoro anlɛ gɛtɛ wade mɛlɛ ì we. Yema à nyɩ̀ woturu waanɩ gɛ awɔ aako n nyɩ̀ bɛnɩ powu boo-ituru yaanɩ. 40Gɛlɛ fɔ, baà serenti wɔ̀ ɔya-kamasɛ gɛtɛ bɛ̀ sa gɛtʋnkwaa gɛtɛ a ka a tɛ tiitu ɛbɛ fɔ gaanɩ.
41<<Mɔ esela gɛtɛ en di aa bɛnɩ Isareli bete baanɩ ɛkɩ, mɔ gɛtɛ ɛ nʋn aa diyere-dɩrɛ, okoro e ye gende-fon gaanɩ ɛ ba, 42yema bɛnɩ baà nʋn aa diyere-dɩrɛ, ma aa gʋlɔ ma ɔkɛma, ma ade-dɩrɛ gɛtɛ a mɛ a tɛ aa bɛnɩ, okoro gengyi ɛ̀ ba èè be tiri onyun aa Dikwo-dɩrɛ nyadɩ daanɩ fɔ, 43nʋn wakʋn ye gatala, aa gɛsarakʋn, fɔ àà mɛ gɩnyan-kamasɛ gɛtɛ esela fɔ e lila wɔ̀ fɔ, fɔ wàà yɛ gɛtʋnkwaa gɩɩ bɛnɩ powu bàà nyɩnla aa diyere, fɔ bàà serenti wɔ̀, anlɛ gɛtɛ aa mɛ a tɛ aa bɛnɩ Isareli bete fɔ, fɔ bàà nyɩnla alɛ dikwo-dɩrɛ gɛtɛ na sere fɔ, àà diyere n gyaga dii koro.
44<<Gengyi aa bɛnɩ bɛ̀ san bɩtà ma bɔɔ bɛkyʋnlɛ fɔ, ɔkʋn-kamasɛ gɛtɛ à sa bɛ, gɛ bè fi bɔɔ bʋnʋn be ten ditele-dɩrɛ gɛtɛ a tiri, ma Dikwo-dɩrɛ gɛtɛ na sere aa diyere dii koro, gɛ bè tiri onyun bɛ tɛ wɔ̀ fɔ, 45nʋn boonyun-tiri ma bɔɔ gɛfɔ fɔ ye gatala, aa gɛsarakʋn fɔ, fɔ àà kpà tɛ bɛ.
46<<Ɛkɩ ɛn ma gɛtɛ ɛn taà mɛ ade-kpen, okoro gengyi bɛ̀ mɛ wɔ̀ ade-kpen, gɛ à ka owurufa boo koro, gɛ à tiri bɛ a tɛ bɔɔ bɛkyʋnlɛ gɛtɛ bàà gye bɛ bɩtà, bàà ka bɛ san (ɛbɛ bɛkyʋnlɛ fɔ) bɔɔ gɛtʋnkwaa gaanɩ ɔfɔ abɛɛ gbɛma, 47gɛ gengyi bè foma boo-ituru gɛtʋnkwaa gɛtɛ be gye bɛ bɩtà bɛ san fɔ gaanɩ, gɛ bè fi bɛ ba aakʋn bɛ dɔ̀ alan, <Tɩ mɛ ade-kpen, tɩ mɛ ɛwʋ gɛtɛ wʋn kɔlɔ, tɩ mɛ duyu-kɛma daade,> 48gɛ gengyi bɛ̀ ka boo-ituru ma bɔɔkala ɛbɛ powu be biri be foma bɛ ba aakʋn, bɔɔ bɛkyʋnlɛ gɛtɛ be gye bɛ bɩtà fɔ bɔɔ gɛtʋnkwaa gaanɩ dʋkɔ fɔ, gɛ bè fi bɔɔ bʋnʋn be ten gɛtʋnkwaa gɛtɛ a ka a tɛ bootu ɛbɛ, ma ditele-dɩrɛ gɛtɛ a tiri, ma Dikwo-dɩrɛ, gɛtɛ na sere gɛtɛ bàà tɩ̀ sʋma wɔ̀ daanɩ fɔ, gɛ bè tiri onyun fɔ, 49nʋn boonyun-tiri ma bɔɔ gɛfɔ ye gatala aa gɛsarakʋn fɔ gaanɩ, fɔ àà kpaa bɛ. 50Fɔ àà ka aa bɛnɩ gɛtɛ bɛ mɛ wɔ̀ ade-kpen fɔ baade-kpen kyɛ bɛ, ka boo giten-kɛma gaade kyɛ bɛ, fɔ àà yɛ bɔɔ bɛkyʋnlɛ bàà we bɛ gutunkoro. 51Yema bè di gɛ aa bɛnɩ, aanyan yii bedilɛ gɛtɛ a tiri a ye Egyipiti gɛtʋnkwaa gaanɩ ma dɩfana-dɩrɛ daanɩ fɔ.
52<<Oo Yahwe! wura duwe-lila tɛ nmɩ aasaranyan ma aa bɛnɩ Isareli bete, fɔ àà tɩ̀ nʋn baakʋn ɔya-kamasɛ gɛtɛ bee wula be kpèlè wɔ̀ fɔ. 53Yema a kyɔlɔ booko a ye ntʋnkwaa nyabʋ powu baanɩ, gɛtɛ bàà mɛ aa bɛnɩ-dilɛ anyan. Anlɛ gɛtɛ a dama aa saranyan Mose wo koro a dɔ̀ ɔya gɛtɛ awɔ, Yahwe-kpatakpɩrɩ a tiri tiitu ɛbɛ a ye Egyipiti fɔ.>>
54Gɛtɛ Solomon e tiri onyun gɛ ɛ fɔ Yahwe e were powu fɔ, ɛ tɔ e ye Yahwe gedi gɩɩ gɛtɛ̀kʋn fɔ gɩɩ bʋnʋn, ɔkʋn gɛtɛ e kura gɛ ɛ bʋma walɔ e wula gatala fɔ. 55E yela, gɛ ɛ ka gɩta-dɩrɛ e hira Isareli bete powu gɛtɛ be tuma dʋkɔ fɔ alan,
56<<I sila Yahwe, gɛtɛ ɛ tɛ wɔ bɛnɩ Isareli bete getuna, anlɛ gɛtɛ ɛ dɔ̀ ɛ sɩ̀ fɔ. Digyebi-kɩlɩn gba din ye ade-kpara powu gɛtɛ ɛ dama wɔsaranyan Mose wo koro ɛ dɔ̀ ɛ sɩ̀ fɔ yaanɩ. 57Yahwe, tii Wurubwarɛ ɛ sara ma ɛtɩ anlɛ gɛtɛ ɛ sara ma tiitu ɛbɛ fɔ, ɛ kara kere tɩ ɛ ya, gɛ ɛ kara tiri bʋnʋn ɛ ya tɩ. 58E fi tiituru e ba wakʋn, fɔ tàà san wo-isele yaanɩ, fɔ tàà di wo-ise, ma wade-wùlàlɛ, ma wade-tɩyɛlɛ-sɩ̀lɛ, gɛtɛ ɛ tɛ tiitu ɛbɛ fɔ yii koro. 59Yahwe ɛ nʋn miinyun-tiri gɛtɛ na tiri fɔ odon ma ofilibo, fɔ ɛ̀ɛ̀ nʋn nmɩ wɔsaranyan, ma wɔ bɛnɩ Isareli bete boo duwi-kamasɛ daade-lilalɛ. 60Fɔ gɛtʋnkwaa gɩɩ bɛnɩ powu bàà nyɩnla alɛ, Yahwe n di Wurubwarɛ, gɛ ɛkɩ ɛn ma wɔ gama. 61Mɔ wù di gɛtɛ yàà ka yii-ituru powu ɩ tɛ Yahwe, tii Wurubwarɛ, fɔ yàà di wade-wùlàlɛ ma wo-ise yii koro anlɛ gɛtɛ ì de waanɩ ǹdò lɛ.>>
Dikwo-dɩrɛ fɔ dii getiri okòro
62Wʋʋ gama fɔ, egyu-dɩrɛ Solomon ma Isareli bete powu, bɛ tɛ Yahwe gedi. 63Solomon ɛ tɛ Yahwe olila wuu gedi. Ɛ ka bɛkwɔ-teni disepekyi ma gbaa (22,000), ma bɛyɛran ma begbebi asepekyi kooron (120,000) ɛ tɛ gedi. Ɛwʋ gɛ egyu-dɩrɛ ma Isareli bete powu be tiri Dikwo-dɩrɛ fɔ okòro.
64Duwi dɩtɔkɔ ke gɛ egyu-dɩrɛ ɛ mɛ Dikwo-dɩrɛ dɩɩ dɩkpaara-titelɛ fɔ gɛtɛ dɩ̀ sa Yahwe dikwo fɔ dii bunun fɔ fɩrɩnfɩrɩn, gɛ ɛ tɛ gekuma gii gedi, ma anyan yaabi yii gedi ma olila wuu gedi gaayo, yema gedi gɩɩ gɛtɛ̀kʋn gɛtɛ bɛ ka gɩwɔrɔnyan-sɩya bɛ mɛ fɔ gì we pɩɩ gɛtɛ gàà talɩ to gekuma gii gedi, ma anyan yaabi yii gedi, ma olila wuu gedi gaayo fɔ.
65Okoro Solomon ma Isareli bete powu be di ɔsɛ-dɩrɛ ɔya wʋtɔkɔ. Bɛnɩ bè lu ye Lebo-Hamati ka ma sere Egyipiti gifobi. Be di wʋ Yahwe, tii Wurubwarɛ bʋnʋn awi kwarankɩ, gɛ be biri bɛ fɩya awi kwarankɩ, gɛtɛ ɛwʋ powu wʋ mɛ awi fwo anaa. 66Duwi-nɩyɛfɛ daanɩ fɔ, e tiri bɛ osele. Be hira egyu-dɩrɛ gɛ be biri bɛ da bɔɔ-ɩlɛ ɔsɛ waanɩ, yema ade-kpara gɛtɛ Yahwe ɛ mɛ ɛ tɛ wɔsaranyan Dafidi ma Isareli bɛnɩ powu fɔ yii koro.
Currently Selected:
1 Begyu-dɩrɛ 8: ADE
Highlight
Share
Compare
Copy
Want to have your highlights saved across all your devices? Sign up or sign in
2025 Ghana Institute of Linguistics Literacy and Bible Translation
