1 Begyu-dɩrɛ 7
7
Solomon e sere wo digyukpaara
1Solomon mɔ e sere ɛwɔ gbagba dɩkpaara. Ɛ ka gɛ bɩkyan fwo bisiyee e sere wo digyu-kpaara fɔ. 2E sere akwo digyu-kpaara fɔ daanɩ, gɛ ɛ sa dɩkɩ diyere alɛ Lebanon Gɩkan gii dikwo. Daabo ɩ̀ ba bɩsɩrɩ akpilin kwarankɩ ma fwo (150), gɛ daayɛrɛ dɩ̀ ba akpilin asiyee ma fwo ton (75), gɛ dɩɩ gɛtɔ ɩ̀ ba bɩsɩrɩ akpilin anyɔɔ ma ton (45). Bɛ ka seda wo-iyon be sere bepila ɩgba ɩnaa. Ɔgba-kamasɛ wʋ̀ ba bepila fwo ton gɛtɛ seda woyon wʋkɩ wʋ̀ gyaga pila ɛkɩ wo koro. 3Gɛ bɛ ka seda wo-iyonbi be tin ɩtaa gɛtɛ ɩ̀ gyaga bepila fɔ yii koro fɔ. Ɩ̀ ba bepila akpilin anyɔɔ ma ton, gɛ ɔgba-kamasɛ wʋ̀ ba bepila fwo-ton. 4Gɛ be tiri nfansiri ɛbɛ gatala ɩgba isiyee. Nfansiri ɛbɛ fɔ ì ten ma bɔɔwɔlɔn akpen asiyee, ofèn ma ofèn. 5Nfansiri ɛbɛ ma itunu-yon fɔ powu ɩ̀ ba igen ɩnaa, gɛtɛ yaabo ɩ da yaayɛrɛ. Gɛ nfansɩrɩ ɛbɛ fɔ ì ten ma bɛwɔlɔn ofèn ma ofèn ɩgba isiyee. 6Gɛ e sere gɛsarakʋn gɛtɛ ɛ sa gɩ diyere alɛ bepila yii dikwo. Gaabo ɩ̀ ba bɩsɩrɩ akpilin asiyee ma fwo-ton (75), gaayɛyɛrɛ ɩ̀ ba bɩsɩrɩ akpilin anyɔɔ ma ton (45). Gɛsarakʋn fɔ gɩ̀ ba kpata, gɛtɛ bɛ ka bepila be sere.
7E ni sere gigyu-biya gii dikwo gɛtɛ ee kpèlè dɩ alɛ Gɔdɔ-Kpara gii Dikwo, ɔkʋn gɛtɛ ɛɛ̀ tɩ̀ dɔ̀ gɔdɔ. Okoro bɛ wanla seda wo-iyon bɛ marama dikwo fɔ dɩɩ gatɩn ma sere gɛwalɩkʋn. 8Ɛwɔ gbagba dɩkpaara-saralɛ fɔ, dɩ̀ sa gɔdɔ gɩɩ gɛdɔ̀kʋn fɔ gɩɩ gama. Bɛ mɛ dɩ gɛ anlɛ gɛtɛ bɛ mɛ Gɔdɔ gii dikwo fɔ. Gɛ Solomon e sere dɩkpaara nyadɩ daakɩ ɛ tɛ Farawo wobi gɛtɛ e to gɩna fɔ.
9Bɛ ka ataa-kpara, bɛ kɛrɛ yɩ, gɛ bɛ ka sɔya be kebi yɩ, gɛ bɛ kpalɩ yɩ bʋnʋn ma gama, gɛ bɛ ka yɩ be sere akwo fɔ, ye yɩɩ bɛkɔna baanɩ ma sere yii-igen yaanɩ. 10Bɛ ka gɛ ataa-dɩrɛ-dɩrɛ-kpara be sere ɔpɔrɩ fɔ wuu gesere-ɔpɩ fɔ. Ataa fɔ ɩkɩ yaabo ɩ̀ ba bɩsɩrɩ fwo-ton (15), gɛ ido mɔ yaabo ɩ̀ ba bɩsɩrɩ fwo bʋnyɔɔ (12). 11Gɛ bɛ ka ataa-kpara, gɛ be kebi yɩ anlɛ gɛtɛ wʋ kʋtʋma, ma seda wo-iyon bɛ gyaga gesere-ɔpɩ fɔ gii koro. 12Be sere-sere ataa ɩgba isiyee ma Seda wo-iyon ɔgba wʋkɩ be silin digyu-kpaara ma Dikwo-dɩrɛ dɩɩ dɩkpaara fɔ ma kpata fɔ powu.
Huram
13Gɛ egyu-dɩrɛ Solomon ɛ sa bɛ ma ka Huram, gɛtɛ e ye Tire fɔ bɛ ba. 14Wɔna è di gɛ ɛkpɩnsɔ gɛtɛ e ye Nafitali wofoli waanɩ. Gɛ wote è di Tire-te gɛtɛ è di gɩwɔrɔnyan-sɩya gɩɩwɔrɔ fɔ. Huram ɛ̀ ba adawʋ gepepe, gɛ ɛ gya gɩwɔrɔnyan-sɩya gɩɩ gʋtʋn-kamasɛ gɩɩ gɛmɛ gaanɩ. Ɛ ba egyu-dɩrɛ Solomon wakʋn, gɛ ɛ mɛ gɩwɔrɔnyan-sɩya gɩɩ gʋtʋn gɛtɛ bɛ tɛ wɔ fɔ powu.
15Ɛ ka awɔrɔnyan-sɩya ɛ wɔrɔ bepila bɛnyɔɔ, gɛ pila-kamasɛ waatɔ ɩ̀ ba bɩsɩrɩ dikpilin ma kwarankɩ (27), gɛ waalɩ ɩ̀ ba bɩsɩrɩ fwo nɩyɛ (18). Gɛ wʋʋfɩfɩ mɔ waà mɛ anlɛ gulobi. 16Gɛ e biri ɛ ka gɩwɔrɔnyan-sɩya ɛ mɛ imini ɩkɩ anlɛ ayu ɛ gyaga gɩwɔrɔnyan-sɩya gii bepila bɛnyɔɔ fɔ baayu yii koro. Gɛ wʋkamasɛ waabo ɩ̀ ba bɩsɩrɩ kwarankɩ ma ɔfan (7.5). 17Gɛ ɛ wɔrɔ agbarɩgbarɩ gɛtɛ ii gyu ma bɛwɔlɔn baanɩ kwarankɩ ɛ gyaga pila duyu-kamasɛ dii koro. 18Gɛ ɛ ka gɩwɔrɔnyan-sɩya ɛ wɔrɔ anyankɩ anlɛ pomegraniti wabi, gɛ ɛ mɛ yɩ ɩgba ɩnyɔɔ ɛ kyaga ma bepila baayu fɔ. Ɛ mɛ gɛlɛ ke ɛ sa pila duyu-kamasɛ. 19Gɛ ɛ mɛ bepila gɛtɛ bè sere kpata wanɩ fɔ baayu yaanɩ anlɛ lili wafwe. Yaabo ɩ̀ ba bɩsɩrɩ kooron (6). 20Gɛ bepila bɔɔ-ɩgba ɩnyɔɔ fɔ powu yaayu yaanɩ fɔ, bɛ mɛ pomegraniti wabi gɛkpɩn (200) bɛ kyɔlɔga ma ayu fɔ be tuma. 21Gɛ e sere bepila fɔ Dikwo-dɩrɛ fɔ dɩɩ kpata waanɩ, gɛ ɛ sa pila gɛtɛ wʋ̀ sa gatɩn gɩɩ gɩlan fɔ diyere alɛ Yakin, gɛ e kpèlè gatala giiyo fɔ mɔ alɛ Bosa. 22Bepila fɔ bɔɔ gatala wù we anlɛ lili wafwɛ. Okoro e werema bepila bɔɔ gʋtʋn fɔ.
23Huram ɛ ka gɩwɔrɔnyan-sɩya ɛ wɔrɔ butu buu geto-sakʋn-dɩrɛ kulu-kulu-dɩrɛ gɛtɛ waayɛrɛ wʋ̀ ba bɩsɩrɩ fwo-ton (15), gɛ waatɔ wʋ̀ ba ba bɩsɩrɩ kwarankɩ ma ɔfan (7.5), gɛ wuu gesilin-tuma wʋ̀ ba bɩsɩrɩ akpilin anyɔɔ ma ton (45). 24Gɛ ɛ gbɛrɛ e tiri anlɛ akumani yiinundu ɩgba ɩnyɔɔ butu bʋʋ geto-sakʋn fɔ wuunyun waanɩ. Ɛ gbɛrɛ akumani fwo ɛ sa gɩsɩrɩ gɩkɩ ma ɔfan-kamasɛ gaanɩ e silin butu bʋʋ geto-sakʋn wuunyun fɔ powu e tuma.
25Gɛ butu buu geto-sakʋn fɔ wʋ̀ gyaga bɛkwɔ-teni fwo-bɛnyɔɔ gɛtɛ bɛ ka gɩwɔrɔnyan-sɩya bɛ mɛ fɔ boo koro. Besiyee bɔɔ bʋnʋn bù ten gatala gɩɩ gɩlan, gɛ besiyee bɔɔ bʋnʋn bù ten ofila wʋʋ gɛnʋ̀nkʋn wʋʋ gɩlan, gɛ besiyee bɔɔ bʋnʋn bù ten gatɩn gɩɩ gɩlan, gɛ besiyee bɔɔ bʋnʋn bù ten ofila wʋʋ gɛtàkʋn wʋʋ gɩlan. Butu buu geto-sakʋn fɔ wʋ̀ gyaga boo koro, gɛ bɔɔ gama bɩsɩrɩ bʋʋ gɩlan fɔ powu ì ten ma bɛwɔlɔn. 26Wuutin wʋ̀ ba gulobi-kɩlɩn gaabo. E mirigiti wuunyun anlɛ kɔpʋ wuunyun, abɛɛ anlɛ lili wafwɛ. Gɛ wuu to butu anlɛ garawa gbaa ɛkɩ (2,000).
27Gɛ e biri ɛ ka gɩwɔrɔnyan-sɩya ɛ wɔrɔ abʋn-yelakʋn fwo gɛtɛ aà talɩ a kpema-kpema yɩ. Wʋkamasɛ waabo, ma waayɛrɛ wʋ̀ ba bɩsɩrɩ kooron-kooron, gɛ wʋʋ gɛtɔ wʋ̀ ba bɩsɩrɩ bɩnaa ma ɔfan. 28Anlɛ gɛtɛ bɛ mɛ ayelakʋn fɔ n tɛ ba lɛ. Bɛ ka iyon-pansan-pansan bɛ marama abʋn-yelakʋn fɔ yɩɩ bɩlan baanɩ. 29Bɛ mɛ bɛdɩ̀rɛ̀, ma bɛkwɔ-teni, ma Kerubim bɛ sa bɩlan fɔ baanɩ. Gɛlɛ ke bɛ mɛ afwɛ-lɔlɛ fɔ bɛ gyaga bɛdɩ̀rɛ̀, ma bɛkwɔ-teni fɔ bɔɔ gatala ma bɔɔ gatɩn. 30Gɛ tunla-san-kamasɛ ɛ̀ ba gɩwɔrɔnyan-sɩya gɩɩ bɩsɩrɩ bɩnaa, gɛtɛ bɛ ka gɩwɔrɔnyan bɛ sa ma ɛyɩ anyɔɔ-anyɔɔ. Gɛ tunla-san-kamasɛ bɛkɔna baanɩ fɔ, bɛ mɛ imini-yelalɛ gɛtɛ tunla-san wɔ tasa fɔ ɛ̀ gyaga yii koro. 31Bɛ mɛ difwe-kulu-kulu tunla-san fɔ getite gɛtɛ tasa gɛtɛ walun ɩ̀ ba gɩsɩrɩ gɩkɩ ma ɔfan (1.5) ɛ̀ taga waanɩ. Wuu difwe fɔ wù we kulu-kulu, gɛ wayɛrɛ ɩ̀ ba bɩsɩrɩ bʋnyɔɔ ma geyo dɩnaa wʋʋ dɩkɩ. Gɛ bɛ salɩ anyan ma ɔmɩrɩ be silin difwe fɔ diinyun. Ayelakʋn fɔ ì we kyɛkyɛ yiifèn ɩnaa powu mɔ in we kulu-kulu. 32Bɩsɩrɩ bɩnaa fɔ bʋ̀ sa imini-pansan-pansan fɔ yɩɩ gatɩn, gɛ ɛ gbɛrɛ gɩwɔrɔnyan gɛtɛ bù de bɩsɩrɩ bʋnyɔɔ fɔ ɛ marama ma gɛbʋn-yelakʋn fɔ. Gɩsɩrɩ-kɩlɩn gɩɩ gɛtɔ gɩ̀ ba bɩsɩrɩ bʋnyɔɔ ma geyo dɩnaa wʋʋ dɩkɩ. 33Bɛ mɛ bɩsɩrɩ fɔ anlɛ tiiramisan bɩsɩrɩ. Bɛ ka gɛ gɩwɔrɔnyan-sɩya bɛ mɛ ɛwʋ gɛtɛ wù de bɩsɩrɩ fɔ ofèn ma ofèn fɔ, ma gɩwɔrɔnyan gɛtɛ bɛɛ ka taya bɛ sa gaanɩ fɔ, ma gɩsɩrɩ gɩɩ bɩtà, ma dɩka dii gikunbi powu.
34Bɛ mɛ awɔrɔnyan-tonlɛ bɛ sa bɛkɔna bɛnaa fɔ baanɩ, gɛtɛ ɩ̀ marama ye tunla-san fɔ gatɩn bʋn ye. 35Bɛ mɛ adawʋ yii mini ma ɔmɩrɩ kulu-kulu gɛtɛ waayɛrɛ yaà mɛ anlɛ gɩsɩrɩ gɩkɩ bɛ marama imini-pansan-pansan fɔ be silin tunla-san fɔ wayu yaanɩ. Awɔrɔnyan-tonlɛ-yelalɛ ma ɩpansan-pansan fɔ powu ɩ̀ kyaga ma tunla-san fɔ waayu yaanɩ. 36Ɛ mɛ Kerubi ɛbɛ, ma bɛdɩ̀rɛ̀, ma iben-yon ɛ marama awɔrɔnyan-tonlɛ fɔ, ma ayelakʋn fɔ ma ɔkʋn-kamasɛ gɛtɛ osele wʋ̀ sa fɔ, ma afwɛ ma ɔmɩrɩ e silin wʋ powu. 37Anlɛ gɛ ɛ wɔrɔ ayelakʋn fwo fɔ. Ɛyɩ powu yaalɩ ma yiidu ì we kyɛkyɛ.
38Huram ɛ nɩ ka gɩwɔrɔnyan-sɩya ɛ mɛ bɛtasa fwo, gɛtɛ ɛkamasɛ ee to butu galon gɛkpɩn ma dikpilin ma fwo (230). Tunla-san-kamasɛ wayɛrɛ ɩ̀ ba bɩsɩrɩ kooron. Tasa-kamasɛ ɛ̀ gyaga geyelakʋn gɩkɩ gii koro. 39Ɛ ka tunla-san ɛbɛ fɔ ton e sere Dikwo-dɩrɛ fɔ dɩɩ gatɩn gɩɩ gɩlan, gɛ ɛ ka ton kurumakyɛɛ fɔ e sere dɩɩ gatala gɩɩ gɩlan. Gɛ ɛ ka tasa-dɩrɛ fɔ e sere Dikwo-Dɩrɛ fɔ diifila wʋ gɛtàkʋn ma gatɩn gɩɩ gɩlan yii getite. 40Huram ɛ nɩ wɔrɔ bɛtasa-dɩrɛ, ma bɛsɔfɩ, ma bɛtasabi.
Okoro Huram e werema gʋtʋn gɛtɛ egyu-dɩrɛ Solomon ɛ tɛ wɔ Yahwe Dikwo-dɩrɛ fɔ daanɩ fɔ powu. 41Ɛyɩ n di bepila bɛnyɔɔ fɔ, ma imini gɛtɛ ɩ̀ gyaga baayu yii koro fɔ, ma imini gɛtɛ ɩ̀ kyaga ma bɛwɔlɔn gɛ ɩɩ sa bɛtasa bɛnyɔɔ gɛtɛ bɛ̀ gyaga bepila fɔ yii koro ɔmɩrɩ fɔ, 42ma pomegraniti wabi nkpɩn bʋnyɔɔ (400) gɛtɛ ɩ̀ kyaga ma ɩŋʋʋ ɩnyɔɔ gɛtɛ ɩɩ sa bɛtasa bɛnyɔɔ gɛtɛ bɛ̀ gyaga bepila fɔ yii koro gɛ bɛɛ sa bɛ ɔmɩrɩ fɔ, 43ma ayelakʋn fwo ma yɩɩ bɛtasa fwo fɔ, 44ma butu buu geto-sakʋn fɔ, ma bɛkwɔ-teni fwo-bɛnyɔɔ gɛtɛ bɛ̀ sa wʋʋ gatɩn fɔ, 45ma isun, ma bɛsɔfɩ, ma bɛtasabi.
Gɩwɔrɔnyan-sɩya-yalɩlɛ gɛ Huram ɛ ka ɛ mɛ anyan nyayɩ powu ɛ tɛ egyu-dɩrɛ Solomon tɛ Yahwe Dikwo-dɩrɛ fɔ. 46Egyu-dɩrɛ Solomon ɛ yɛ bɛ ka anyan fɔ powu bɛ sa dɩtɩn-maralɛ daanɩ, Yodan wɔtalɩ gɛtɛ wʋ̀ sa Sukoti ma Saretan boo getite fɔ waanɩ. 47Solomon ɛn kɛrɛ anyan fɔ, yema ɩ̀ sɔ gʋsɔ. Okoro bɛn nyɩnla gɩwɔrɔnyan-sɩya fɔ gɩɩdʋrʋ.
48Gɛ Solomon ɛ mɛ Yahwe Dikwo-dɩrɛ fɔ daanyan gɛtɛ ɩ̀ sa daanɩ fɔ powu. Ɛyɩ n di sɩka-sɩya gedi gɩɩ gɛtɛ̀kʋn, ma sɩka-sɩya wɔkpʋlɔ gɛtɛ bɛɛ ka boroboro bɛ gyaga wuu koro bɛ tɛ Yahwe gedi fɔ, 49ma sɩka-sɩya-kpara bɛkandɩya bɔɔ gɛgyagakʋn. Bɛ ka yɩ ton-ton be sere ologyi ma dɩbɩyan pɛ àà gyu Ɔkʋn-dɩrɛ wʋʋkʋn-dɩrɛkʋn fɔ, ma sɩka-sɩya wafwɛ gɛtɛ bɛ mɛ fɔ, ma bɛkandɩya, ma ɔtan wʋʋ bɩnyanɩ, 50ma sɩka-sɩya bɛtasabi, ma omini-tiiralɛ kandɩya wayenkpen, ma bɛtasa, ma bɩtɩyɛ, ma olifwi wʋʋ tasa, ma sɩka-sɩya-kpara wɔ kʋlɔkʋlɔ tɛ gamɩ gii dikwo, Ɔkʋn-dɩrɛ wʋʋkʋn-dɩrɛkʋn fɔ wʋʋpʋnʋ, ma Dikwo-dɩrɛ fɔ dii getumakʋn gɩɩpʋnʋ.
51Gɛtɛ egyu-dɩrɛ Solomon e werema Yahwe Dikwo-dɩrɛ fɔ dɩɩ gʋtʋn powu fɔ, ɛ ka anyan gɛtɛ wote Dafidi ɛ ka ɛ tɛ Yahwe fɔ powu ɛ bɛ sa daanɩ. Ɛyɩ n di, sɩka-fututu, ma sɩka-sɩya, ma anyan kperen-kperen fɔ.
Currently Selected:
1 Begyu-dɩrɛ 7: ADE
Highlight
Share
Compare
Copy
Want to have your highlights saved across all your devices? Sign up or sign in
2025 Ghana Institute of Linguistics Literacy and Bible Translation
