Yohane 8
8
Ba chaŋ alʋ wʋrʋ wʋ yɩɛ baalɛ wʋrʋgbɩɛ lɩɩ
1Sɛ Yesu ju Olifi dasɛ bʋrɔŋ dʋɔ. 2Tafɩlɛ gʋ a ŋmaŋi na, Yesu bɔrɛ ju Ɩsʋɔ tʋm danɛ naŋ, diele gaa bakpa sɩla logo ɩ sɛ wʋ cha na wʋ a kalaa ba. 3Sɛ Mosesi Mbara bakalaasa na Farasitina baa kɔna alʋ wʋrʋ wʋ yɩɛ baalɛ wʋrʋgbɩɛ lɩɩ. Ba yela sɛ wʋ gaa sɩŋ bakpa baa asanaŋ, 4sɛ ba tawɩ Yesu sɛ, <<Wʋkalaasa dɩ chaŋ dɩmʋŋ alʋ wina wʋ a yɩɛ baalɛ wʋrʋgbɩɛ lɩɩ. 5Mosesi Mbara ŋii naŋ na, Mosesi dʋ daa sɛ dɩ n lɔ bʋɛ kʋ dɩmʋŋ ala bana. Sɛ nyaŋ dʋɔ, dɩtɩɛna be sɛ nyaa tawɩ?>> 6Ba mʋ wɩɛ tasɛ ŋina baa yii ɩ gʋdʋ bɛ, na baa yu bʋrʋ sɩŋ dʋɔ mʋ pʋɩ ɩ.
Ama Yesu luuŋ sɛ wʋ faara mʋ wʋ pam nyiŋbie wʋ a sabɩɛ tibi.
7Gʋ ba saŋ baa tasɛ ɩ wɩɛ na, wʋ kʋlʋ sɩŋ sɛ wʋ tawɩ ba sɛ, <<Amɩɛ tɩba wʋŋ wʋ n yɩɛ ta dɩsʋbʋ na, n yela na wʋ a chɩŋkpɩɛ lɔ ɩ bʋɛ.>> 8Wʋ ti bɔrɛ luuŋ wʋ a sabɩɛ tibi.
9Gʋ ba nyii ŋina na, ba faara baa lɩɩ dɩmaŋ garɛ-garɛ, bɩnɩɛ baa n chɩŋkpɩɛ lɩɩ dɩmaŋ, sɛ dɩ gaa kakaa Yesu nyiŋeŋ, na alʋ wʋŋ saŋ wʋ sɩmɩɛɩ dɩmaŋ. 10Sɛ Yesu kʋlʋ sɩŋ sɛ wʋ tasɛ ɩ sɛ, <<Alʋ, ba wɩɛ le? Ba wʋrʋ fu nyaŋ dɩpʋɛ?>>
11Sɛ alʋ wʋŋ lɩsɛ nʋɔ sɛ, <<Kpaŋjuo, aye.>>
Sɛ Yesu tawɩ ɩ sɛ, <<Maŋ gba maa fu nyaŋ dɩpʋɛ ɛ. Dɩtɩɛna pala n baa ti ga yɩɛ dɩsʋbʋ.>>
Yesu n nyina dulunya naŋ ŋmaŋi
12Sɛ Yesu ti bɔrɛ tawɩ bakpa baa sɛ, <<Maŋ n nyina dulunya naŋ ŋmaŋi gaa. Wʋkʋma wʋŋ wʋ kpaŋ maŋ na baa pala gɩbɩrɩ naŋ ŋ, ama wʋ a yu ŋmaŋi ŋii ŋii fa nkpa na.>>
13Sɛ Farasitina baa tawɩ ɩ sɛ, <<Nyaa di n tɩŋtɩŋ n wʋsɛ dʋɔ seriya, ama nya seriya gaa ba yɩɛ gasiŋteŋ ŋ.>>
14Sɛ Yesu lɩsɛ nʋɔ sɛ, <<Hali maa di ma tɩŋtɩŋ ma wʋsɛ dʋɔ seriya gba, ma seriya gaa yɩɛ gasiŋteŋ. Akala takɩɛ ma jiŋ diele gaa ma lɩɩ na diele gaa maa ju. Ama amɩɛ bɩrɛ ɩ ba jiŋ diele gaa ma lɩɩ yaa diele gaa maa ju u. 15Ɩɩ mʋna wʋkpa gbɩɛsɛ dʋɔ bɛ ɩɩ di wɩɛ. Maŋ bɩrɛ ma aa fu wʋrʋ dɩpʋɛ ɛ. 16Ama sɛ ma di wɩɛ na, ma dɩpʋɛ yɩɛ ga gbɩɛ dʋɔ, akala takɩɛ ma ba yɩɛ ma nyiŋeŋ ŋ. Juo wʋŋ wʋ kpiri maŋ na kpi ma dʋɔ. 17Amɩɛ mbara ŋii naŋ na, ba sabɩɛ sɛ bakpa bala seriya yɩɛ gasiŋteŋ. 18Ma tɩŋtɩŋ ma di ma wʋsɛ dʋɔ seriya. Juo wʋŋ wʋ kpiri maŋ na, n nyina ma seriyatɛ wʋ baŋbaŋ wʋŋ.>>
19Sɛ ba tasɛ ɩ sɛ, <<Le sɛ n juo wɩɛ?>>
Sɛ Yesu lɩsɛ nʋɔ sɛ, <<Ɩ ba jiŋ maŋ yaa Majuo o, sɛ nafʋɔ ɩ jiŋ maŋ na, ɩ jiŋ Majuo wʋŋ gba.>>
20Yesu tawɩ dɩmʋŋ wɩɛ ŋina gʋ wʋ a kalaa Ɩsʋɔ tʋm danɛ naŋ tirina diele gaa faa adaka ŋii wɩɛ na. Ama wʋrʋ n chaŋ ɩ, akala takɩɛ wʋ saŋa n talata a.
21Sɛ Yesu ti tawɩ ba sɛ, <<Maa ju mɩnaŋ, ɩɩ kɩɛ ja maŋ na ɩɩ sɩŋ amɩɛ dɩsʋbʋ naŋ. Diele gaa maa ju na, ɩɩ dɩlɛ kɔŋ dɩmaŋ ŋ.>>
22Ŋina yela sɛ Yudatina bɩnɩɛ baa tasɛ, <<Wʋ a kʋ wʋ wʋsɛ bɛ? Dɩmʋŋ dʋɔ sɛ wʋ a tawɩ sɛ diele gaa maa ju na, ɩɩ dɩlɛ kɔŋ dɩmaŋ ŋ?>>
23Wʋ ju dʋɔ tawɩ sɛ, <<Amɩɛ bɩrɛ ɩ lɩɩ tibi gana dʋɔ bɛ, sɛ maŋ dʋɔ ma lɩɩ Ɩsʋɔ adugbe. Ɩ yɩɛ dulunya naŋ bakpa bɛ, ama maŋ bɩrɛ ma ba yɩɛ dulunya naŋ wʋkpa a. 24Ma fɩla tawɩ amɩɛ sɛ ɩɩ sɩŋ amɩɛ dɩsʋbʋ naŋ, sɛ ɩŋ lɩɛ di gʋ ma tawɩ sɛ ma yɩɛ wʋŋ maa tawɩ sɛ ma yɩɛ na, ɩɩ sɩŋ amɩɛ dɩsʋbʋ naŋ gasiŋteŋ.>>
25Ba tasɛ ɩ sɛ, <<Nyaŋ n nyina Mmʋɔ?>> Sɛ Yesu lɩsɛ ba nʋɔ sɛ, <<Takɩɛ ganaŋkʋ maa tawɩ sɛ ma yɩɛ na.>>
26<<Ma wɩɛna wɩɛ fɔɩ maa tawɩ mʋ fu amɩɛ dɩpʋɛ. Ama wʋŋ wʋ kpiri maŋ na yɩɛ gasiŋteŋtɛ bɛ, sɛ ŋii ma nyii lɩɩ wʋ jaŋ na, sɛ ma tawɩ dulunya.>>
27Ba n nyii tie sɛ Wʋ juo wɩɛ sɛ wʋ a tawɩ ba a. 28Dɩmʋŋ dʋɔ Yesu tawɩ sɛ, <<Sɛ ɩ jiŋna Wʋkpa Bu wʋŋ adugbe na, sɛ ɩ jiŋ gʋ ma yɩɛ wʋŋ maa tawɩ sɛ ma yɩɛ na, yela maa yɩɛ bʋrʋ ma tɩŋtɩŋ ŋ. Ama maa tawɩ ŋii Majuo wʋŋ kalaa maŋ na bɛ. 29Wʋŋ wʋ kpiri maŋ na kpi ma dʋɔ, sɛ wʋ aa yela maŋ ma nyiŋeŋ ŋ, akala takɩɛ saŋa kʋma maa yɩɛ ŋii ŋii su wʋ asa na.>> 30Hali gʋ Yesu tawɩ ŋina na, bakpa fɔɩ lɩɛ ɩ di.
Gasiŋteŋ gaa aja yela na wʋkpa a yu wʋ wʋsɛ
31Sɛ Yesu tawɩ Yudatina baa ba lɩɛ ɩ di na sɛ, <<Sɛ ɩ kpaŋ ma kalaa ŋii dʋɔ na, ɩ yɩɛ ma kpalɛnara gasiŋteŋ. 32Dɩmaŋ sɛ ɩɩ jiŋ gasiŋteŋ gaa, na gasiŋteŋ gaa a yela na ɩ yu amɩɛ wʋsɛ.>>
33Sɛ ba lɩsɛ ɩ nʋɔ sɛ, <<Dɩ yɩɛ Abiraham ganana bisi bɛ, sɛ dɩ n yɩɛ gbeŋa fa wʋrʋ ʋ. Sɩnɛ sɛ nyaa dɩlɛ tawɩ sɛ dɩɩ yu daa wʋsɛ?>>
34Sɛ Yesu lɩsɛ ba nʋɔ sɛ, <<Maa tawɩ sɛ n nyii na dieli sɛ wʋkʋma wʋŋ wʋ a yɩɛ dɩsʋbʋ na, wʋ yɩɛ dɩsʋbʋ gbeŋi bɛ. 35Gbeŋi baa cha lʋŋtɩrɛ naŋ gakpaa a, ama bu bɩrɛ wʋ kpi ga dʋɔ gakpaa. 36Dɩmʋŋ dʋɔ sɛ Bu wʋŋ yela sɛ ɩ yu amɩɛ wʋsɛ na, ɩ yu amɩɛ wʋsɛ gasiŋteŋ. 37Ma jiŋ gʋ ɩ yɩɛ Abiraham ganana bisi bɛ. Ama ɩ ja maŋ ɩ kʋ, akala takɩɛ ɩŋ lɩɛ ma wɩɛ di i. 38Maŋ bɩrɛ maa tawɩ amɩɛ bʋrʋ gaa ma na gʋ ma wɩɛ Majuo wʋŋ jaŋ na bɛ. Ama amɩɛ bɩrɛ ɩɩ yɩɛ bʋrʋ gaa ɩ nyii lɩɩ amɩɛ juo jaŋ na bɛ.>>
39Sɛ ba lɩsɛ nʋɔ sɛ, <<Abiraham n nyina daa juo.>>
Sɛ Yesu tawɩ ba sɛ nafʋɔ ɩ yɩɛ Abiraham ganana bisi na, ɩ yɩɛ ŋii wʋ yɩɛ na.
40Ganaŋkʋ ŋɩ kɩɛna na, ɩ ja maŋ ɩ kʋ, akala takɩɛ ma cha tawɩ amɩɛ gasiŋteŋ gaa ma nyii lɩɩ Ɩsʋɔ jaŋ na. Abiraham n yɩɛ dɩmʋŋ wɩɛ ŋina a. 41Amɩɛ bɩrɛ ɩɩ yɩɛ ŋii amɩɛ juo tɩŋtɩŋ a yɩɛ na bɛ.
Sɛ ba lɩsɛ ɩ nʋɔ sɛ, <<Dɩ ba yɩɛ danaŋburibie ɩ. Ɩsʋɔ nyiŋeŋ sɛ dɩ wɩɛna, wʋŋ n nyina daa Juo.>>
42Sɛ Yesu tawɩ ba sɛ, <<Sɛ Ɩsʋɔ n nyina amɩɛ Juo na, nafʋɔ ɩɩ ja ma wɩɛ, akala takɩɛ Ɩsʋɔ jaŋ sɛ ma lɩɩ kɔŋ jɩna dɩtɩɛna. Ma n kɔŋ ma tɩŋtɩŋ ŋ, ama wʋŋ n kpiri maŋ. 43Be n yɩɛ sɛ ɩɩ nyii ŋii maa tawɩ na tie? Akala takɩɛ ɩɩ dɩlɛ ɩ nyii ŋii ma tawɩ na a. 44Amɩɛ bɩrɛ, amɩɛ juo n nyina Ɩsʋɔ ɔdʋŋ, sɛ ɩ ja sɛ ɩ yɩɛ amɩɛ juo jawʋ. Wʋ cha wʋ yɩɛ gatagapʋ wʋkpa bɛ lɩɩ dɩfaratɩŋ sɛ wʋ aa di gasiŋteŋ ŋ, akala takɩɛ gasiŋteŋ taŋ wʋ tɩba a. Gʋ wʋ yɩɛ akarɩɛ na, wʋ a tawɩ ganaŋkʋ wʋ duluŋ kɩɛna na bɛ, akala takɩɛ wʋ yɩɛ akarɩɛtɛ bɛ na akarɩɛtina kpiniŋ juo. 45Ama maŋ bɩrɛ gʋ ma tawɩ amɩɛ gasiŋteŋ na dʋɔ, ɩŋ lɩɛ maŋ di i. 46Amɩɛ tɩba wʋ Mmʋɔ aaŋ dɩlɛ tawɩ maŋ sɛ ma di dɩsʋbʋ dʋɔ dɩpʋɛ? Sɛ maa tawɩ amɩɛ gasiŋteŋ na, be n yɩɛ sɛ ɩɩ lɩɛ maŋ ɩ di? 47Wʋŋ wʋ yɩɛ Ɩsʋɔ teri na, wʋ a nyii ŋii Ɩsʋɔ a tawɩ na. Sɛ kpɩnɩdɩ dʋɔ sɛ ɩɩ nyii na, n nyina sɛ ɩ ba yɩɛ Ɩsʋɔ teri i.>>
Yesu na Abiraham
48Sɛ Yudatina baa tasɛ Yesu sɛ, <<Gʋ dɩɩ tawɩ sɛ nya yɩɛ Samariya wʋkpa sɛ feliŋ sʋbʋ wɩɛ n tɩba na, daa wɩɛ taŋ dieli?>>
49Sɛ Yesu lɩsɛ ba nʋɔ sɛ, <<Feliŋ sʋbʋ ba chaɩ ma tɩba a. Maa bu Majuo, ama amɩɛ bɩrɛ ɩɩ bu maŋ ŋ. 50Maa ja jilima maa fa ma wʋsɛ ɛ, ama wʋrʋ wɩɛ wʋŋ aaŋ ja jilima wʋ a fa maŋ, wʋŋ n nyina wɩɛ diri wʋŋ. 51Maa tawɩ sɛ nyii na dieli sɛ wʋkʋma wʋŋ wʋ a di ma wɩɛ dʋɔ na, wʋ taŋ wʋ a sɩŋ ŋ.>>
52Sɛ Yudatina baa nyii dɩmʋŋ wɩɛ ŋina na ba tawɩ sɛ, <<Dɩtɩɛna dɩ jiŋ gʋ feliŋ sʋbʋ wɩɛ n tɩba. Abiraham sɩŋ dɩmʋŋ sɛ Ɩsʋɔ bajana baa gba ba sɩŋ. Ama nyaa tawɩ sɛ wʋrʋ di n wɩɛ dʋɔ na, wʋ taŋ wʋ a sɩŋ ŋ. 53Sɛ nya yɩɛ wʋjanɛ kii daa juo Abiraham yaa? Wʋ sɩŋ, dɩmʋŋ sɛ Ɩsʋɔ bajana baa gba ba sɩŋ. Mmʋɔ sɛ nyaa fa nfɩɛrɛ sɛ nya yɩɛ?>>
54Sɛ Yesu lɩsɛ ba nʋɔ sɛ, <<Sɛ ma mʋ jilima fa ma tɩŋtɩŋ ma wʋsɛ na, jilima gaa ba yɩɛ bʋrʋ ʋ, Majuo wʋŋ ɩ tawɩ sɛ wʋ yɩɛ amɩɛ Ɩsʋɔ na, wʋŋ n nyina wʋŋ wʋ a mʋ jilima fa maŋ. 55Ŋɩ wɩɛ tɩba takɩɛ ɩ ba jiŋ ɩ ɩ, maŋ bɩrɛ ma jiŋ ɩ. Sɛ ma tawɩ sɛ ma ba jiŋ ɩ na, maa yɩɛ akarɩɛtɛ takɩɛ amɩɛ. Ama ma jiŋ ɩ sɛ maa di wʋ wɩɛ dʋɔ. 56Amɩɛ juo Abiraham asadi takɩɛ wʋ a na saŋa gaa maa kɔnɛ, wʋ na ŋɛ sɛ dɩ yɩɛ ɩ jʋŋ.>>
57Sɛ Yudatina baa tawɩ sɛ, <<Nya n yu ta bɩŋsɛ ŋɩla na sala a, sɛ nya na Abiraham?>>
58Sɛ Yesu lɩsɛ ba nʋɔ sɛ, <<Maa tawɩ sɛ n nyii na dieli sɛ, Ma Wɩɛ pɔɩ sɛ ba lʋrʋ Abiraham.>> 59Gʋ ba nyii dɩmʋŋ wɩɛ ŋina na, ba tɔɔsɩ bʋɛ baa lɔ kʋ ɩ, ama Yesu wɩsɛ wʋ wʋsɛ sɛ wʋ lɩɩ Ɩsʋɔ tʋm danɛ gaa naŋ laŋ.
Currently Selected:
Yohane 8: CLL
Highlight
Copy
Compare
Share
Want to have your highlights saved across all your devices? Sign up or sign in
2025 Ghana Institute of Linguistics Literacy amp Bible Translation
