Yohane 9
9
Yesu chʋɔ baalɛ wʋrʋ ba lʋrʋ ɩ ɔtaŋpʋ
1Gʋ Yesu dɔŋ wʋ a ju na, wʋ na baalɛ wʋrʋ ba lʋrʋ ɩ ɔtaŋpʋ. 2Sɛ wʋ kpalɛnara baa tasɛ ɩ sɛ, <<Wʋkalaasa, Mmʋɔ n yɩɛ dɩsʋbʋ sɛ dɩ yela sɛ ba lʋrʋ baalɛ wina ɔtaŋpʋ, wʋŋ yaa wʋ lʋrʋda?>>
3Sɛ Yesu lɩsɛ ba nʋɔ sɛ, <<Naa baalɛ wina yaa wʋ lʋrʋda n yɩɛ dɩsʋbʋ o, ama ŋina tibi bɛ ganaŋkʋ aja yɩɛ na Ɩsʋɔ a pala na wʋ dʋɔ lɩsɛ wʋ yikuo kalaa na. 4Gʋ wiita saŋ wʋ wɩɛ n na bɩrɛ, ŋɩ tiri gʋ dɩ n yɩɛ wʋŋ wʋ kpiri maŋ na dɩtʋm. Giteŋteŋbiri a kɔnɛ gʋ wʋrʋ baa ti dɩlɛ yɩɛ dɩtʋm m. 5Gʋ ma saŋ ma wɩɛ dulunya naŋ n na bɩrɛ, maŋ n nyina dulunya naŋ ŋmaŋi.>>
6Gʋ wʋ tawɩ ŋina na, wʋ tɔ mɩtalɩŋ si tibi sɛ mʋ mɩtalɩŋ ŋii buu tɩɛra mʋ bʋɔlɛ baalɛ wʋŋ asa. 7Sɛ Yesu tawɩ ɩ sɛ, <<Ju Silowam Dɩpatɛ naŋ ga kɔŋ nya asa.>> [Silowam tie n nyina sɛ ba kpiri ɩ]. Dɩmʋŋ dʋɔ baalɛ wʋŋ ju ga kom sɛ wʋ bɔrɛ kɔŋ dɩɛ yela wʋ a na.
8Sɛ wʋ na baa ba chaɩ, na baa ba cha na ɩ gʋ wʋ a sʋlʋ na, tasɛ sɛ, <<Naa baalɛ wina n nyina baalɛ wʋŋ wʋ cha wʋ chaɩ wʋ a sʋlʋ naa?>> 9Barɛ sɛ wʋŋ bɛ.
Sɛ barɛ dʋɔ sɛ, <<Aye, wʋ lɩɩ ɩ bɛ.>>
Ama wʋ tɩŋtɩŋ wʋ tawɩ sɛ, <<maŋ bɛ.>>
10Sɛ ba tasɛ ɩ sɛ, <<Sɩnɛ sɛ dɩ yɩɛ sɛ nya asa fulu?>>
11Sɛ wʋ lɩsɛ ba nʋɔ sɛ, <<Baalɛ wʋŋ baa yagɛ ɩ sɛ Yesu na n buu tɩɛra mʋ bʋɔlɛ ma asa. Sɛ wʋ tawɩ maŋ sɛ ma n ju Silowam Dɩpatɛ naŋ ga kɔŋ. Dɩmʋŋ dʋɔ ma ju ga kom sɛ maa na.>>
12Sɛ ba tasɛ ɩ sɛ, <<Le sɛ baalɛ wina wɩɛ?>> Sɛ wʋ lɩsɛ ba nʋɔ sɛ, <<Ma ba jiŋ ŋ.>>
Farasitina baa a kɩɛ ɔtaŋpʋ wʋŋ lʋm chʋɔ naŋ na dieli
13Sɛ ba mʋ baalɛ wʋŋ nafʋɔ wʋ yɩɛ ɔtaŋpʋ na kɔna Farasitina baa. 14Na wɩɩ gaa Yesu buu tɩɛra ŋii mʋ fulu ɔtaŋpʋ wʋŋ asa na yɩɛ Fɩɛsɛ wɩɩ bɛ. 15Dɩmʋŋ dʋɔ Farasitina baa gba tasɛ ɩ ganaŋkʋ wʋ yɩɛ sɛ wʋ a na na. Sɛ wʋ lɩsɛ ba nʋɔ sɛ, <<Wʋ buu tɩɛra bɛ mʋ bʋɔlɛ ma asa, sɛ ma kom sɛ dɩtɩɛna maa na.>>
16Sɛ Farasitina baa barɛ tasɛ sɛ, <<Baalɛ wina n lɩɩ Ɩsʋɔ jaŋ ŋ, akala takɩɛ wʋ aa di Fɩɛsɛ wɩɩ dʋɔ ɔ.>>
Ama barɛ dʋɔ tasɛ sɛ, <<Sɩnɛ sɛ dɩsʋbʋ yɩɛrɛ a dɩlɛ yɩɛ adaŋgana daasɛ ŋina?>> Dɩmʋŋ dʋɔ ba tɩba kpara.
17Dɩtamtɩŋ na, ba ti bɔrɛ tasɛ baalɛ ɔtaŋpʋ wʋŋ sɛ, <<Be wɩɛ sɛ nya wɩɛna nyaa tawɩ lɩɩ wʋ dʋɔ? Nya asa sɛ wʋ fulu.>>
Sɛ baalɛ wʋŋ lɩsɛ ba nʋɔ sɛ, <<Wʋ yɩɛ Ɩsʋɔ ɔja bɛ.>>
18Yudatina bɩnɩɛ baa n saŋ lɩɛ di sɛ nafʋɔ wʋ yɩɛ ɔtaŋpʋ ʋ sɛ wʋ asa fulu mʋ gaa tala gʋ ba kpiri ju ga yagɛ wʋ lʋrʋda. 19Sɛ ba tasɛ wʋ lʋrʋda baa sɛ, <<Amɩɛ bu baalɛ jaŋ mɩnaŋ? Wina n nyina wʋŋ ɩɩ tawɩ sɛ ɩ lʋrʋ ɩ ɔtaŋpʋ? Sɩnɛ sɛ dɩ yɩɛ sɛ wʋ a na dɩtɩɛna?>>
20Sɛ wʋ lʋrʋda baa lɩsɛ nʋɔ sɛ, <<Dɩ jiŋ gʋ wʋ yɩɛ daa bu baalɛ jaŋ bɛ, sɛ dɩ jiŋ gʋ dɩ lʋrʋ ɩ ɔtaŋpʋ bɛ. 21Ama ganaŋkʋ dɩ yɩɛ sɛ wʋ a na dɩtɩɛna yaa wʋŋ wʋ fulu wʋ asa na bɩrɛ, dɩ ba jiŋ ŋ. N tasɛ ɩ wʋ bɩɩ. Wʋ tɩŋtɩŋ wʋ a dɩlɛ lɩsɛ nʋɔ.>> 22Wʋ lʋrʋda baa a se Yudatina bɩnɩɛ baa dʋɔ sɛ ba tawɩ dɩmʋŋ. Yudatina bɩnɩɛ baa fɩla tawɩ kpa sɛ wʋkʋma wʋŋ wʋ a tawɩ sɛ Yesu n nyina Kirisito wʋŋ na, baa lɩsɛ ɩ lɩɩ Yudatina tʋm danɛ gaa naŋ. 23Ŋina dʋɔ sɛ wʋ lʋrʋda baa tawɩ sɛ, <<Wʋ bɩɩ, n tasɛ ɩ.>>
24Sɛ ba ti yagɛ baalɛ wʋŋ nafʋɔ wʋ yɩɛ ɔtaŋpʋ na bʋlatɛ, sɛ ba tawɩ ɩ sɛ, <<Ka Ɩsʋɔ ntaŋ sɛ nyaa tawɩ gasiŋteŋ. Dɩ jiŋ gʋ baalɛ wina yɩɛ dɩsʋbʋ yɩɛrɛ bɛ.>>
25Sɛ wʋ lɩsɛ ba nʋɔ sɛ, <<Sɛ wʋ yɩɛ dɩsʋbʋ yɩɛrɛ oo yaa wʋ ba yɩɛ oo, ma ba jiŋ ŋ. Bʋrʋ ga dʋŋdʋlʋŋ sɛ ma jiŋ. Nafʋɔ ma yɩɛ ɔtaŋpʋ bɛ ama dɩtɩɛna bɩrɛ maa na.>>
26Sɛ ba ti tasɛ ɩ sɛ, <<Be sɛ wʋ yɩɛ fa nyaŋ? Sɩnɛ sɛ wʋ yɩɛ sɛ wʋ fulu nya asa?>>
27Sɛ wʋ lɩsɛ ba nʋɔ sɛ, <<Ma fɩla tawɩ amɩɛ sɛ ɩŋ nyii i. Be sɛ ɩ ti ɩ ja sɛ ɩ nyii? Amɩɛ gba ɩ ja sɛ ɩ yɩɛ wʋ kpalɛnara bɛ?>>
28Sɛ ba tii ɩ sɛ ba tawɩ sɛ, <<Nya yɩɛ dɩmʋŋ wʋkpa wina kpalɛnarɛ bɛ. Daa bɩrɛ dɩ yɩɛ Mosesi kpalɛnara bɛ. 29Dɩ jiŋ gʋ Ɩsʋɔ tawɩ fa Mosesi bɛ, ama dɩmʋŋ wʋkpa wina bɩrɛ dɩ ba jiŋ diele gaa wʋ lɩɩ ɩ.>>
30Sɛ baalɛ wʋŋ lɩsɛ ba nʋɔ sɛ, <<Be doba wɩɛ mɩnaŋ dɩtɩɛna! Ɩ ba jiŋ diele gaa wʋ lɩɩ ɩ, ama wʋŋ n fulu ma asa. 31Dɩ jiŋ gʋ Ɩsʋɔ baa nyii dɩsʋbʋ yɩɛra wɩɛ ɛ, ama wʋ a nyii wʋkʋma wʋŋ wʋ a se ɩ sɛ wʋ a yɩɛ wʋ jawʋ na bɛ. 32Wʋrʋ n nyii ta sɛ ba fulu wʋŋ ba lʋrʋ ɩ ɔtaŋpʋ na asa a. 33Sɛ baalɛ wina n lɩɩ Ɩsʋɔ jaŋ na, nafʋɔ wʋ aa dɩlɛ yɩɛ ŋina a.>>
34Sɛ ba lɩsɛ ɩ nʋɔ sɛ, <<Ba lʋrʋ nyaŋ dɩsʋbʋ naŋ bɛ sɛ nya yɩɛ dɩsʋbʋ yɩɛrɛ, sɛ nyaa ja sɛ nyaa kalaa daa?>> Sɛ ba geŋ ɩ lɩɩ Yudatina tʋm danɛ gaa naŋ.
Feliŋ naŋ bataŋpʋna
35Gʋ Yesu nyii sɛ Yudatina bɩnɩɛ baa geŋ baalɛ wʋŋ lɩɩ Yudatina tʋm danɛ gaa naŋ na, wʋ ga na ɩ sɛ wʋ tasɛ ɩ sɛ, <<Nya lɩɛ Wʋkpa Bu wʋŋ di?>>
36Sɛ baalɛ wʋŋ tasɛ ɩ sɛ, <<Ma Kpaŋjuo, Mmʋɔ n nyina ɩ? Tawɩ maŋ na maa lɩɛ ɩ di.>>
37Sɛ Yesu tawɩ ɩ sɛ, <<Nya na ɩ dɩtɩɛna, gasiŋteŋ wʋŋ n nyina wʋŋ wʋ a tawɩ n jaŋ na.>>
38Sɛ baalɛ wʋŋ tawɩ sɛ, <<Ma Kpaŋjuo, ma lɩɛ di.>> Sɛ wʋ tʋŋ ɩ.
39Sɛ Yesu tawɩ sɛ, <<Wɩɛ di dʋɔ sɛ ma kɔŋ dɩmʋŋ dulunya gana naŋ ganaŋkʋ bataŋpʋna a ja na, na baa baa na a yɩɛ bataŋpʋna.>>
40Gʋ Farasitina baa ba wɩɛ Yesu jaŋ na barɛ nyii gʋ wʋ tawɩ wɩɛ ŋina na, ba tasɛ ɩ sɛ, <<Nyaa tawɩ sɛ daa gba dɩ yɩɛ bataŋpʋna bɛ yaa?>>
41Sɛ Yesu lɩsɛ ba nʋɔ sɛ, <<Sɛ ɩ yɩɛ bataŋpʋna na, nafʋɔ ɩɩ di dɩsʋbʋ dɩpʋɛ ɛ. Ama dɩtɩɛna gʋ ɩ tawɩ sɛ ɩɩ dɩlɛ na na bɩrɛ, ɩ di dɩpʋɛ.>>
Currently Selected:
Yohane 9: CLL
Highlight
Copy
Compare
Share
Want to have your highlights saved across all your devices? Sign up or sign in
2025 Ghana Institute of Linguistics Literacy amp Bible Translation
